പ്രണയത്തിന്റെ ഇരുപുറങ്ങൾ

---------------------------------------------

ദേവൻ കൈയിലിരുന്ന പെൻസിലിന്റെ പുറകിലെ ഇറേസർ കൊണ്ട് മേശമേൽ ഇരിക്കുന്ന ഫോൺ ഒന്നനക്കി നോക്കി...
ഇല്ല. വൈബ്രേറ്റ് ചെയ്യുന്നില്ല. ഒരു കോളോ മെസേജോ നോട്ടിഫിക്കേഷനോ ഇല്ല.
മുഖത്ത് ഇരച്ചു കയറുന്ന ദേഷ്യവും കടുത്ത നിരാശയും കടിച്ചമർത്തി ഫോണിൽ ഒന്നു കൂടി നോക്കി..
അടുത്ത നിമിഷം ഒറ്റ നിവരലിൽ ഫോൺ കടന്നെടുത്ത് നിലത്തേക്ക് ആഞ്ഞെറിഞ്ഞു...
പിന്നെ, മോണിറ്ററിന്റെ സൈഡിൽ വെച്ചിരുന്ന ബോട്ടിലിൽ നിന്ന് ഒരു കവിൾ വെള്ളം കുടിച്ചു..
കൈ രണ്ടും സീറ്റിനു പുറകിലേക്ക് കൊണ്ടുപോയി ഒന്നു നന്നായി സ്‌റ്റ്രെച്ച് ചെയ്തു...
ഇടത്തേ കൈ കൊണ്ട് കണ്ണട എടുത്ത് വലത്തേ കൈ കൊണ്ട് രണ്ടു കണ്ണും നന്നായി തിരുമ്മി....

ഓടിയെത്തിയ രമ്യ ചിതറിക്കിടക്കുന്ന ഫോണിലെക്കും ദേവന്റെ മുഖത്തേക്കും നോക്കി. അൽപമൊരു ഭയത്തോടെ ചോദിച്ചു..

എന്താ സർ? എനി പ്രോബ്ലം?

തിരിഞ്ഞു നോക്കിയ ദേവൻ ഒരു നിമിഷം രമ്യയുടെ മുഖത്തേക്ക് തുറിച്ചു നോക്കി. പിന്നെ ചോദിച്ചു..
കാൻ യു സോൾവ് ദാറ്റ്?

അത് സർ... കാരി ഓൺ സർ... വിൽ കം ലേറ്റർ..

ഹെയ്.. നോ... പോകല്ലേ? ആൻസർ എ സ്മാൾ ക്വസ്റ്റ്യൻ..

രമ്യയുടെ വിളിയ്ക്കായി ആരെങ്കിലും ഫോണിനപ്പുറത്ത് കാത്തു നിൽക്കുന്നുണ്ടോ?

വാട്ട് സർ?

രമ്യയുടെ വിളിയ്ക്കായി ആരെങ്കിലും ഫോണിനപ്പുറത്ത് കാത്തു നിൽക്കുന്നുണ്ടോ എന്ന്..

ഇല്ല സർ

രമ്യ ഫോണിനിപ്പുറത്ത് അല്ലെങ്കിൽ ഒരു കോളിനിപ്പുറത്ത് ഉണ്ടാകും എന്ന് ആർക്കെങ്കിലും ഉറപ്പ് കൊടുത്തിട്ടുണ്ടോ?

അത്.. സർ..ഇല്ല..

ദാറ്റ് മീൻസ്, യു ആർ നോട്ട് ഇൻ ലവ് വിത് എനിബഡി അല്ലേ...

ഒരു ചെറുചിരിയോടെ രമ്യ ദേവനോട് ചോദിച്ചു..

ഷാൽ ഐ ക്ലിയർ ദിസ് ബ്രോക്കൺ പീസസ് സർ?

പിന്നെ അനുവാദത്തിന് കാത്ത് നിൽക്കാതെ ടേബിളിൽ നിന്ന് ഒരു പേപ്പർ എടുത്ത് ചിതറിയ ഫോണിന്റെ കഷണങ്ങൾ സൂക്ഷ്മതയോടെ പെറുക്കി അതിലിട്ടു കൊണ്ടിരുന്നു..

ഇടയ്ക്ക് തല ഉയർത്തി ദേവനെ നോക്കി അതേ ചിരിയോടെ പറഞ്ഞു..
ലവ് എന്ന് സാർ ഉദ്ദേശിച്ചത് സ്‌നേഹം ആണെങ്കിൽ, കാത്തിരിക്കുന്നവർക്ക്, ആഗ്രഹിക്കുന്നവർക്ക്, ദാഹിക്കുന്നവർക്ക് പകർന്നു കൊടുക്കുമ്പോൾ മാത്രം അനുഭൂതി ലഭിക്കുന്ന മധുരമാണ് സ്‌നേഹം...

പക്ഷെ, ലവ്, പ്രണയം ആകുന്നത് ഈ ഫോണിനിപ്പുറത്ത് അല്ല സർ..

പിന്നെ, നിറഞ്ഞ മനസ്സോടെ ഉറച്ച ശബ്ദത്തിൽ അവൾ പറഞ്ഞു..

ആണിന്റെ പ്രണയം അവൻ കൊടുക്കുന്ന ഉറപ്പാണ്..
മരണം വരെ മനസ്സിൽ ഉണ്ടാകും എന്ന ഉറപ്പ്..

അത് മനസ്സിലാക്കുന്നിടത്താണ് സ്ത്രീയുടെ പ്രണയം...

പിന്നെ, പെറുക്കിയെടുത്ത കഷണങ്ങൾ വെയിസ്റ്റ് ബാസ്‌ക്കറ്റിൽ ഇട്ട് അവൾ പുറത്തേക്ക് നടന്നു..

പണിക്കത്തി.