ബൈക്ക്

കാറ്റിന്റെ വേഗതയിൽ മൂളിപ്പാഞ്ഞ് പോയ ബൈക്കുകളെ നോക്കി രണ്ട് വയസൻമാരും ആകുലതപ്പെട്ടു .

"വാങ്ങിച്ച് കൊടുത്തിലെങ്കിൽ തൂങ്ങിച്ചാകുമെന്നാ ചെക്കൻ പറയണെ "

ഒന്നാമൻ വിഷമിച്ചു .

"വാങ്ങി കൊടുക്കണതാ നല്ലത് ..."

രണ്ടാമൻ പറഞ്ഞു .

"എന്തേയ് .. "

"ഹേയ് ..... ഇൻഷ്വറൻസേലും കിട്ടൂലോ "

ഒന്നാമൻ ഞെട്ടി .

രണ്ടാമന്റെ മനസ്സിൽ മൂന്ന് വർഷം മുൻപ് ഉത്തരത്തിൽ തൂങ്ങിയാടിയ ഏക മകനായിരുന്നു .

അതോടെ മാനസിക രോഗി ആയി മാറിയ ഭാര്യയ്ക്കുള്ള മരുന്ന് വാങ്ങാൻ പോക്കറ്റിലവശേഷിച്ച മുഷിഞ്ഞ നോട്ടുകളെ അയാൾ ചേർത്തു പിടിച്ചു .

Dr. ശാലിനി