ഉമ്മ...

ഉമ്മ...
********
(ഇതൊരു കഥയല്ല... ഒരു ഉമ്മയുടെ അനുഭവക്കുറിപ്പാണ്..)
തൃശൂർ മെഡിക്കൽ കോളേജിൽ വെച്ചാണ് ആ ഉമ്മയെ ഞാൻ പരിചയപ്പെടുന്നത്.. എന്തോ അസുഖം കാരണം ഡോക്ടറെ കാണിക്കാൻ വന്നതാണ് ആ ഉമ്മ.
അടുത്തടുത്ത ചെയറിൽ ആണ് ഞങ്ങൾ ഇരുന്നിരുന്നത്.. ഓരോരോ വിശേഷങ്ങൾ ആ ഉമ്മ എന്നോട് ചോദിച്ചു കൊണ്ടേയിരുന്നു.
എല്ലാത്തിനും മറുപടികൊടുക്കുന്നതിനിടക്ക് ഞാൻ ചോദിച്ചു ഉമ്മ ഒറ്റക്കാണോ വന്നത് കൂടെ ആരും ഇല്ലേ എന്ന്...
അപ്പോ അവര് പറഞ്ഞത് മോൻ പണിക്കു പോയിരിക്കാണ്... കൂടെ പോരാൻ വേറെ ആരും ഇല്ലെന്ന്..
ഉമ്മാടെ ഭർത്താവ് എവിടെ എന്ന് ഞാൻ ചോദിച്ചപ്പോൾ അവര് പറയാണ് ലോകത്ത് ഒരു ഭാര്യക്കും ഭർത്താവ് മരിക്കുന്നത് ഇഷ്ടമുണ്ടാവില്ല... പക്ഷെ എന്റെ ഭർത്താവ് മരിച്ചുപോവാനാണ് എനിക്കിഷ്ടം എന്ന് പറഞ്ഞ് ആ ഉമ്മ കരയാൻ തുടങ്ങി...

എന്തു പറഞ്ഞ് അവരെ ആശ്വസിപ്പിക്കണം എന്നെനിക്കറിയില്ല... ഒന്നറിയാം എന്തൊക്കെയോ മാനസിക പ്രശ്നങ്ങൾ ആ ഉമ്മാനെ അലട്ടുന്നുണ്ടെന്ന്..
സങ്കടം ഒക്കെ ഏകദേശം മാറിയപ്പോൾ ഞാൻ അവരോട് ചോദിച്ചു. എന്താണ് ഉമ്മാന്റെ പ്രശ്നമെന്ന‌്..
ഉമ്മ പറഞ്ഞത് കേട്ടപ്പോൾ ഞാനും കരഞ്ഞുപോയി....
നാലു പെൺമക്കൾ മാത്രമുള്ള വീട്ടിലെ മൂത്ത ആളായിരുന്നു.. അന്നൊക്കെ കല്യാണം കഴിച്ചുകൊടുക്കുന്നത് മുറച്ചെറുക്കൻമാർക്കാണ്.. അമ്മാവന്റെ മോനേക്കൊണ്ട് തന്നെ അവരുടെ കല്യാണം കഴിഞ്ഞു... കല്യാണം കഴിഞ്ഞ അന്നുമുതൽ ഇന്നുവരെ ഒരു ദിവസം പോലും അയാൾ കള്ളുകുടിക്കാതെ വീട്ടിൽ വന്നിട്ടില്ല..
വീട്ടിൽ വന്നു കേറിയാൽ അടിയും തൊഴിയും ചീത്ത വിളിക്കലും തുടങ്ങും..
ആദ്യമൊക്കെ അയൽവീടുകളിലെ ബാത്ത്റൂമുകളിലും മേശയുടെ ചുവട്ടിലൊക്കെ പോയി ഒളിക്കുമായിരുന്നു...
കള്ളുകുടിച്ച് വരുന്ന സമയത്ത് അയാളുടെ അടുത്തുണ്ടെങ്കിൽ കയ്യിൽ കിട്ടുന്നതൊക്കെ എടുത്ത് ഉപദ്രവിക്കും..
കിട്ടുന്ന കാശിനൊക്കെ കള്ളു കുടിക്കും..
അടുത്തുള്ള വീട്ടിൽ പാത്രം കഴുകാൻ പോയിട്ടായിരുന്നു വീട്ടു ചിലവ് കഴിഞ്ഞിരുന്നത്.

അതിനിടക്ക് മൂന്ന‌് കുട്ടികളും ഉണ്ടായി.. മൂന്നും ആൺകുട്ടികൾ..!!
നാലു വീടുകളിൽ ജോലിക്ക‌് പോയിട്ടാണ്
മക്കളെ വളർത്തിയിരുന്നതും വീട്ടിലെ ചിലവു നോക്കിയിരുന്നതും.. അതിൽ നിന്ന് കിട്ടുന്ന കാശിൽ നിന്ന് അയാൾക്ക‌് കുടിക്കാനും കൊടുക്കണം..
എല്ലാം കഴിഞ്ഞ‌് വീട്ടിൽ വന്നാൽ അയാളുടെ ഉപദ്രവവും...
എന്നെ കിട്ടിയില്ലെങ്കിൽ മക്കൾക്കെതിരെയാവും ഉപദ്രവം..
ചെറിയ കുട്ടികളായിരിക്കുമ്പോൾ തന്നെ ഇതൊക്കെ കണ്ടാണ് അവർ വളർന്നത്..
ഒരുപാട് ബുദ്ധിമുട്ടിയിട്ടാണേലും നല്ല രീതിയിൽ അവരെ പഠിപ്പിച്ചു.. എന്നാൽ കഴിയുന്ന രീതിയിൽ അവരുടെ ആഗ്രഹങ്ങളെല്ലാം സാധിച്ചു കൊടുത്തു..
എന്നെ അയാൾ തല്ലിക്കൊല്ലാറാക്കിയാലും മക്കളെ ഉപദ്രവിക്കാൻ ഞാൻ സമ്മതിച്ചിരുന്നില്ല...
വീട്ടിലെ കഷ്ടപ്പാടിനു പുറമേ ജോലി ചെയ്യുന്ന വീട്ടുടമസ്ഥരുടെ കുത്തുവാക്കുകളും കാമത്തോടെയുള്ള നോട്ടവും തൊടലും പിടിക്കലും എല്ലാം സഹിക്കണം...
എന്റെ ഭർത്താവെന്നു പറയുന്ന ആൾ ഇന്നേവരെ ഒരു കിലോ അരി പോലും വീട്ടിലേക്ക് കൊണ്ടുവന്നിട്ടില്ല..
നൊന്തു പെറ്റ എന്റെ മക്കൾക്ക‌് പോലും എന്നെ വേണ്ടാതായത് അയാളുടെ നശിച്ച കുടി കാരണം ആണ്...
ഒരുപാട് കഷ്ടപ്പെട്ട് വളർത്തിയ മക്കൾ...
മൂത്ത മകൻ ജോലിക്ക് നിന്നിരുന്ന സ്ഥലത്ത് നിന്നു തന്നെ കല്യാണം കഴിച്ച് അവിടെ കൂടി...
അവൻക്ക‌ിപ്പൊ ഒരു കുട്ടിയായി..
ആ കുട്ടിയെ പോലും ഞാൻ ഇന്നുവരെ കണ്ടിട്ടില്ല.... ഇന്നുവരെ എന്നെ ഒന്നുകാണാൻ പോലും അവൻ വന്നിട്ടില്ല... ഈ ഉമ്മ ജീവിച്ചിരിക്കുന്നുണ്ടോ മരിച്ചോ എന്നു പോവും ന്റെ കുട്ടിക്ക‌് അറിയേണ്ടാവില്ല..

രണ്ടാമത്തേ മകനും ബാപ്പയും തമ്മിൽ അടിയുണ്ടാക്കി വീട് വിട്ട് പോയതാ..
കല്യാണമൊക്കെ കഴിച്ച് ഭാര്യവീട്ടിൽ താമസിക്കുന്നുണ്ടെന്ന് ഞാൻ അറിഞ്ഞു..

മൂന്നാമത്തെ മകനിപ്പൊ എന്റെ കൂടെ വീട്ടിലുണ്ട‌്... കൂലിപ്പണിക്ക് പോയി വീട് നോക്കുന്നുണ്ട്.. ബാപ്പ ഉണ്ടാക്കിവെച്ച കടം തീർക്കുന്നതും അവനാണ്..
വയസ്സ് മുപ്പത് കഴിഞ്ഞു... കല്യാണം കഴിക്കാൻ പറഞ്ഞപ്പോൾ ബാപ്പ മരിച്ചിട്ടേ പെണ്ണു കെട്ടൂ എന്നാ പറയുന്നത്...
ബാപ്പ ജീവനോടെയുള്ളപ്പോ ഒരു പെണ്ണിനേയും ഈ വീട്ടിലേക്ക് കൊണ്ടുവരില്ലെന്ന് അവൻ ആവർത്തിച്ച് പറയും...
അവൻ പറയുന്നതും ശരിയാണ് ഒരു പെണ്ണിന്റെ കണ്ണീരു കൂടി ഈ വീട്ടിൽ വീഴേണ്ടല്ലോ...
മക്കള് പോലും ജന്മം കൊടുത്ത ബാപ്പ മരിച്ചുപോവാൻ പ്രാർത്ഥിക്കാണ്..
പലരും എന്നോട് പറഞ്ഞിരുന്നു ഇതൊക്കെ സഹിച്ച് ഇവിടെ ജീവിക്കുന്നതിലും നല്ലത് എല്ലാം മതിയാക്കി സ്വന്തം വീട്ടിലേക്ക‌് പൊയ്ക്കൂടേ എന്ന്..ഉള്ളതൊക്കെ വിറ്റുപെറുക്കിയാണ് എന്നേം അനിയത്തിമാരേയും കെട്ടിച്ചു വിട്ടത്..
പിന്നേയും ഒരു ബാധ്യതയാവണ്ടല്ലോന്ന് കരുതി എല്ലാം സഹിച്ചു ജീവിച്ചു.
ഇന്ന് ഡോക്ടറെ കണിക്കാൻ വന്നത് എന്തിനാന്നറിയോ മോൾക്ക്... ഇന്നലെ കള്ളുകുടിച്ച് വന്ന് എന്റെ മുതുകിലേക്ക് ചവിട്ടിയതാ... നീരു വന്ന് തുടുത്തിരിക്കാണ്..
ഇപ്പൊ ഞാനീ മരുന്ന് വാങ്ങിപ്പോയാലും ഇനിയും അയാളുടെ ക്രൂരതക്ക‌് ഇരയാവാനാണ്..

അയാള് ഒന്ന് മരിച്ചു കിട്ടണേ എന്ന് പ്രാർത്ഥിക്കാണ് ഞാൻ... അത്രക്ക് അനുഭവിക്കുന്നുണ്ട് മോളേ...

ഇത്രയും പറഞ്ഞ് ആ ഉമ്മ പൊട്ടിക്കരയാൻ തുടങ്ങി..
എന്ത് ആശ്വാസവാക്ക് പറഞ്ഞാലും ആ ഉമ്മയുടെ കണ്ണുനീരിനെ തടയാനാവില്ല..
ഒരുവിധത്തിൽ ആ ഉമ്മയെ ആശ്വസിപ്പിച്ചു അവിടെ നിന്ന് പോരുമ്പോൾ ആ ഉമ്മയും മക്കളും അയാളെ ശപിക്കുന്നതു പോലെ
ഞാനും മനസ്സുരുകി അയാളെ ശപിച്ചു..

ഈ പാപമൊക്കെ അയാൾ എവിടെക്കൊണ്ടുപോയി തീർക്കും...!!

ശുഭം
ജാസ്മിൻ സജീർ