കൊഴിഞ്ഞുപോകും കാലം

വിടപറഞ്ഞ നിമിഷങ്ങളോ-
ർമ്മകളായെത്തുമ്പോൾ
പ്രിയതമേ, നീയറിയുമോയെൻ
ഹൃദയമുരുകും നോവ്?

ഓരോദിനങ്ങളു,മോരോയുഗങ്ങളായ്,
ഓരോനിശ്വാസവും മിഴിനീരണിയു -
ന്നതും,ഓരോരാത്രിയിൽ
ഓരോകിനാക്കളെൻമനസ്സിനുള്ളിൽ
തേങ്ങലായ്,പുലരിയാവാൻ -
കാത്തിരുന്നതെത്രയോ രാവുകൾ

തിരികെയെത്തുവാനെന്നും
ആശയുള്ളിലെങ്കിലും
അറിയുന്നൂ പ്രിയസഖീ ഞാൻ,
പ്രാരാബ്ധക്കയ്പ്പുകൾ

അകലങ്ങളിലിരുന്നു നാം
പ്രണയം കൈയ്മാറുമ്പോളിരു-
ഹൃദയം ശ്രുതിചേർക്കും
നൽ ജീവിതസ്വപ്നങ്ങൾ.

ഈ,യൂഷരഭൂമിമേലേ,യൊ-
ഴുകിടുന്ന മേഘങ്ങൾപൊഴിക്കും
മഴത്തുള്ളികളിൽ വിരഹാർദ്രരാം
നമ്മുടെ പ്രണയമോഹദാഹങ്ങൾ.

തിരികെയെത്തിടുന്നു നിൻ
മിഴിനീർത്തുടയ്ക്കുവാൻ,
ചാരത്തിരുന്നു നിന്നെ
നെഞ്ചോടുച്ചേർക്കുവാൻ.

ബെന്നി .ടി .ജെ
26/11/2018