പെണ്ണും പൂച്ചയും

"പൂച്ചയും പെണ്ണും തമ്മിൽ എന്തെങ്കിലും ബന്ധമുണ്ടോ?" ഗുരു എന്നോട് ചോദിച്ചു.

കോടതി കയറേണ്ട ചോദ്യമാണല്ലോ ഗുരു ചോദിക്കുന്നത്! പെണ്ണിനെ “വന്യ ജീവിയോട്” ഉപമിച്ച ഗുരു ഭാവനയെ...

"രണ്ടും എനിക്ക് ഇഷ്ടമാണ് ഗുരോ " ഞാൻ സത്യം പറഞ്ഞു.

"ങേ ? അത് ശരിയാവുമോ ശിഷ്യാ ? ഏതു പൂച്ചയേയും ഇഷ്ടപ്പെടാം, ഓമനിക്കാം, തലോടാം, ഉമ്മ വെക്കാം .എന്നാൽ ആരാന്റെ പെണ്ണിനെ ?! "

"പെണ്ണ് എന്ന് പറഞ്ഞത് എന്റെ കെട്ട്യോൾ. പൂച്ച എന്നത് ലോകത്തുള്ള എല്ലാ പൂച്ചകളും". ഞാൻ വാദം വ്യക്തമാക്കി.

"വിഡ്ഡീ... ഇവിടെ വിഷയം അതല്ല... നീ പൂച്ചയുടെ നോട്ടത്തെക്കുറിച്ചു പഠിച്ചിട്ടുണ്ടോ ? മാർജാര വിശാരദ ശാസ്ത്രപ്രകാരം പന്ത്രണ്ടു തരം നോട്ടങ്ങൾ പൂച്ചക്കുണ്ട്. ഇത്രയും തരം നോട്ടങ്ങൾ ഉള്ള വേറൊരു ജീവിയെ ഭൂമുഖത്തുള്ളു- അത് സ്ത്രീയാണ് ...ഈ നോട്ടങ്ങൾ അറിഞ്ഞു പ്രതികരിച്ചില്ലെങ്കിൽ ജീവ നഷ്ടം, മാന നഷ്ടം, ധാതുക്ഷയം തുടങ്ങിയവ സംഭവിക്കാൻ സാധ്യതയുണ്ട്. ഇതാണ് ഇവർ തമ്മിലുള്ള ഒരു സാമ്യം. “

ഗുരുവിന്റെ തലക്ക് ചുറ്റും വെട്ടമുള്ള ഒരു വളയം ഉണ്ടോയെന്ന് ഞാൻ ഓട്ടക്കണ്ണിട്ടു ഒറ്റ നോട്ടം നോക്കി.

“നീ പൂച്ചയെ നിരീക്ഷിക്കാറുണ്ടോ ശിഷ്യാ ? ആദ്യം പൂച്ച നമ്മെ കാണുമ്പോൾ തന്നെ ഓടും...ദൂരെ മാറി നിന്ന് നമ്മുടെ ഓരോ നീക്കവും നിരീക്ഷിക്കും .എന്നാൽ പൂച്ചയുമായി അടുത്ത് കഴിഞ്ഞാൽ പിന്നെ പുറം കാല് കൊണ്ട് തട്ടി മാറ്റിയാൽ വരെ അത് പോകില്ല. കാലിൽ മുഖമുരസി ചിണുങ്ങി ചിണുങ്ങി ചുറ്റിക്കളിക്കും. അതുപോലെയാണ് സ്ത്രീ ..."

പൂച്ച പഴയ പൂച്ച തന്നെയായിരിക്കും. എന്നാൽ ഇങ്ങിനെയുള്ള പെണ്ണൊക്കെ ഇപ്പോഴുമുണ്ടോ? ഇന്ന് രാവിലെ കെട്ട്യോൾ നോക്കിയ ആ നോട്ടം ഈ പന്ത്രണ്ടിൽ ഏതായിരിക്കും? പതിനഞ്ചു കൊല്ലമായിട്ടും അവളുടെ ചില നോട്ടങ്ങൾ ഇതുവരെ എനിക്ക് ഡീകോഡ് ചെയ്യാൻ പറ്റിയിട്ടില്ല.. ഈ ഗുരുവിനെ കിട്ടിയത് പുണ്യം.

"നീ ഇപ്പോൾ ചിന്തിക്കുന്നുണ്ടാവും ഇതൊക്കെ പഠിച്ചിട്ട് എന്താണെന്ന് അല്ലെ?.. മന്ദ ബുദ്ധീ, അവരുടെ കണ്ണുകളിലാണ് അവരുടെ മനസ്സു മുഴുവൻ ഉള്ളത്..അത് നാം തിരിച്ചറിഞ്ഞാൽ നാം വരച്ച ലക്ഷ്മണ രേഖയിൽ അവർ കുടുങ്ങിക്കിടക്കും."

"ഇനി അടുത്ത സാമ്യം പറയാം... നീ പൂച്ചക്ക് ചോറാണ് നിത്യവും ഭക്ഷണമായി കൊടുക്കുന്നത് എന്ന് കരുതുക.. ഇഷ്ടം മൂത്ത് നാലഞ്ച് ദിവസം നുറുക്കിയ ഇറച്ചിയും പാലും കൊടുത്തു എന്നും വിചാരിക്കുക. പിന്നെ നീ ചോറ് കൊടുത്താൽ ചോറ് തൊട്ടു നോക്കാതെ പൂച്ച പിണങ്ങി, നിലത്തു കിടന്നുരുണ്ട് ഇടം കണ്ണിട്ട് നോക്കി ഒരു സങ്കടക്കരച്ചിൽ കരയും.”

"അതും കെട്ട്യോളും തമ്മിൽ എന്താ ബന്ധം ഗുരോ ?! "

"എടാ ...ശിഷ്യാ...നീ ഒരു ദിവസം ഒരു മൂഡിൽ ഭാര്യയെ പതിവ് വിട്ടു അങ്ങട്ട് നല്ലോണം സ്നേഹിച്ചു എന്ന് കരുതുക --"

"ഫോർ എക്സാമ്പിൾ.." നിഷ്കളങ്കനായ ഞാൻ ഇടക്ക് കയറി ചോദിച്ചു.

"മന്ദബുദ്ധി....ഉദാഹരണത്തിന്, നീ അവളെയും കൂട്ടി നഗരത്തിലെ ഏറ്റവും നല്ല ഒരു ഷോപ്പിംഗ് മാളിലേക്ക് പോകുന്നു - അല്ലെങ്കിൽ പേരു കേട്ട ഒരു ഹോട്ടലിലേക്ക്.. അതുമല്ലെങ്കിൽ ഒരു ബോട്ട് യാത്രക്ക് പോകുന്നു.."

പാന്റിന്റെ പോക്കറ്റിൽ നിന്നും ചാടാൻ പോകുന്ന നരച്ച നോട്ടുകൾ ഞാൻ മുറുക്കെ പിടിച്ചു ചോദിച്ചു :

"ഓപ്ഷൻ ഉണ്ടോ ഗുരോ "

"ഉം... ഒന്ന് - അവൾക്ക് വേണ്ടി ഒരു കഥ പറഞ്ഞു കൊടുക്കുക, രണ്ട്- അടുക്കളയിൽ സഹായിക്കുക, മൂന്ന് - സാധാരണ കൊടുക്കുന്ന നെറ്റിയിലെ ഉമ്മക്ക് പകരം കൺപോളക്ക് മുകളിലോ കണങ്കാലിന് താഴെയോ ഒരു മുത്തം കൊടുക്കുക..നാല് - "

"അത് മതി...പിന്നെ ഇതൊന്നും കിട്ടാതിരുന്നാൽ അവളും പിണങ്ങും ല്ലേ ? ഇതൊക്കെ നമുക്ക് ദിവസം ചെയ്യാൻ പറ്റുമോ ഗുരോ ? "

"അതിനാണല്ലോ അവരെ വരച്ച വരയിൽ നിർത്തിക്കാൻ വേണ്ട ടിപ്സ് ഞാൻ നിനക്ക് തരാൻ പോകുന്നത്"

ഹോ...ഈ ഗുരുവിനെ കിട്ടിയത് കൊണ്ട് എന്റെ ബാക്കിയുള്ള ജീവിതമെങ്കിലും ടെൻസ്-ഫ്രീ ആയിക്കിട്ടും.

പെട്ടെന്നാണ് ഗുരുവിന്റെ ഫോൺ റിങ് ചെയ്തത്..

ഫോൺ എടുത്ത് ഗുരു എഴുന്നേറ്റു - മുഖത്ത് അങ്കലാപ്പ്.. രണ്ട് വാക്കേ ഗുരു പറഞ്ഞുള്ളൂ.

"പെട്ടെന്ന് എത്താം....ദാ...വരുന്നുണ്ട് "

"എന്താ ഗുരോ?" ഞാൻ വേവലാതിയോടെ ചോദിച്ചു

"ഭാര്യ വിളിച്ചതാ..കറിക്കുള്ള സാധനങ്ങൾ വാങ്ങാൻ എന്നെ പറഞ്ഞയച്ചതായിരുന്നു അവൾ ..മറന്നു…ഇന്ന് മുഴു പട്ടിണിയായിപ്പോകും - ബാക്കി പിന്നെ ചർച്ച ചെയ്യാം ശിഷ്യാ.."

അയ്യോ! അമ്മേ! ഇപ്പോഴാ ഓർമ വന്നത് ! കെട്ട്യോൾ എന്നെ ഒരു കോഴി വാങ്ങിക്കാൻ അയച്ചതാ. സമയം ഉച്ചയായി.. കത്തിയുമായി അവൾ കാത്തു നിൽക്കുന്നുണ്ടാവും..

ചർച്ച നാളെ തുടരാം. അതിനു ഗുരു തന്നെ വേണം..ശിഷ്യനായി ഞാൻ അവസാന ശ്വാസം വരെ എന്നും ഒപ്പമുണ്ടാകും. പക്ഷെ...ഭാര്യ പിണങ്ങിയാൽ? ഹോ ..ആധിയാണ് ..വേവലാതിയാണ് (പേടി അല്ല ട്ടാ). പക്ഷെ അത് അവളോടും ഗുരുവിനോടും പറയാൻ പറ്റുമോ?

പിന്നെ ഒരു ഓട്ടമായിരുന്നു. എതിർ ദിശയിൽ നിന്നും പച്ചക്കറിയുമായി ഓടുന്ന ഗുരുവിനെ ഞാൻ നോക്കി - കണ്ണുകളിൽ തന്നെ.. ആ കണ്ണുകളിൽ പന്ത്രണ്ടു തരം പേടിയും കണ്ടു..

(ഹാരിസ്)