അണ്ണാറക്കണ്ണൻ

^^^^^^^^^^^^^^^
ചെഞ്ചായം പൂശിയ ആകാശച്ചെരിവിലേക്ക്
വെറുതെ കണ്ണയച്ചു കിടന്നത് മനസ്സ് അസ്വസ്ഥമായതിനാലാണ് ഇപ്പോൾ അതൊന്നും പതിവില്ലാത്തതാണ്

മുറ്റത്ത് താഴെ പറമ്പിലെ ഒറ്റത്തെങ്ങ്
കാഴ്ചയുടെ നടുവിലാണെങ്കിലും
അതിൽ കണ്ണുടക്കുന്നേയില്ല
ഇരുപുറവും നിന്ന രണ്ട് തെങ്ങുകൾ
ഒറ്റയടിക്ക് ഇടിവെട്ടിപ്പോയിട്ടും
നടുവിൽ നിന്ന തെങ്ങ് ഒരടയാളമോ ഓർമ്മപ്പെടുത്തലോ പോലെ ഇന്ന് ഒറ്റതിരിഞ്ഞ് നിൽക്കുന്നു.

പ്രളയവേദന മലയിറങ്ങി കടലിലെത്തിയപ്പോൾ
മലകയറ്റത്തിന്റെ മാറാവേദന
ഉരുണ്ടു കയറി എത്തുന്നത് തലയ്ക്കു മുകളിൽ മൂളക്കം സൃഷ്ടിക്കൂന്നു
ഒന്നിനുമാകാത്ത നിശ്ചലാവസ്ഥ
കണ്ണുകളെ ഒരു തടവിൽ നിർത്തിയിരിക്കുകയാണ്
ഞാൻ ഉറങ്ങിയിട്ടില്ല ഉണർന്നിട്ടുമില്ല.

രണ്ട് അണ്ണാറക്കണ്ണന്മാർ തൊടിയിലൂടെ
ഓടിച്ചാടി കളിച്ചുവരുന്നത് ഞാൻ കാണുന്നുണ്ട്
അവ ഇണകളാണെന്ന് ചേഷ്ടകളിൽ
ചിൽ ചിൽ മൊഴിയുടെ
വാലിളക്കത്തിൽ എല്ലാം പ്രകടമാണ്

ഒരെണ്ണം ഓടി തെങ്ങിലേക്ക് കയറി
പിന്നാലെ അടുത്തതും
ഓടിയും പതുങ്ങിയും
അവ തെങ്ങോല കവിളിലെത്തി

ഒളിച്ചുകളിയുടെ രസഭാവങ്ങൾ
എനിക്കുപോലും ആസ്വദിക്കാൻ പറ്റി

പക്ഷേ
പിന്നീട് സംഭവിച്ചത്
കണ്ണിനും മനസ്സിനും പിടികിട്ടിയില്ല

കൂമ്പോലവഴി മുകളിലേക്ക് ഓടിയ
അണ്ണാറക്കണ്ണന്മാർ
ആകാശത്തേക്ക് ചാടി
വായുവിൽ മറഞ്ഞുപോയി

ഞാൻ ഞെട്ടിത്തരിച്ചു
ആകാശത്ത് അണ്ണാറക്കണ്ണന്മാർ എവിടെയെന്ന് കണ്ണടയ്ക്കാതെ നോക്കിയിരുന്നു

അൽപസമയം

അതാ രണ്ടു കാറുകൾ
വിമാനംപോലെ ആകാശത്തേക്ക്
ഓടിക്കയറുന്നൂ
ഒന്നിന്റെ മുൻഭാഗം പതിഞ്ഞതും
മറ്റൊന്ന് നീണ്ടതുമായിരുന്നു

അവയിലെ യാത്രക്കാർ
വളരെ വിലകൂടിയ മനോഹര വസ്ത്രം ധരിച്ചവരായിരുന്നു

ആ കാറുകളും ആകാശത്തു മറഞ്ഞുപോയി

എന്താണ് സംഭവിക്കുന്നതെന്ന്
അറിയാതെ ഞാൻ ആകെ ഭയന്നുപോയി

പതിയെപ്പതിയെ
ഞാൻ മനസ്സു ശാന്തമാക്കിയെടുത്തു
പക്ഷേ
അപ്പോൾ ആകാശത്ത്
രണ്ട് രക്തച്ചാലൂകൾ ഒഴുകിയിറങ്ങിവന്നു
അത് തെങ്ങോലകളിൽ മുഴുവൻ
തുള്ളികളായി പടർന്നുവീണു

VG.VAASSAN