വിഷുക്കണി

നല്ലെഴുത്ത് കുടുംബത്തിലെ എല്ലാ അംഗങ്ങൾക്കും എന്റെ ഹൃദയം നിറഞ്ഞ
ഈസ്റ്റർ - വിഷുദിനാശംസകൾ !!!

🌼 വിഷുക്കണി🌼

കണി കണ്ടുണർന്നിടാം മിഴി തുറക്കൂ - ഹേമ
നിറമാർന്ന കനവുകൾ പൂത്തു നില്പൂ
നന്മകൾ നമ്മൾക്കായ് നീട്ടി നില്പൂ - നീല
നിറമാർന്ന ദൈവതം ചാരെ നില്പൂ

ചിറകാർന്ന മോഹം ചിലച്ചുണർന്നൂ - നൽ
ചിരിതൂകി നില്പൂ പ്രഭാതസന്ധ്യ
എഴുതിരിയിട്ടോരു പൊൻവിളക്കിൽ നിന്നു -
മുതിരുന്നു നാളെയുടെ പൊൻവെളിച്ചം
സങ്കല്പമോരോന്നും പീത പുഷ്പങ്ങളായ്
കൺമുന്നിൽത്തന്നേ വിടർന്നിരിപ്പൂ
ഓമൽ പ്രതീക്ഷകൾ 'കനികളായ് ' താലത്തിൽ
ഓരോരോവർണ്ണം പുതച്ചിരിപ്പൂ..

കണികണ്ടുണർന്നിടാം മിഴി തുറക്കൂ - ദേവ
ബാല്യത്തിൻ പുഞ്ചിരിയാസ്വദിക്കൂ..
അഷ് ടൈശ്വര്യങ്ങൾ തൻ, ചെപ്പിൽനിന്നിത്തിരി
കുങ്കുമം ചേലോടെ തൊട്ടെടുക്കൂ...

താലത്തിൽ കണ്ണാടിക്കാഴ്ച കാണാമതിൽ,
നിൻ മുഖകാന്തിയുമാസ്വദിക്കാം
നീ തന്നെയാകുന്നു കാണായതൊക്കെയും
നീ തന്നെയല്ലോ മഹാവിശ്വമാകെയും.
നിന്നെ നീയറിയുന്ന നാൾ തൊട്ടു - ലോകമീ
പൊൻകണി പോൽ, വശ്യമാർന്നു നിൽക്കും

ശുഭം
ബിജു മംഗലത്ത്