ഓർമ്മയുണ്ടോ

( ജോളി ചക്രമാക്കിൽ )

ഡിഗ്രി പഠനം കഴിഞ്ഞ് ജോലിയ്ക്ക് ശ്രമിച്ചുകൊണ്ടിരിക്കുന്നതിൻ്റെ
ഇടവേളയിലാണ് ഒരു സുഹൃത്ത് മിഠായിത്തെരുവിലുള്ള ഒരു ജൗളിക്കടയിൽ
സെയിൽസ്മാനായി ദിവസക്കൂലിയ്ക്ക് ചേരുന്നത്

കാര്യമായ കച്ചവടമൊന്നുമില്ലെങ്കിലും മുൻപ് കച്ചവടം കൊടിപറത്തി വാണ പഴയകാല കടകളിലൊന്നായിരുന്നു അത് .
വിറ്റൽ റാവു & കമ്പനി
ഇപ്പോൾ പഴയ പ്രതാപമൊക്കെ അയവിറക്കി
മുണ്ട് ,തോർത്തുമുണ്ട്, കള്ളിമുണ്ട് ,ബനിയൻ ,ജട്ടി ,ചില്ലറ ഷർട്ടു പീസുകൾ എന്നിവയിൽ കേന്ദ്രീകരിച്ചുള്ള കച്ചവടം മാത്രം നടക്കുന്നു
വിരലിലെണ്ണാവുന്ന തൊഴിലാളികൾ മാത്രമേ അവിടെയുള്ളൂ
പീടികയുടെ അത്രത്തോളം പഴക്കമുള്ളവരാണ് ഈ തൊഴിലാളികൾ
ചില അടൂർ സിനിമകളെ ഓർമ്മപ്പെടുത്തുന്ന തരത്തിലുള്ള രംഗസംവിധാനവും ചേഷ്ടകളും
ഇവരുടെ ഇടയിലേയ്ക്കാണ് സുഹൃത്തിൻ്റെ രംഗപ്രവേശം
രാവിലെ കട തുറന്ന് അടയ്ക്കുന്നതു വരെ
തുണികൾ വാരിവലിച്ചിട്ടു പ്രദർശിപ്പിക്കാനുള്ള വലിയ മേശയ്ക്കുപുറകിൽ നിൽക്കണം ഇരിക്കാൻ അനുവാദമില്ല
അങ്ങിനെ പല പോസുകളിൽ നിൽക്കുന്ന സമയത്ത് അനുവാദമില്ലാതെ കേറി വരുന്ന കോട്ടുവായ വായുവിലേയ്ക്ക് ഒന്നിനു പുറകെ ഒന്നായി വിടുന്നതാണു് ആകെയുള്ള
നേരംപോക്ക്
കോട്ടുവായക്ക് ഒരു പ്രത്യേകതയുണ്ട്
അതു പകരും
ഒരാൾ കോട്ടുവായ ഇടാൻ തുടങ്ങിയാൽ
അടുത്തയാളും, കണ്ടു നിൽക്കുന്ന ആളും
ആ വഴിയെ പോവുന്ന ആൾ അറിയാതൊന്നു തിരിഞ്ഞു നോക്കിയാൽ അയാളും യാന്ത്രികമായ് കോട്ടുവായ ചങ്ങലയിൽ വായകോർക്കും
അങ്ങനെ ഒരു ദിവസം മാനേജർ കം കാഷ്യർ തുടങ്ങി വച്ച കോട്ടുവായക്ക് അകമ്പടിയായി
ഒരു വലിയ കോട്ടുവായ അന്തരീക്ഷത്തിൽ സ്വതന്ത്രമാക്കി കണ്ണുതുറന്നപ്പോൾ
മുന്നിൽ ഏതാണ്ട് സുഹൃത്തിൻ്റെ സമപ്രായമുള്ള
ഒരു ചെറുപ്പക്കാരൻ മുന്നിൽ നിൽക്കുന്നു
ഒരു ചെറിയ ചിരിയോടെ

''ഓർമ്മയുണ്ടോ ...? "
എത്ര ആലോചിച്ചിട്ടും ഒരു വിധത്തിലുള്ള ഓർമ്മയും കിട്ടുന്നില്ല
ഇല്ലല്ലോ ..!
ഇല്ലേ ....?
ഇവിടെ ജോലിയ്ക്ക് കയറിയ ശേഷം കൂടെ പഠിച്ച പലരും വരികയും ഓർമ്മ പുതുക്കി പോവുകയും ചെയ്തിട്ടുണ്ട്
ഇതിപ്പോ ഒട്ടും അങ്ങട് പിടുത്തം കിട്ടുന്നില്ല
ഒരു വല്ലാത്ത ചമ്മലോടെ അയാളുടെ കൈകവർന്നുകൊണ്ട് ഇങ്ങിനെ പറഞ്ഞു
ഓർമ്മയില്ലാട്ടാ
ആ സമയത്താണ് അഞ്ചാറു ചായ
പട്ടവളച്ചുണ്ടാക്കിയ ട്രേയിൽ എടുത്ത്
അടുത്ത ഹോട്ടലിലെ പയ്യൻ കടന്നു വന്നത്
'ടേയ് , ഒരു ചായ കൂടി താ
എന്നിട്ട് ആ ചായ ആൾക്കു കൊടുത്തുകൊണ്ടു പറഞ്ഞു
' ഒന്നും വിചാരിക്കരുത് ...സോറി...
" ഓർമ്മ തീരെ കിട്ടാഞ്ഞിട്ടാട്ടോ ...''
എവിടയാ പഠിച്ചത് ..! ദേവഗിരി ...?!

ഞാനോ ? ഞാൻ കൃസ്ത്യൻ കോളേജ് ..

പിന്നെ എവിടുന്നാണ് പരിചയം എന്നാലോചിച്ചു കൊണ്ടിരിക്കെ
ദേവഗിരി പതുക്കെ ചായ ഗ്ലാസ്സ് താഴെ വച്ചിട്ടു
ചോദിച്ചു
ആയിഷ യുണ്ടോ ..?

ഒരുമിനിറ്റേ '''

നേരത്തെയുണ്ടായിരുന്ന ഏതെങ്കിലും
സേയിൽസ് ഗേൾ ആയിരിക്കും എന്ന
നിഗമനത്തിൽ അകത്തുള്ള
സീനിയർ മോസ്റ്റ് കുമാരേട്ടനെ
വിളിച്ചു വരുത്തി .
കുമാരേട്ടനെ കണ്ടതോടെ
ആൾ ചോദ്യം ആവർത്തിച്ചു

" ആയിഷയുണ്ടോ..?

" ആയിഷ വീതിയുള്ളത് ഇപ്പ വരണില്ല ''

''ഓർമ്മയുണ്ട് ''
കുമാരേട്ടൻ സുഹൃത്തിൻ്റെ തലയ്ക്കു മുകളിലെ
റാക്കിൽ നിന്നും ഓർമ്മയുടെ പെട്ടി എടുത്ത്
മേശപ്പുറത്ത് വച്ച ശേഷം ചോദിച്ചു
ഏതാ സൈസ് ..

2019 - 04 - 29
( ജോളി ചക്രമാക്കിൽ )