അല്ലാഹുവിനോട് കരുണയെ തേടുന്നു

ഞാനിപ്പോൾ ഇരിയ്ക്കുന്നത്‌ എറണാകുളത്തെ പ്രശസ്‌തമായ ഒരാശുപത്രിയിലെ ഓപ്പറേഷൻ തിയേറ്റർ നു മുന്നിലാണ്. അകത്തു ഉമ്മയുടെ ഓപ്പറേഷൻ നടന്നു കൊണ്ടിരിയ്ക്കുകയാവും ഇപ്പോൾ. ആറു മണിക്കൂർ നീണ്ടു നിൽക്കുന്ന ഒരു വലിയ ശസ്ത്രക്രിയ....
ഉമ്മയ്ക്ക് റെക്റ്റം കാൻസർ ആണ്.

ഞാനും എന്റെ മകളും മറ്റു ചില അടുത്ത ബന്ധുക്കളുമൊക്കയുണ്ട് ഇവിടെ.
എല്ലാവരും പ്രാർത്ഥനയിലാണ്.
ശസ്ത്രക്രിയ അത്രമേൽ വെല്ലുവിളി നിറഞ്ഞതാണെന്ന് ഓങ്കോളജി സർജൻമാർ മുന്നറിയിപ്പ് തന്നിരുന്നു.
പ്രമേഹം, സീഷെർ, രക്തസമ്മർദ്ധം, അപകട സാധ്യത കൂട്ടുന്ന ഘടകങ്ങൾ ഏറെയാണ്.
എല്ലാവരും കരഞ്ഞും പേടിച്ചും ഖുർആൻ പാരായണം ചെയ്തും അല്ലാഹുവിനോട് കരുണയെ തേടുന്നു.
പ്രാർഥന, പ്രത്യേകിച്ചും മക്കളുടെ പ്രാർഥന സ്വീകരിയ്ക്കപ്പെടുക തന്നെ ചെയ്യുമെന്ന് എല്ലാവരിലും ശുഭ പ്രതീക്ഷ.
ഞാൻ മാത്രം കരയുന്നില്ല
വേവലാതിപ്പെടുന്നില്ല,
പ്രാർത്ഥിയ്ക്കുന്നില്ല.......
എന്റെ സമനില തെറ്റിപ്പോയോ എന്നു ഉമ്മയുടെ അനിയത്തിമാർക്ക്‌ സംശയം.

അങ്ങനെയൊന്നുമില്ല, ഞാൻ ഓർമ്മകളിലൂടെ ഒന്നു പുറകോട്ടു സഞ്ചരിച്ചതാ........
എട്ടു വർഷങ്ങൾക്കു മുമ്പു അനിയത്തിയുടെ ജീവനു വേണ്ടിയും തൊട്ട ടുത്ത വർഷം വാപ്പയുടെ ജീവനു വേണ്ടിയും ഞാനിതുപോലെ വെല്ലൂർ മെഡിക്കൽ കോളേജിന്റെ അകത്തളത്തിലിരുന്നു കരഞ്ഞിട്ടുണ്ട്, ;നെഞ്ചുരുകി പ്രാർത്ഥിച്ചിട്ടുണ്ട്, രണ്ടു പ്രാർത്ഥനയും സ്വീകരിയ്ക്കപ്പെട്ടില്ല.....
ഇപ്പോൾ ഒരു തരം മരവിപ്പാണ് അനുഭവപ്പെടുന്നത്......

തണൽ നഷ്ടപ്പെടുന്നവരുടെ വേദന, അത് അനുഭവിച്ചു തന്നെ അറിയണം.

ഈ കുറിപ്പ് എഴുതിയത്, ഇവിടെ നല്ലെഴുത്തിൽ എനിക്ക് നല്ലവരായ ഒരു പിടി സുഹൃത്തുക്കളുണ്ട്. അവരെല്ലാം ഇപ്പോൾ എന്റെ ചുറ്റും എന്നോടൊപ്പം നിൽക്കുന്നു എന്നു തോന്നിയതു കൊണ്ടാണ്.
സജ്ന, സജ്നാജി, സ്ജനേച്ചി, സച്ചു, സച്ചുത്താത്ത, ഇത്ത, ചേച്ചി ഇത്താത്ത, സജു, എന്നും, ടീച്ചർ എന്നും മാഷെ എന്നുമൊക്ക സ്നേഹപൂർവ്വം വിളിയ്ക്കുന്ന ഒത്തിരി നല്ല സൗഹൃദങ്ങൾ.

എന്റെ കുടുംബത്തിൽ നിന്നുള്ളതിനേക്കാൾ ഒത്തിരി നല്ല വിളിപ്പേരുകൾ എനിക്കീ നല്ലെഴുത്ത് കുടുംബത്തിൽ നിന്നാണ് കിട്ടിയത്.

ഈ വിളികളിളെല്ലാം അടങ്ങിയിട്ടുള്ള, സ്നേഹവും വാത്സല്ല്യവും ബഹുമാനവും ഇഷ്ടവും എല്ലാം ഞാൻ തിരിച്ചറിയുന്നുണ്ട്.

സങ്കടപ്പെടേണ്ട, ഞങ്ങളുണ്ട് കൂടെ എന്ന ഓർമ്മപ്പെടുത്തലായി നിങ്ങൾ ഓരോരുത്തരും നിൽക്കുമ്പോൾ എന്റെ മനസ്സിൽ കണ്ണുനീരിനു സ്ഥാനമില്ല.

ഇവിടെ എല്ലാവരും പരസ്പരം കളിയാക്കിയും കമന്റടിച്ചും സന്തോഷങ്ങളും സങ്കടങ്ങളും പങ്കുവച്ചും ഇരിയ്ക്കുമ്പോൾ പണ്ട്, തറവാട്ടിൽ ചിലവഴിച്ച മദ്ധ്യവേനൽ അവധിക്കാലമാണ് എനിക്കയ്ക്ക് ഓർമ്മ വരിക.

ഒരിയ്ക്കൽ പോലും നേരിൽ കണ്ടിട്ടില്ലാത്ത നിങ്ങളെല്ലാവരും എനിയ്ക്കു അത്രമേൽ പ്രിയം നിറഞ്ഞവരാണ്.... നിങ്ങളുടെ പ്രാർത്ഥന മതിയാവും.... എനിയ്ക്കു പിടിച്ചു നിൽക്കാൻ. എന്റെ ഉമ്മയ്ക്ക് ആയുസ്സ് നീട്ടിക്കിട്ടാൻ...........
എല്ലാ സ്നേഹമുഖങ്ങൾക്കും എന്റെ ഇഷ്ടം, സ്നേഹം..

By. Sajna shajahan