കിടങ്ങറ ആറ്റിലെ രാസലീലകൾ

^^^^^^^^^^^^^^^^^^^^^^^^^^^^^
ഈയിടെയായി അവൾക്കൊരു
സ്നേഹക്കുറവ് ഉണ്ടെന്ന ഒരു തോന്നൽ
അവനിലുണ്ട് പക്ഷേ,
അവളില്ലാതെ ഒരു ദിവസംപോലും ജീവിക്കാൻ
അവനാകില്ല

പെണ്ണുങ്ങളുടെ കുളിക്കടവിൽ
അവളെത്താറുള്ള സമയം കഴിഞ്ഞു
അവൻ വികാരത്താൽ ക്ഷമ നശിച്ചവനായി ആറ്റിറമ്പിലൂടെ
കുളിക്കടവിലേക്ക് കുറച്ചുകൂടി നീന്തിയെത്തി വെള്ളത്തിലൂളിയിട്ട് നിന്ന്
കണ്ണുകൾ പരമാവധി തുറന്നുപിടിച്ചു

ഭാഗ്യം അവൾ മുങ്ങാംകുഴിയിട്ട് നീന്തിവരുന്നുണ്ട്

ആവേശത്തോടെ മുട്ടിയുരുമ്മാൻ
അടുത്ത അവനിൽനിന്നും അവൾ ഒഴിഞ്ഞുമാറി
ചുണ്ടോടു ചുണ്ട് മുട്ടുമെന്നായപ്പോൾ അവൾ മുഖം വെട്ടിത്തിരിച്ചു
കീഴ്പ്പെടുത്താനായി കുതിച്ചുനീന്തിയ
അവനെ കബളിപ്പിച്ച് ആറ്റിനടിയിലേക്കവൾ മുങ്ങാംകുഴിയിട്ടു
അവളുടെ സാമീപ്യം അവനെ മത്തുപിടിപ്പിച്ചു

അവളുടെ ഒഴിഞ്ഞുമാറ്റം അവനെ ദേഷ്യം പിടിപ്പിച്ചു

അൽപം കഴിഞ്ഞു അവൾ അവനരികിലേക്ക് നീന്തിയെത്തി

നീയിങ്ങനെ ഒഴിഞ്ഞുമാറി നടന്നാലെങ്ങനെയാ
നിനക്കെന്നോട് ഇഷ്ടമില്ലേ
ഞാനോ നമ്മുടെ തലമുറകളോ
ഒരുവളെ ഇഷ്ടമായാൽ
മറ്റൊരു പെണ്ണിനെ നോക്കാത്തവരാണ് എന്നറിയില്ലേ നിനക്ക്
നിന്റെ സൗന്ദര്യം എന്നിൽ രോമാഞ്ചമുണർത്തുന്നു
അല്ലെങ്കിലും
നാലുമണിക്കാറ്റിൽ ഉണരുന്ന കുഞ്ഞലകൾ ആറ്റിറമ്പിലെ കുഞ്ഞളകളിൽ മുട്ടി
ഗ്ളക് ഗ്ളക് ക്ളക് ഗ്ളക്
എന്നൊച്ചവയ്ക്കുമ്പോൾ

എന്റെയുള്ളിൽ ഒരു മാദകലഹരി നിറയുന്നത് നിനക്കറിയില്ലേ
സുന്ദരിപ്പെണ്ണേ എന്നോട് ചേർന്ന്നിൽക്കൂ..

നിങ്ങൾക്ക് പുന്നാരം പറഞ്ഞു ഓരോന്നൂ കാണിച്ചിട്ട് മുങ്ങിയാൽ മതി
പിന്നെ കിടന്ന് അനുഭവിക്കുന്നത് ഞാനാ

എടീ നിന്നെ നഷ്ടമായാൽ
ഈ ചേറിൽ മുഖം കുത്തിനിന്ന്
ഞാൻ ആത്മഹത്യ ചെയ്യും എന്നറിയാവുന്ന നീ തന്നെയാണോ ഇത് പറയുന്നത്
നിങ്ങളോട് ഇഷ്ടമില്ലാഞ്ഞിട്ടാണോ
ആറ്റിറമ്പിൽ ചേർന്ന് നിന്ന് സമാധാനത്തോടെ ഒന്ന് മുട്ടയിടാൻ മറ്റുമോ കമ്പീംകൊണ്ട് വന്ന് ഓരോ അവന്മാര് ചങ്കിനല്ലേ കുത്തിയെടുത്തോണ്ട പോണത്

കരിമീൻ എന്ന് കേൾക്കുമ്പഴേ എല്ലാവനും ഭ്രാന്തല്ലേ
പിള്ളേര് കണ്ടാലോ
കരിങ്കല്ലിന് എറിഞ്ഞുവീഴിക്കും

എടീ അതൊക്കെപ്പറഞ്ഞാൽ
മരിക്കാനായി മുഖം ചേറ്റിൽ മുക്കി നിന്ന കരിമീനെ കമ്പിയെ കോർത്തെടുത്തല്ലേ അവരു വീരവാദം മുഴക്കുന്നത്
വല്യ മീൻപിടുത്തക്കാരനാണുപോലും.

പക്ഷേ നമ്മുടെ തലമുറകൾ അന്യംനിന്ന് പോകരുത് നീ വാ……
അല്ലേലും ഇനി എത്രനാൾ

ആറ്റിറമ്പിലെ പൊത്തുംപോതും ഇല്ലാതാക്കുവല്ലേ

കുട്ടനാട് പാക്കേജാണെടീ
ആറ്റിലെല്ലാം വാർക്കഭിത്തി പണിയുവാടീ
നമ്മളെന്നല്ല
എല്ലാ ജലജിവികളുടെയും കാലന്മാരാടീ
ഇത് നടത്തുന്നത്

എന്നാ ഈ പൊട്ടന്മാര്
പാതിചന്ദ്രന്റെ ഷെയ്പുള്ള തുളവച്ച
കട്ടയുണ്ടാക്കി ഇതു കെട്ടിയാൽ
ഒരു വെള്ളപ്പോക്കം കഴിയുമ്പോൾ
എക്കൽമണ്ണ് അടിഞ്ഞ്
നമുക്കു തനിമയുള്ള കൂടൊരുങ്ങിയേനേ

ഈ സിമിന്റോ
അതല്ലേൽ
ആറ്റിൽ തള്ളുന്ന കുപ്പിയുരുക്കി
പിള്ളേര് എറിയുന്ന മെറ്റലുചേർത്താലും കട്ടയുണ്ടാക്കാൻ മേലേ
അവർക്ക് കാശ് തട്ടിക്കണോംന്നേ ഉള്ളെടീ
നമ്മളൊക്കെ ജീവിക്കണമെന്ന്
ആർക്കാ വിചാരമുള്ളത്

അവൾ തന്റെ ഉടലാകെ അവനോട് ചേർത്തു
വാലുകൊണ്ട് തഴുകി അവനെ വലംവച്ചു

നിങ്ങളു സങ്കടപ്പെടല്ലേ അങ്ങനൊന്നും വരില്ല
അവൾ അവനെ ചുംബനങ്ങളാൽ

പൊതിഞ്ഞു.
VG.VAASSAN