കൃഷ്ണഹൃദയം
------------------------
------------------------
തനിച്ചല്ല നീ ഗോപികേ!തളരുന്നതെന്തിങ്ങനെ?
തെളിയും നിലാവിലുമിന്നു തിളങ്ങുന്നതെന്തേ,
തീര്‍ത്ഥമായ് നീയെനിയ്ക്കേകുമീയശ്രുകണം!
തുളസീദളസമവിശുദ്ധം നിന്‍ വിരഹനിശ്വാസം!
തെളിയും നിലാവിലുമിന്നു തിളങ്ങുന്നതെന്തേ,
തീര്‍ത്ഥമായ് നീയെനിയ്ക്കേകുമീയശ്രുകണം!
തുളസീദളസമവിശുദ്ധം നിന്‍ വിരഹനിശ്വാസം!
മിഴിനിറയാതെ കേള്‍ക്കു നീ രാധികേ!
മഥുരാപുരിയിലുമെന്‍ മനം തുടിപ്പൂ നിനക്കായ്
മൂകമാം മുരളികയോര്‍ക്കുന്നിതെന്നും
മഞ്ജീരധ്വനിയുതിര്‍ക്കും നിന്‍ പദനിസ്വനം!
മഥുരാപുരിയിലുമെന്‍ മനം തുടിപ്പൂ നിനക്കായ്
മൂകമാം മുരളികയോര്‍ക്കുന്നിതെന്നും
മഞ്ജീരധ്വനിയുതിര്‍ക്കും നിന്‍ പദനിസ്വനം!
പരിഭവമിനിയും നീ പറയൂ ഗോപാംഗനേ!
പനിമതിയായ് തെളിയൂ ഹൃദയാംബരത്തില്‍!
പറയാതെയറിയുന്നുവെങ്കിലുമെത്രയോ
പുളകദായകം നിന്‍ പരിദേവനം!
പനിമതിയായ് തെളിയൂ ഹൃദയാംബരത്തില്‍!
പറയാതെയറിയുന്നുവെങ്കിലുമെത്രയോ
പുളകദായകം നിന്‍ പരിദേവനം!
പ്രണയഗീതമൊന്നു പാടൂ നീ മോഹനേ!
പരിതപ്തമെന്‍മനം കുളിരണിഞ്ഞീടുവാന്‍
പകരം തരാനില്ല പ്രേമമല്ലാതെയൊന്നും
പകലുമിരവും ഞാന്‍ ചൂടുന്നു നിന്നോര്‍മ്മകള്‍
പരിതപ്തമെന്‍മനം കുളിരണിഞ്ഞീടുവാന്‍
പകരം തരാനില്ല പ്രേമമല്ലാതെയൊന്നും
പകലുമിരവും ഞാന്‍ ചൂടുന്നു നിന്നോര്‍മ്മകള്‍
പ്രണയകലഹമിതു തുടരൂ നീ പ്രിയതമേ!
പുലരിയിലുമീ പുതുവീഥിയിലും
പ്രഭാതകിരണമായെന്നെയുണര്‍ത്തുവാന്‍
പ്രണയത്തുടുപ്പോടെത്തുന്നു നീയെന്നുള്ളില്‍!
പുലരിയിലുമീ പുതുവീഥിയിലും
പ്രഭാതകിരണമായെന്നെയുണര്‍ത്തുവാന്‍
പ്രണയത്തുടുപ്പോടെത്തുന്നു നീയെന്നുള്ളില്‍!
നിന്നൊപ്പമുണ്ടു ഞാനെന്നറിയുക ഗോപികേ!
നീറും വിരഹാഗ്നിയിലും, നിറയും മൗനത്തിലും
നീരവബിന്ദുവായ്, നിറമെഴും മോഹമായ്
നിന്നിലായറിയുകയെന്നെ നീയിനിയെന്നും!
നീറും വിരഹാഗ്നിയിലും, നിറയും മൗനത്തിലും
നീരവബിന്ദുവായ്, നിറമെഴും മോഹമായ്
നിന്നിലായറിയുകയെന്നെ നീയിനിയെന്നും!
രാധാസുകുമാരന്‍
07.03.2018
07.03.2018
No comments
Post a Comment
ഈ രചന വായിച്ചതിനു നന്ദി - താങ്കളുടെ വിലയേറിയ അഭിപ്രായം രചയിതാവിനെ അറിയിക്കുക