സൗഹൃദം:

പ്രിയമായിരുന്ന പ്രിയമിത്രമേ
നീയെന്നാണ് നിന്നിലേക്ക്
കയറിപ്പോയതെന്നോർക്കുന്നില്ല
അതല്ലെങ്കിൽ ഞാനായിരുന്നോ
എന്നിലേക്കിറങ്ങി പോന്നത്

എന്റെ പയ്യാരംപറച്ചിലുകളും
നിന്റെ പതംപറച്ചിലുകളും
നമുക്കെന്നാണന്യോന്യം
അന്യമായ് തീർന്നത്
കളിചിരികളെന്നാണു
കളംവിട്ടു പോയ് മറഞ്ഞത് ഒരേയിഷ്ടമായിരുന്ന നമ്മളെന്നാണൊത്തിരി
യിഷ്ടങ്ങളായിമാറിപ്പോയത്

പുസ്തകങ്ങളെല്ലാംമറന്നിട്ട്
മുഖപുസ്തകങ്ങളിലേക്കന്നു
ചേക്കേറിയനാൾ മുതൽ
നമുക്കൊന്നിനുമേതിനു
മില്ല സമയങ്ങൾ.

മുഖചിത്രങ്ങളുടെ പിന്നിലെ
മുഖമറിയാതെ, മനമറിയാതുഴറി മടുത്ത
നാളുകൾ മറക്കാം

ഇന്നു ഞാനീ മുഖപുസ്തകമടച്ചീ
മനോപുസ്തകം തുറന്നു
നിന്നെയും കാത്തിരിക്കുന്നു
കളിവാക്കു ചൊല്ലി
കളിചിരികൾതൂകി കണ്ടു 

നിർത്തിയിടത്തുനിന്നുമിനിയും 

തുടരാമീസൗഹൃദം

By: PS Anilkumar DeviDiya