ഒരു ബുള്ളറ്റും രണ്ടു പെൺകുട്ടികളും

Part 4

ഒരു മല മുഴുവനും നക്ഷത്രങ്ങൾ പൂത്തിറങ്ങിയ പോലെ മിന്നാമിന്നികൾ .
ഇത്ര അധികം മിന്നാ മിന്നികൾ ഈ ലോകത്തു ഉണ്ടായിരുന്നോ.
പൂർണ നിലവിൽ ഒരു മല മുഴുവനും മിന്നാമിന്നികൾ പൂത്തു നിൽക്കുന്ന ഈ കാഴ്ച എത്ര ജന്മം ഉണ്ടായാലും കണ്ടെന്നു വരില്ല.
കോട മാറിയിരിക്കുന്നു ,പല തരം കാട്ടു പൂക്കളുടെയും ,തേയിലയുടെയും ,ഓറഞ്ചിന്റെയും ഇടകലർന്ന മണമുള്ള തണുത്ത കാറ്റ് അടിക്കുന്നു .

മരിക്കുന്നതിനേക്കാൾ ജീവിക്കാൻ ഉള്ള കാരണങ്ങൾ ഉണ്ടാക്കാൻ ബുദ്ധിമുട്ട് ന്ന ഈ ലോകത്തു ഇത് പോലൊരു കാഴ്ച ഏതൊരാളെയും ജീവിക്കാൻ പ്രേരിപ്പിക്കും .

മലയുടെ മുകളിൽ ഉദിച്ചു നിൽക്കുന്ന ചന്ദ്രനെ കണ്ടപ്പോൾ ഈ ഒരു നിമിഷം മാത്രം ആണ് സത്യമെന്നു തോന്നി ,ബാക്കി എല്ലാം മിഥ്യയാണ് ,ഞാനും ഞാൻ ജീവിക്കുന്ന ലോകവും .
നിലാവ് പരന്നൊഴുകുന്നുണ്ട് .ഇത്ര ഭംഗിയോ മൂന്നാറിന് ,മനുഷ്യനെ ജീവിക്കാൻ പ്രേരിപ്പിക്കുന്ന എന്തോ ഒന്ന് ഉണ്ട് ഇവിടെ.
അല്ലെങ്കിൽ തുച്ചമായ വേതനത്തിനു പണി എടുക്കുന്ന ഇവിടുത്തുകാർ ഇങ്ങനെ സന്തോഷിച്ചു ജീവിക്കില്ലായിരുന്നു.
മുടി നിറച്ചും മുല്ലപ്പൂ ചൂടി കടും നിറത്തിലെ ചേല ഉടുത്തു കലപില കൂട്ടി ടൗണിൽ കണ്ട പെണ്ണുങ്ങൾ പെട്ടെന്ന് മനസ്സിൽ ഓടി എത്തി.

മേഘങ്ങൾ തൊട്ടു തൊട്ടില്ല എന്ന മട്ടിൽ പരന്നൊഴുകുന്നു .

താഴേക്ക് നോക്കുമ്പോൾ വെള്ളി അരഞ്ഞാണം പോലെ ഒരു നീർച്ചോല കാണുന്നുണ്ട് .അതിന്റെ അപ്പുറത്തെ കരയിൽ മൃഗങ്ങൾ വെള്ളം കുടിക്കുന്നു .ആനകൂട്ടം ആണെന്ന് തോന്നുന്നു,കൂടെ മാനുകളും .

ശിഖിരങ്ങൾ പടർത്തി നിൽക്കുന്ന മരങ്ങൾ കൂടുതൽ ഭംഗി കൂട്ടുന്നു .

നിലവിന്റെ വെട്ടത്തിൽ തേയില തോട്ടം പട്ടു ഉടുത്ത പോലെ.

പെട്ടെന്ന് എനിക്ക് ലോകത്തുള്ള സകല വസ്തുക്കളോടും വല്ലാത്ത പ്രണയം തോന്നി.
എത്ര സുന്ദരമായ നിമിഷം.
ഒരു ചിത്രം പോലെ.അതിന്റെ ഒരരികിൽ ഞാനും.
ഇതാണ് ശ്രുതി അഗർവാൾ പറഞ്ഞത് .ഈ ഒരു നിമിഷം ,അത് ഒരിക്കലും വേറെ ആർക്കും കിട്ടില്ല .നമുക്ക് വേണ്ടി മാത്രം പ്രകൃതി ഒരുക്കിവച്ചിരിക്കുന്ന സമ്മാനങ്ങൾ.

ശ്വാസത്തിൽ പോലും ഒരു ടൺ എനർജി കയറിയ പോലെ.

നീ ഇവിടെ വന്നു നിൽക്കുകയായിരുന്നോ റസി ..അനു വന്നു പുറകിൽ നിന്നത് ഞാൻ അറിഞ്ഞില്ല.
ദൂരേക്ക് കൈ ചൂണ്ടി കാണിച്ചു കൊടുത്തപ്പോൾ ഉറക്കച്ചടവിലും അദ്ഭുതം കൊണ്ടു അവളുടെ കണ്ണ് മിഴിയുന്നത് ഞാൻ കണ്ടു .

ഒന്നും മിണ്ടാതെ പ്രകൃതി ഒരുക്കിയ മായ കാഴ്ച കണ്ടു നിൽക്കുമ്പോൾ ഞങ്ങളുടെ കണ്ണുകൾ നിറഞ്ഞൊഴുകുന്നുണ്ടായിരുന്നു .
ചില നിമിഷങ്ങൾ അങ്ങനെ ആണ്.ദൈവം എന്ത് കൊണ്ടു ആ രാത്രി ഞങ്ങളെ അവിടെ താമസിപ്പിച്ചു എന്നുള്ളതിന്റെ ഉത്തരമാണ് ഇത്.

എന്നേ വിളിച്ചുണർത്തിയ മൃഗത്തോട് എനിക്ക് വല്ലാത്ത ഇഷ്ടം തോന്നി.

ഇത് അല്ലാഹുവിന്റെ തീരുമാനമാണ് .ഈ രാത്രിയും അതിന്റെ സൗന്ദര്യവും ഞങ്ങൾ കാണണമെന്നുള്ളത്.

എത്ര നേരം അങ്ങനെ നിന്നു എന്നറിയില്ല .

പതുക്കെ ആകാശം ചുമക്കുന്നതും പിന്നീട് വെള്ളി വെളിച്ചം വന്നു നേരം പുലരുന്നതും ഞങ്ങൾ കണ്ടു നിന്നു.

അപ്പോഴാണ് ഞങ്ങൾ അതു വരെ കാണാത്ത കാഴ്ചയിലേക്ക് ഞങ്ങളുടെ കണ്ണുടക്കിയത് .

വർധിച്ചു വരുന്ന ഹൃദയമിടിപ്പോടെ ഞങ്ങൾ അങ്ങോട് തന്നെ നോക്കി നിന്നു.

തുടരും