പുഴയെതേടി..

പുഴയെതേടി..
=============

പുഴപോയ വഴിയിലൊരു യാത്ര പോവാം
അന്ന് പുഴനീന്തിയെത്തിയ കാലമോർക്കാം
തീരത്തെ നനവാർന്ന പഞ്ചാരമണലിലായ്
കളിവീട് കെട്ടിയ കാലമോർക്കാം
ഓളങ്ങളലതീർത്ത പുഴയുടെ മാറിലാ
വർഷമേഘത്തിൻ ചടുല നൃത്തമോർക്കാം
തുള്ളിക്കുതിച്ചകലെ ജലധിയിൽ മറയുന്ന
പുഴയുടെ കൗമാരകാലമോർക്കാം
ഇന്നലെ പെയ്ത മഴയുമീ മണലിന്റെ
ആഴത്തിലെവിടെയോ പോയ് മറഞ്ഞു
പൂവിടാൻ വെമ്പിയൊരാറ്റുവഞ്ചി
ഇന്ന് ശുഷ്കമാംപത്രങ്ങളോടെനിൽപ്പു
പുഴപോയവഴിയിലൊരുപേരാൽമുളച്ചത്
ഘോരമാംവെയിലിൽ കരിഞ്ഞുവല്ലോ
പുഴപോയവഴിയിലീയാത്രതന്നന്ത്യത്തിൽ
സംഗമിക്കാമെന്നു വ്യാമോഹമോ...

By

Nisa Nair