മിശ്രനൊമ്പരങ്ങൾ (കവിത)

അന്നു നെയ്തകിനാവിലൊന്നും
ഇല്ലരീതികൾ പലവിധം..
അന്നു നമ്മുടെ മാനസത്തിൽ
വന്നതില്ലൊരു ദൈവവും.

ഇന്നു മധുമഴ പെയ്തു തോരവേ
നാമ്പിടുന്നൊരീ മുൾപടർപ്പുകൾ
രക്തശോണിമ ചാർത്തുവാനായ്
എത്തിടുന്നെൻ ജീവനിൽ .

മുത്തുകോർത്തൊരു മാല്യമൊന്നതിൻ
കെട്ടു പൊട്ടിയതൂർന്നുപോയപോൽ
ചിതറി വീഴുന്നു നിർവ്വികാരമെൻ
മിശ്രസുന്ദര പ്രണയവീഥിയിൽ

എന്റെ ദൈവമതെന്റെ മാത്രമായ്
വേലിതീർക്കുന്നു സർവ്വരും വൃഥാ
രണ്ടുപേർക്കിന്ന് രണ്ടു രീതികൾ
തമ്മിലകലന്നു മാനസങ്ങളാൽ....

രണ്ടു വർണ്ണങ്ങൾചേർത്തു മറ്റൊന്ന്
മാറ്റിടുന്നിതേതു ശക്തിയോ
ഇന്നു നിൽക്കുന്നു മൂകമായെൻ
മൂഢസ്വർഗ്ഗത്തിൽ നിർവ്വികാരനായ്.

________-____-__________-______-______

✍️ശ്രീധർ. ആർ. എൻ