പഴുതാര

പഴുതാര
..............

കോളേജിലെ ഫോർത് സെമസ്റ്ററിലെ ഇംഗ്ലീഷ് " poetry " എക്സാം നടക്കുന്ന സമയം.
ഞാനും എന്റെ അഞ്ചു ചങ്ക്‌സും അരക്കെട്ടിലെ ബെൽറ്റിലും ജീൻസിന്റെ പോക്കെറ്റിലുമായി കോപ്പി കഷണങ്ങൾ വെടിയുണ്ട കണക്കു നിറച്ചു ഹാളിലേക്ക് വരുകയായിരുന്നു. ഹാളിലേക്കു കയറിയ ഞങ്ങളുടെ കണ്ണുകളിൽ പെട്ടെന്നു ഇരുട്ടു കയറി എന്നു തന്നെ പറയാം. കാരണം വേറെ ഒന്നുമല്ല, ഇന്നലെ വരെ ഇരുന്നു പരീക്ഷ എഴുതിയ സ്ഥാനങ്ങൾ മാറിയിരിക്കുന്നു,
പോരാത്തതിനു എന്റെ സ്ഥാനം മുന്നിലെ ബഞ്ചിൽ തന്നെ കിട്ടിയിരിക്കുന്നു.

ഇന്നത്തെ എക്സാം കട്ട പൊഗ. ******

ഞാനൊഴികെ മറ്റു അഞ്ചു പേരും ഹാളിന്റെ പല വശത്തായി ഇരുപ്പുറപ്പിച്ചു. മുന്നിലെ ബഞ്ചിൽ ഇരുന്നു എക്സാം എഴുതുന്നതിലും ഭേദം അങ്ങു മുങ്ങുക എന്നു തോന്നിയപ്പോൾ ബാക്കിലെ ഡോർ വഴി ഇറങ്ങാൻ നോക്കിയതും.

ഹലോ ഇതെവിടേക്ക് പോകുന്നു'"

ഞാൻ തിരിഞ്ഞൊന്നു നോക്കി,

ഫിസിക്സ്‌ ഡിപ്പാർമെന്റിലെ ജൂനിയർ ലെക്ചർ "കവിത സുബ്രമണ്യം '"

അല്ല പേന എടുക്കാൻ മറന്നു മിസ്സ് '"

തന്റെ പോക്കെറ്റിൽ പിന്നെ എന്താ പേനയല്ലേ "

ഇളിഭ്യനായി ഞാൻ പോക്കെറ്റ് തപ്പിക്കൊണ്ട് സീറ്റിലേക്കു വന്നടുത്തപ്പോൾ എന്റെ ചങ്കുകൾ എല്ലാം വായ പൊത്തി ചിരിക്കുകയായിരുന്നു.

എന്റെ വരവ് കണ്ടു മുന്നിലെ ബഞ്ചിലെ എന്റെ അപ്പുറത്തും ഇപ്പുറത്തും ഇരിക്കുന്ന രണ്ടു പെൺകുട്ടികൾ ഇരുവശത്തേക്കും നീങ്ങി എനിക്കു സ്ഥലം തന്നു.

ഹോ ഇവറ്റകൾക്ക് ഇങ്ങനെ നീങ്ങിയിരിക്കാതെ കുറച്ചു അടുത്തിരുന്നാൽ എന്താ കുഴപ്പം എന്നു ഞാൻ മനസ്സിൽ ഒന്നു പറഞ്ഞു.

ഏതായാലും രണ്ടും സുന്ദരി കോതകൾ തന്നെ,, ബഹുരസം ഉണ്ട് രണ്ടിനെയും കാണാൻ.

ഏതായാലും എക്സാമിന്‌ പൊട്ടും എങ്കിൽ കുറച്ചു നേരം ഇവരുടെ കൂടെ അങ്ങു ഇരുന്നിട്ട് പോകാം.

അങ്ങനെ എക്സാം തുടങ്ങി. എന്റെ പേപ്പറിൽ ഞാൻ ഒന്നും തന്നെ എഴുതിയില്ല.
Question പേപ്പറിൽ ഉള്ളം കയ്യിലെ വിയർപ്പു പറ്റി തുടങ്ങി. ഇടക്കൊന്നു ചങ്കുകളെ തിരിഞ്ഞൊന്നു നോക്കിയപ്പോൾ ഒക്കെ തുണ്ട് പേപ്പർ വച്ചു പെരുക്കുന്നുണ്ട്.

മുന്നിലായതിനെ ഓർത്തു ഒരിക്കൽ കൂടി
ശപിച്ചു കൊണ്ടു ഞാൻ question പേപ്പർ ചുമ്മാ അങ്ങോട്ടും ഇങ്ങോട്ടും മറിച്ചു കൊണ്ടു ഒരിക്കലും കിട്ടാത്ത ഉത്തരത്തെ തല പുകഞ്ഞു ആലോചിക്കുന്ന മട്ടിലിരുന്നു.

എന്റെ ഇരുവശത്തും ഇരിക്കുന്ന സുന്ദരി കോതകൾ പേപ്പറിൽ ഒഴുക്കോടെ എഴുതുന്നത് കണ്ടു. തെല്ലൊരാമർഷം എനിക്കു അവറ്റകളോട് തോന്നി. ഒരുത്തൻ ഇവിടെ ഇരുന്നു ഒന്നും എഴുതാതെ അന്തം വിട്ടു കുന്തം വിഴുങ്ങി ഇരിക്കുമ്പോൾ പെണ്ണുങ്ങളുടെ ഒരെഴുത്. രണ്ടിന്റെയും കയ്യിൽ ഒറ്റ കുത്തങ്ങു വെച്ച് കൊടുക്കണം എന്നുണ്ടാർന്നു.

ഒന്നും എഴുതാതെ ചുമ്മ തലയൊന്നു വെട്ടിച്ചു അവരുടെ ഉത്തര കടലാസുകളിൽ വെറുതെ ഒന്നു പാളി നോക്കി. ഒരു കോതക്ക് ഫിസിക്സും മറ്റേ കോതക്ക് ബോട്ടണിയും ആണെന്ന് പിടി കിട്ടി.
എന്റെ നോട്ടം കണ്ടിട്ട് ആണെന്ന് തോന്നുന്നു ഇടതു വശത്തെ പെണ്ണ് കൈ വച്ചു മറച്ചു പിടിക്കുന്നു. ശേ " മൂന്നു പേർക്കും മൂന്നു വിഷയം ആണ് പിന്നെ എന്തിനാണ് ഈ പെണ്ണിങ്ങനെ ഒരു കൈ വച്ചു മറച്ചു പി ടിക്കുന്നത്. ആ പെണ്ണുങ്ങൾ അല്ലെ ജാതി '"കുശുമ്പ്, കുശുമ്പ് '".അരയിലുള്ള ഒരു കെട്ടു കോപ്പിയെടുത്തു ഇവളുമാരുടെ പേപ്പറിന്റെ അടിയിൽ വച്ചു രണ്ടെണ്ണത്തിനെയും അങ്ങു പിടിപ്പിക്കണം,.മരക്കഴുതകൾ അതും പഠിപ്പിസ്റ്റുകൾ.

സമയം ഒരു മണിക്കൂർ പിന്നിട്ടിരിക്കുന്നു.
എക്സാം തീരുവാൻ ഇനിയും ഒന്നര മണിക്കൂർ കൂടി കഴിയണം.
ഞാനൊന്നുടെ തിരിഞ്ഞൊന്നു നോക്കി അവന്മ്മാര് അഞ്ചും ഒടുക്കത്തെ എഴുത്തു തന്നെ. അവരുടെ എഴുത്തു കണ്ടപ്പോൾ എനിക്കു സഹിക്കാൻ കഴിഞ്ഞില്ല. മുന്നിലിരിക്കുന്ന എനിക്കു കോപ്പി ഒന്നനക്കാൻ പോലും കഴിയുന്നില്ല.
അരക്കെട്ടിലിരുന്നു കോപ്പി തുണ്ടുകൾ പുറം ലോകം കാണാനായി വെമ്പൽ കൊള്ളുന്നുണ്ടായിരുന്നു.

എങ്ങാനും കോപ്പി അടിച്ചു പിടിക്കുകയാണെങ്കിൽ മാനം പോയത്‌ തന്നെ. അതും ഹാളിൽ ഭൂരിഭാഗം പെൺകുട്ടികൾ ആണ്, പോരാത്തതിനു ഏറ്റവും പുറകിൽ ഇരിക്കുന്ന അമ്മു നാട്ടുകാരി കൂടിയാണ് അപ്പൊ മൊത്തം നാറും എന്നതിൽ ഒരു സംശയവും വേണ്ട.
കയ്യിൽ ജയിക്കാനുള്ള ഒരു കെട്ടു കോപ്പിയുണ്ട് പക്ഷെ എന്താ പ്രയോജനം. ഞാവല് പഴുത്തപ്പോൾ കാക്കക്കു വായ് പുണ്ണ് തന്നെ.

"അനീഷേ സമയം ഇനിയും വൈകിയിട്ടില്ല
ഇപ്പോഴും നിനക്കു ജയിക്കാൻ കഴിയും "

ഉള്ളിൽ ഇരുന്നു ആരോ മന്ത്രിക്കുന്നത് പോലെ എനിക്കു തോന്നി.

'"ആരെ നീ ഭയക്കുന്നത് എടുത്തു പെരുക്കു മോനേ ജയം നിന്റെ കൂടെ. '"

വീണ്ടും എന്റെ ഉള്ളിലിരുന്നു അവൻ ശക്തിയായി മന്ത്രിച്ചു.

അതെ ഞാൻ ആരെ ഭയക്കണം.
എനിക്കു ജയിച്ചേ മതിയാകു.

ഹോ ഈ സമയത്തു തന്നെ എനിക്കു നല്ലൊരു മോട്ടിവേഷൻ തന്ന എന്റെ ഉള്ളിലിരിക്കുന്ന എന്നോട് തന്നെ ഞാൻ നന്ദി പറഞ്ഞു.

ചുറ്റും നോക്കി ഹാളിലാകെ വല്ലാത്തൊരു നിശബ്ദത പടർന്നിരിക്കുന്നു. കവിത ടീച്ചർ ഏതോ ഒരു ബുക്കും പിടിച്ചു ജനലരികിൽ നിൽപ്പുണ്ട്.
ആരും ഇതുവരെ കുഴപ്പം ഒന്നും കാണിക്കാത്തത് കൊണ്ടാണ് എന്നു തോന്നുന്നു ടീച്ചറും അധികം ആരെ ശ്രദ്ധിക്കുന്നില്ല.
ഇതു തന്നെ അവസരം, ഞാൻ പിന്നോട്ടൊന്നു ആഞ്ഞു ഒന്നു കുനിഞ്ഞു ഇടതു കയ്യ് ബഞ്ചിൽ കുത്തി,ശേഷം വായുവിലൂടെ നേരെ ഷർട്ട്‌ ഒന്നു പൊന്തിച്ചു ചൂണ്ടാണി വിരൽ കൊണ്ടു ഒരു കെട്ടു കോപ്പി ഉള്ളം കയ്യിലാക്കി സുരക്ഷിതമായി question പേപ്പറിന്റെ അടിയിലെത്തിച്ചു.

എന്റെ ഈ സാഹസം എന്തോ എന്റെ വലതു വശത്തിരുന്നവൾക്കു അത്രേ പിടിച്ചില്ല, അവൾ ചാണകത്തിൽ ചവുട്ടിയ ഒരു ഭാവത്തോടെ എന്നെയൊന്നു നോക്കി. ഞാനും വിട്ടില്ല ഞാനും തിരിച്ചും കനപ്പിച്ചൊന്നു നോക്കി.
അല്ലെ അവളുടെ അപ്പന്റെ കോപ്പി ഒന്നുമല്ലല്ലോ, എന്റെ കോപ്പി എന്റെ എക്സാം, ഞാൻ എഴുതും നല്ല ഭംഗിയായി എഴുതും.

ഞാൻ എടുത്ത കോപ്പിയുടെ കെട്ടിൽ ഒരു ഇരുപത് കഷ്ണങ്ങൾ ഉണ്ട്. ഞാൻ അവയെല്ലാം ഓരോന്നും സൂക്ഷ്മം നോക്കി ഉത്തരക്കടലാസിൽ പകർത്തുമ്പോൾ ആണ്,

ടീച്ചർ അഡിഷണൽ ഷീറ്റ്. '"

എന്റെ അടുത്തിരുന്നവളിൽ ഒരുവൾ വിളിച്ചു കൂവി.

വെടിയുണ്ട കണക്കെ ടീച്ചർ പാഞ്ഞു വരുന്നു.

ഹോ മേലാസകലം ഒരു വിറയൽ ഉണ്ടായിരുന്നെങ്കിലും തെല്ലിട സംശയം കൊടുക്കാതെ ഞാൻ കോപ്പിയോക്കെ ഭദ്രമായി തന്നെ ഇരുത്തി.

അഡിഷണൽ ഷീറ്റ് വാങ്ങിയ ആ പിശാശിനെ ഞാനൊന്നു ഇരുത്തി നോക്കി. അവളെന്നെ നോക്കാതെ വീണ്ടും എഴുത്താരംഭിച്ചു.

ഏതവനാട ഈ അഡിഷണൽ ഷീറ്റ് കണ്ടുപിടിച്ചത് എന്നു മനസിൽ പ്രാകികൊണ്ട് ഞാൻ വീണ്ടും എഴുത്താരംഭിച്ചു.

അങ്ങനെ ജന്മസുകൃതം കൊണ്ടോ കാർന്നോൻമാരുടെ പുണ്യം കൊണ്ടോ ആദ്യത്തെ കോപ്പി ഞാൻ അങ്ങനെ വിജയകരമായി പൂർത്തിയാക്കി.

രണ്ടാമത്തെ കെട്ടു എടുക്കാൻ ഞാൻ വീണ്ടും ഒരു ശ്രമം നടത്തി. ഷർട്ട്‌ നൈസ് ആയിട്ടു പൊക്കി കോപ്പി കൈക്കുള്ളിലാക്കാൻ ഞാൻ നോക്കി. എന്റെ നിർഭാഗ്യം കൊണ്ടോ എന്തോ
ഒന്നിൽ പിടിച്ചു വലിച്ചപ്പോൾ ഒന്നിന്റെ കൂടെ മൂന്നു കെട്ടു എക്സ്ട്രാ പോന്നു. പുറകെ പോന്ന കെട്ടുകൾ മൂന്നും താഴേക്ക്‌ വീണു. കോപ്പി കെട്ടുകൾ വീണതും പെണ്ണുങ്ങൾ രണ്ടും എഴുത്തു നിർത്തി താഴേക്ക്‌ നോക്കി. ഞാൻ ഒന്നു ഇളിച്ചു കൊണ്ടു അവരെ ഇരുവരെയും നോക്കി. മുന്നിലെ ബഞ്ചിൽ എന്തോ പന്തികേട്‌ തോന്നിയ ടീച്ചർ ശരം വിട്ടത് പോലെ പുറകിൽ നിന്നു വരുന്നത് ഞാൻ കണ്ടു. കയ്യിലൊരു കെട്ടും താഴെ വീണ മൂന്നു കെട്ടും പിടിക്കപെടുമെന്നു തോന്നിയപ്പോൾ ഞാൻ വേറെ ഒന്നും നോക്കിയില്ല.

'"ദേ പഴുതാര '!

പഴുതാര എന്നു കേട്ടതും" അയ്യോ '
എന്നു പറഞ്ഞു ബഞ്ചും തട്ടി മറച്ചു സുന്ദരികോതകൾ രണ്ടും കൂടി ഇരുന്നിടത്തു നിന്നും വായുവിൽ കുതിച്ചു പൊങ്ങി.
ഈ സമയം തന്നെ എനിക്കു
അധികം വേണ്ടി വന്നില്ല, ഒരു നിമിഷം കൊണ്ടു താഴെ വീണ കോപ്പി കെട്ടുകളും കയ്യിലുണ്ടായിരുന്നതും കൂടി ഞാൻ ഉൾ ബനിയനിൽ ഇട്ടു അങ്ങോട്‌ എസ്‌കേപ്പ് ആയി.

എന്താ എന്തു പറ്റി '" ടീച്ചർ ഓടി വന്നു ചോദിച്ചു.

ബഞ്ചിൽ ഒരു പഴുതാരയെ കണ്ടു ടീച്ചറെ,
ഞാൻ തട്ടി വിട്ടു.

അതിനാണോ നിങ്ങൾ ഇങ്ങനെ ബഹളം വച്ചത് എന്നു പെണ്ണുങ്ങളോട് ടീച്ചർ ചോദിച്ചു.

ഞങ്ങൾ പേടിച്ചു പോയി മിസ്സ്. അവർ മറുപടി പറഞ്ഞു.

ഉം, അതു പോയിക്കാണും, നിങ്ങളിരുന്നു എഴുതാൻ നോക്കു.

തന്റെ പേപ്പർ ഒന്നു തന്നെ '"

എന്റെ ആൻസർ ഷീറ്റും question പേപ്പറും അടപടലം ടീച്ചർ അങ്ങു പരിശോധിച്ചു.

പെണ്ണുങ്ങൾ രണ്ടുപേരും പരസ്പരം തറയിൽ നോക്കിയിട്ടു എന്റെ മുഖത്തു നോക്കി.

ഞാൻ അവരെയൊന്നു നോക്കി '"ഏനിതൊന്നും അറിഞ്ഞതേയില്ലല്ലോ " എന്ന ഭാവം പൂണ്ടു.

സംശയാസ്പദമായി ഒന്നും കിട്ടാത്തത് കൊണ്ടു ടീച്ചർ എന്റെ ആൻസർ ഷീറ്റും question പേപ്പറും തിരികെ തന്നു.

രക്ഷപ്പെട്ടതിന്റെ ആശ്വാസത്തിൽ ഞാൻ ഇരുന്നു.

പഠിപ്പികൾ രണ്ടും പഴുതാര ഉണ്ടെന്ന ഭയത്തോടെ ചുറ്റും വീക്ഷിച്ചു കൊണ്ടു വീണ്ടും എഴുത്തു തുടങ്ങി.

ടീച്ചർ തിരികെ പോയ തക്കം നോക്കി ഞാൻ ജീൻസിന്റെ പോക്കെറ്റിൽ നിന്നും മറ്റൊരു കെട്ടെടുത്തു ആൻസർ ഷീറ്റിനു അടിയിലെത്തിച്ചു.

അങ്ങനെ കുറച്ചു വിഷമം നേരിട്ടെങ്കിലും വളെരയധികം ഭംഗിയായി എക്സാം എഴുതാൻ കഴിഞ്ഞു എന്നു പറയാം.

എക്സാം കഴിഞ്ഞു പുറത്തിറങ്ങിയപ്പോൾ പെണ്ണുങ്ങൾ രണ്ടും തൊട്ടപ്പുറത്തു മാറി നിന്നു ചുരിദാറിന്റെ ഷാൾ പരിശോധിക്കുന്നു,ചെവിയിൽ നോക്കുന്നു, ഒരുത്തി മറ്റൊരുത്തിയുടെ മുടിയുടെ ഇടയിൽ പരതി നോക്കുന്നു. അങ്ങനെ തകൃതി തന്നെ.

ഇല്ലാത്ത പഴുതാരയെ തപ്പി അവർ രണ്ടും ചികഞ്ഞു നിൽക്കുന്നത് കണ്ടപ്പോൾ ഞാൻ മനസ്സിൽ പറഞ്ഞു.

ഇന്നു 'പഴുതാര '" നാളെ ചിലപ്പോൾ ദിനോസറു വരെ ഉണ്ടാകും.

Aneesh. pt