ശിവാർപ്പണം

ദ്രുതനടന പദഗതിയിലിളകുമൊരു ധൂളിയാ-
മിവനിലലിവോടെനിൻ ചിതിയെ പകരേണം.
ചുരുളുകളിലമരുന്നൊരറിവിന്റെയിതളിനെ-
യുയിരുവഴിവള്ളികൾക്കിരുവശവുമേറ്റണം.

ഗതിവിഗതിയറിയാത്ത ദുരിതത്തിനറുതിയാ-
യവിടുത്തെ വഴിയൊന്നതറിയുവാനാകണം
പതിയെയിവനുലയുന്ന സ്ഥിതിയിലവിടുന്നൊന്നു-
പടിയാറു താണ്ടുവാൻ വഴികൾ കാട്ടീടണം.

നിയതിയുടെ നിഴലുകൾക്കിടയിലലയുന്നൊരെ-
ന്നിഡ പിങ്ഗളങ്ങളിൽ ഇതൾവിരിഞ്ഞീടണം
ഇഹപരവുമിരുൾതെളിവുമിവയൊക്കെയും പിന്നെ-
യിടറുമീ ദേഹിയുമിതെവിടെനിന്നറിയണം.

-വിജു കണ്ണപുരം-