അനന്താനന്ദാന്വേഷണം. - 13

അനന്താനന്ദാന്വേഷണം.
^^^^^^^^^^^^^^^^^^^^^^
ക്ഷീരധാരാ പ്രാർത്ഥനയ്ക്കുശേഷം
ജനിജൻ നിലവറയിൽ പ്രവേശിച്ചിട്ട്
ഇന്ന് ഇരുപത്തിഒന്നാം നാൾ

നിലവറക്കിണറിൽ നിന്ന്,
പഞ്ചശിരസ്സ് കൊത്തിയ എണ്ണത്തോണി
പതിയെ ഉയർന്നുവരുന്നു
സഹായികളായെത്തിയവർ
കാര്യങ്ങൾ ഏറ്റെടുത്തുകഴിഞ്ഞു

നിലവറമധ്യത്തിലേക്ക് എണ്ണത്തോണി
കയറിട്ട് വലിച്ചുകയറ്റുകയാണ്.
നൂറ്റാണ്ടുകളുടെ പഴക്കംകൊണ്ട്
കരിവീട്ടിപോലെ കറുത്തഴകാർന്ന
എണ്ണയുടെ മിനുമിനുപ്പ് വെളിച്ചംഅടിച്ച്
തിളക്കംപകർന്നു.
അസാധാരണമായ ഒരു മൗനം എല്ലാവരേയും ബാധിച്ചിരിക്കുന്നു
അത്യപൂർവ്വമായ താളിയോലകൾ
തിരഞ്ഞെടുത്ത്
തോമസ്ജോൺ ജനിജന് കൈമാറിക്കൊണ്ടിരുന്നു
ധ്യാനാവസ്ഥയിൽ ഓരോ കർമ്മങ്ങളുടെയും പ്രയോഗവിന്യാസങ്ങൾ
ജനിജൻ മനസ്സിലുരുവിട്ടുകൊണ്ടിരുന്നു,

മുഖാവരണത്തിനുവേണ്ടി എത്തിച്ച
ചമതയിലകൾ പരിപൂർണ്ണമായി
പരിശോധിച്ച് കൃമികീട മുക്തമെന്ന്
ഉറപ്പുവരുത്തി എണ്ണത്തോണിയുടെ
വലത്തു തലയ്ക്കൽ
എടുത്തുവച്ചിരിക്കുന്നു
പ്രാർത്ഥനാപൂർവ്വം തോണിയിലേക്ക്
എണ്ണപകരൽ ആരംഭിച്ചു
ധാരധാരയായി തടസ്സമില്ലാതെ
ഒരാത്മാക്കളും കേൾക്കാത്തവിധം
നിശബ്ദമായി ഒരു കുമിളപോലുമുയരാതെ,
കത്തിച്ചുവച്ച അഞ്ചുതിരിവിളക്കിനെ
പഞ്ചഭൂത പഞ്ചേന്ദ്രിയ പ്രതീകമായി
സാക്ഷി നിർത്തി
എണ്ണപകരൽ തുടരുകയാണ്
° ° °
മുത്തേടൻ തന്റെ ഒരുക്കങ്ങൾ പൂർത്തിയാക്കിയിരിക്കുന്നു
ഇനി ചെമ്പിനുമുകളിൽ
വാഴനാര് വല ഉറപ്പിക്കൽ മാത്രമാണ് അവശേഷിക്കുന്നത്
തോമസ്ജോൺ എല്ലാ സഹായവുമായി
കൂടെയുണ്ട് പക്ഷേ പറയുന്നതിനപ്പുറം
ഒന്നിലും തൊടാൻപോലും
മുത്തേടൻ സമ്മതിക്കുന്നില്ല

കുഞ്ഞ് അതിൽ തൊടണ്ട എന്ന്
പറയുമ്പോൾ
അറിയാതൊരു ഭയം ഉള്ളിലേക്ക്
അരിച്ചുകയറുന്നത് അനുഭവപ്പെടുകയാണ്,
ജനിച്ചനാൾമുതൽ കാണുകയും
കൂട്ടുകാരെപ്പോലെ കഴിയുകയും ചെയ്ത
മനുഷ്യന്റെ കണ്ണിൽ ഇന്നുവരെ കാണാത്ത
തിളക്കം കണ്ട് തോമസ്ജോണിന്റെ മനസ്സ്
പതറിപ്പോകുന്നു
അനുദിനം മാറിയിടുന്ന
ക്ഷീരനദീജലസംയുക്തം
ഇന്നുമുതൽ അനക്കമില്ലാതെ കിടക്കണം
പാലിൽ പരന്നുകിടക്കുന്ന വിധത്തിൽ
വാഴനാര് വല
ചുറ്റോടുചുറ്റും വാഴപ്പോളകൊണ്ട്
കെട്ടിയുറപ്പിക്കുകയാണ്.

മുത്തേടൻ
എന്തോ ഒരു ശക്തി തന്നിൽ ആവേശിച്ചതുപോലെ സ്വയംമറന്ന്
ഓരോ കർമ്മവും മന്ത്രസിദ്ധിയാലെന്നപോലെ
തികഞ്ഞ സാധനയായി ചെയ്യുകയാണ്.

ഇന്ന് ഇരുപത്തിഒന്നാം ദിവസമാണ്
അടുത്ത ഏഴുദിവസങ്ങൾ
അതിപ്രധാനം
മുത്തേടൻ മൗനമായി ഇരുന്ന്
കളമെഴുതിയിട്ടത് വീണ്ടും തെളിച്ചുകൊണ്ടിരുന്നു,

എന്തൊക്കെ സംഭവിക്കും എന്ന വ്യക്തത
ഇല്ലാതെ തോമസ്ജോൺ
ബന്ധനപ്പുരയ്ക്ക് പുറത്ത്
ചിന്താഭാരത്തോടെ ഉലാത്തുകയാണ്.
° ° °
കാമറയിൽ അത്ഭുതംവിരിയിക്കുന്ന
അനീഷും സഹായികളും
രണ്ട് ദിവസമായി തോമസ്ജോണിന്റെ വീട്ടിലെത്തിയിട്ട്
പുറത്തേക്ക് തുറസ്സുകളില്ലാത്ത ഒരു മുറി
സ്റ്റുഡിയോ റൂമായി രൂപമാറ്റം വരുത്തുകയാണവർ
ആത്മാവിന്റെ കാഴ്ചയുംചിന്തയും
ഒരുപോലെ ദൃശ്യമാകാൻ
വലിയൊരു ടിവി സജ്ജീകരിച്ചിരിക്കുന്നു
റൂമിന്റെ എയർപോയിന്റുകളും ലൈറ്റ് പോയിന്റുകളും പരിപൂർണ്ണമായി
സീൽചെയ്ത് ആൽബംകാർഡ് അടിച്ച്
ഡാർക്ക് റൂം സെറ്റ് ചെയ്തിരിക്കുന്നു.

സന്ധ്യയോടെ ജോമിയും എത്തിയതോടെ
തോമസ്ജോൺ തളർച്ച മറന്ന്
കാര്യങ്ങളൊക്കെ വിവരിച്ചു,

ജോമി ഏൽപിച്ചിരുന്ന ബ്രെയിൻ റീഡർ
സിസ്റ്റവുമായി കണക്ട് ചെയ്ത്
ഓണാക്കി.
അനീഷ് അതിന്റെ
ക്യാച്ചിംഗ് നോബുകൾ തന്റെ
ശിരസ്സിലേക്ക് പതിപ്പിച്ചു

ടി.വി. സ്ക്രീനിൽ അവ്യക്തമായ
ചിത്രങ്ങൾ തെളിഞ്ഞുവന്നു
മൗനം തിങ്ങിനിന്ന അന്തരീക്ഷം
പെട്ടെന്ന് സന്തോഷം പകർന്ന ചിരിയിലേക്ക് തെളിഞ്ഞുവന്നു.
തുടരും.

VG Vassan