ലൗ ലെറ്റർ.

ഞാൻ വായിച്ച എറ്റവും മനോഹരമായ കാവ്യം
നീ എനിക്കെഴുതിയ
പ്രേമലേഖനങ്ങളായിരുന്നു.

നിന്റെ മനസ്സു കാണിച്ചെനിക്കെഴുതുന്ന പ്രണയ ലേഖനങ്ങൾ .

വല്ലാത്തൊരഭിനിവേശത്തോടെ
പലയാവർത്തി വായിച്ച്
എല്ലാറ്റിലും നിന്നെ കണ്ട് അനുഭൂതി പകർന്ന വരികൾ നിന്റെതു തന്നെയായിരുന്നു.

മറക്കാനാവാത്ത വാക്കുകളിൽ
ഹൃദയത്തിലേക്ക് ലയിക്കുന്നഭാഷയിൽ
പ്രപഞ്ചത്തോടാകെ പ്രണയം തോന്നിച്ചത്.

ആദ്യമായ് കിട്ടിയപ്രേമലേഖനം
വായിക്കാനൊരിടം തേടി മനസ്സൊരപ്പൂപ്പൻ താടി പോലെ ഭാരരഹിതമായലഞ്ഞതും.

നിന്നെ കുറിച്ചുള്ള ഓർമ്മകളിലെനിക്ക്
വിശപ്പും നിദ്രയുമില്ലാതെ വേദനിക്കുന്ന സുഖ ലഹരിയിൽ ഒഴുകിപ്പോയ കാലങ്ങൾ

ഓരോ പ്രേമ ലേഖനത്തിന്റെയും ഇടവേളകളായിരുന്നു.

പുതിയ കാലത്തിലെന്നെ ഭാഗ്യവാനാക്കുന്നതും.

അനശ്വരമായ് ഓർമ്മയിൽ പൂക്കുന്ന
കഴിഞ്ഞകാലത്തിന്റെ മേൽവിലാസവും തേടിയെത്തിയിരുന്ന പ്രണയലേഖനം തന്നെ.

ബാബു തുയ്യം.
30/04/18.