സമുദ്ര ലംഘനം .

ഒരു രാമായണഭാഗത്തിലെ എനിക്കിഷ്ടപ്പെട്ട അല്ലെങ്കിൽ എനിക്ക് തോന്നിയ ചെറിയ ഒരു സന്ദേശം അൽപം നർമം ചാലിച്ച് .....

സമുദ്ര ലംഘനം .

"പിന്നെ കപിവരന്മാർ കൗതുകത്തോടു,
മന്യോന്യമാശു പറഞ്ഞു തുടങ്ങി നാൻ ,
ഉഗ്രം , മഹാനക്ര ചക്ര ഭയങ്കരം
അഗ്രെ സമുദ്രമാലോക്യ കുപികുലം
എങ്ങിനെ നാമിതിനെകടക്കുന്ന വാറെങ്ങും
മറുകര കാണ്മാനുമില്ലല്ലോ ..."

"ന്നു വെച്ചാൽ മലയാളത്തിൽ പറ മാഷെ ??"

"അതായത് സുലൈമാനെ, പല പ്രമുഖരെയും ചോദ്യം ചെയ്തതിന്റെ വെളിച്ചത്തിൽ സീതാദേവിയെയും കൊണ്ട് ടിയാൻ സമുദ്രം കടന്നു ഇത് വഴിയാണ് പോയതെന്ന് ശ്രീരാമ ലക്ഷ്മണന്മാരും സുഗ്രീവ അംഗദാദി കപികുലവും അടങ്ങുന്ന അന്വേഷണ സംഘം സ്ഥിതീകരിച്ചു .

ഇനി സമുദ്രതീരത്തെ രംഗം ;

തുടർന്നുള്ള അന്വേഷണം മുന്നിലെ കടൽ കാരണം വഴി മുട്ടിയതിൽ എല്ലാവരും വിഷണ്ണരായി എന്ന് പ്രത്യേകം പറയേണ്ടതില്ലല്ലോ .

"നിപ്പോ ന്താ ചെയ്യാ ?" ഒരു പാലം പണിയണമെന്ന് വെച്ചാലും ഇത്തിരി സമയമെടുക്കില്ലേ "?

ചേട്ടന്റെ വിഷമം കണ്ടു "ആ ഇത്തിരി സമയം കൂടി ബാച്ച്ലർ ലൈഫ് പൊളിച്ചൂടെ " എന്ന വാചകം വിഴുങ്ങി ആയുധാഭ്യാസങ്ങൾക്കു പുറമെ പാർട്ട് ടൈം സിവിൽ എഞ്ചിനീറിംഗും കഴിഞ്ഞ ലക്ഷ്മണൻ ഇങ്ങനെ പറഞ്ഞു .

"നമ്മളെ നാട്ടുകാരാണ് പണിയുന്നതെങ്കിൽ ബീഡി വലിയും ലുങ്കി മാടികുത്തലും ഹർത്താലും സമരവും എല്ലാം കഴിഞ്ഞു പാലം തീരുമ്പോഴേക്കും ദേവി ......"

"ഉം ... അത് ശരിയാ മാത്രമല്ല മുക്കാൽ ഭാഗവും പണിയെടുക്കാതെ നോക്കുകൂലി കൈ പറ്റുകയാവും, ബംഗാളികളെ ഇറക്കിയാലോ ??"

"എങ്കിലും വർഷം ഒന്നെങ്കിലും വേണം .... ഇനി അണ്ണാറക്കണ്ണനടക്കം എല്ലാരും ഒത്തു പിടിച്ചാൽ മാസങ്ങൾ കൊണ്ട് തീർന്നേക്കും "

"പക്ഷെ പാലം പണിയുന്നതിന് മുൻപേ "ഓറോടു കാത്തിരുന്നു കാത്തിരുന്നു ... മുഷിയരുതെന്നു ആരെങ്കിലും വേഗം ഒന്ന് പറയണ്ടേ ??"

ഓറോടു എന്ന് പറഞ്ഞത് സുലൈമാൻ ശ്രദ്ധിച്ചോ ? ഓളോട് എന്ന് ഉപയോഗിച്ചാൽ ഭാര്യയെ ബഹുമാനമില്ലാതെ സംബോധന ചെയ്തു എന്നും അത് കൊണ്ട് ഇത് ഒരു മെയ്ൽഹൈറാർക്കി എഴുത്താണെന്നു പറഞ്ഞു ഈ ചെറിയ തമാശ വിവാദമാക്കി അച്ചാർ പരുവത്തിലാക്കും . ഏതെങ്കിലും വരിയിൽ വിവാദത്തിനു സ്കോപ്പുണ്ടോ എന്ന് ഭൂതക്കണ്ണാടി വെച്ച് നോക്കുന്ന കാലമാണ്, അതാണ് പൂബ പ്രയോഗിച്ചത് !!

"പൂബയോ ക്യൂബ എന്ന് കേട്ടിട്ടുണ്ട് ഇതെന്താണ് ??"

"പൂജക ബഹുവചനം ഓറ് = അവർ മനസ്സിലായോ "

"ഓ അങ്ങിനെ , എന്നിട്ടെന്തായി ?"

എന്നിട്ടു,...

"വഴീണ്ടു ,വഴീണ്ടു ആരെങ്കിലും കടൽ ചാടി കടന്നു പറഞ്ഞാൽ പോരെ ??"

സുഗ്രീവ രാജാവാണ് .

"ശിവ ശിവ , പെട്ടെന്ന് ചേട്ടനെ തട്ടി രാജ്യം ലഭിച്ചപ്പോൾ ഇയാളുടെ കിളി പോയോ ??"

"എന്നാൽ പിന്നെ സുഗ്രീവ രാജാവിന് തന്നെ ശ്രമിച്ചു കൂടെ ??"

പന്ത് വീണ്ടും തന്റെ കോർട്ടിൽ എത്തിയത് ഇഷ്ടപ്പെടാതെ മൂപ്പർ വിഷമത്തോടെ പറഞ്ഞു ,

"പണ്ടാണെങ്കിൽ നോക്കാമായിരുന്നു ഇപ്പോൾ വയസ്സായില്ലേ , പഴയ
പിക്കപ്പൊന്നുമില്ല പ്രഭോ !!"

പിന്നെ ദൂരെ ഇതെല്ലാം കേട്ടിട്ടും കേൾക്കാത്ത മട്ടിലിരിക്കുന്ന ചെറുപ്പക്കാരനെ കാണിച്ചു സിനിമ ഡയലോഗ് കടമെടുത്തു പറഞ്ഞു .

"ദോ ആ ചെറുപ്പക്കാരനെ കണ്ടോ ആളെ അങ്ങട് മനസ്സിലായില്യ ന്നു തോന്നുന്നു , ബഹുമിടുക്കനാ , എന്റെ വലംകൈ മാത്രമല്ല ചാട്ടത്തിലും യുദ്ധത്തിലും കെങ്കേമൻ , ആഞ്ജനേയൻ , ചിരഞ്ജീവി".

"നമ്മുടെ ഭക്തവത്സലനായ ഇവനോ "?

"ഹെന്താ സംശയം പണ്ട് പഴമാണെന്നു കരുതി സൂര്യനെ പിടിക്കാൻ 500 യോജന മേല്പോട്ടു ചാടിയ വീരനാ ??! കഴിഞ്ഞ ലോങ്ങ് ജമ്പ് മത്സരത്തിൽ അവൻ ചാടി വീണയിടത്തേക്കു എത്താൻ മണിക്കൂറുകളോളം രഥമോടിക്കേണ്ടി വന്നു വളണ്ടിയേഴ്സിന് !!" മാത്രമല്ല പിതാവായ കാറ്റും സഹായത്തിനുണ്ടാവും , ക്ഷീണിച്ചാലും കാറ്റടിച്ചെങ്കിലും മറുകണ്ടം ചാടും !!"

"മറുകണ്ടം ചാടുമെന്നു പറയാതെ , മറുകര പറ്റുമെന്ന് പറയൂ , പഴംചൊല്ലിലെ അജ്ഞത കൊണ്ടുണ്ടായ അബദ്ധം ലക്ഷ്മണൻ തിരുത്തി .

"ബുലാവോ , വിളിക്ക്യ "

"ഹൃദയത്തിൽ എന്റെ കയ്യൊപ്പുള്ള ഭക്താ , ഈ അവസരത്തിൽ എന്നെ നീ സഹായിക്കില്ലേ ??!!

"സ്വാമി പറയുമ്പോൾ എങ്ങിനെ പറ്റില്ല എന്ന് പറയും എല്ലാവർക്കും താല്പര്യമാണെങ്കിൽ ഞാൻ തന്നെ ചാടാം "

ആരെങ്കിലും കൈ പൊക്കുമെന്നു പ്രതീക്ഷിച്ചു കുറച്ചു വെറുതെ കാത്തു .

പിന്നെ റണ്ണപ്പിനായി നൂറടി പിറകോട്ടു നടന്നു , മനസ്സിലെ ഗൂഗിൾ മാപ്പിൽ അക്ഷാംശവും രേഖാംശവും കണക്കു കൂട്ടി വാലുയർത്തി പിടിച്ചു ദിശ ഉറപ്പിച്ചു , ചാടി ക്കെട്ടി വലത്തമർന്നു ഇടത്തമർന്നു ഓതിരം മറിഞ്ഞു ഒരൊറ്റ ചാട്ടം

ശ് ഷ്റൂം .....!

ശ്രീരാമ ലക്ഷ്മണന്മാരും സുഗ്രീവ അംഗദാദി കപികുല സൈന്യവും നോക്കി നിൽക്കേ ഹനുമാൻ സ്വാമി ആകാശത്തിൽ ഒരു പൊട്ടു പോലെ മറഞ്ഞു .
വായുപുത്രൻ ഒരു ബിന്ദുവായി മറഞ്ഞു കഴിഞ്ഞിട്ടും മേലേക്ക് നോക്കി വായും പൊളിച്ചിരിക്കുന്ന അനുചരന്മാരോട് ശ്രീരാമസ്വാമി ഇങ്ങനെ അരുൾ ചെയ്തു .

"അബ് വോ വാപസ് ആനേ കേലിയെ ദോ ദിൻ തോ ലഗേഗ , തബ് തക് ഐസാ ഊപർ ദേഖേ ബൈട്ടാ തോ ഖാന കോൻ ബനായേഗാ ??!! ("ഓൻ ബെരാൻ രണ്ടു ദിവസെങ്കിലും ആവും അത് വരെ പയിച്ചിറ്റി രിക്കാനാ (വിശന്നു ) ബേഗം ചോറിന്റെ പരിപാടി നോക്കിൻ!" എന്ന് പൊയിലൂർ ഭാഷാന്തരം .)

മേലോട്ട് നോക്കി കുറച്ചു സമയം കൂടെ റസ്റ്റ് എടുക്കാം ന്നു വിചാരിച്ച സൈന്യം പിറുപിറുത്തു കൊണ്ട് അടുപ്പു കൂട്ടാനായി യോഗം പിരിച്ചു വിട്ടു .

2 .

അങ്ങിനെ ആകാശത്തുള്ള അദൃശ്യമായ എക്സ്പ്രസ്സ് ഹൈവേയിൽ ഒരു നൂറു നൂറ്റമ്പതു സ്പീഡിൽ ഹനുമാൻ സ്വാമി പറന്നുപോകുന്ന നേരം അവിടെ ടോൾ പിരിക്കാനെന്ന വണ്ണം വായും പൊളിച്ചു അത് വഴി പോകുന്നവരെ ഭക്ഷിച്ചു വിശപ്പടക്കുന്ന സുരസാ ദേവിയെ കണ്ടു മുട്ടി .

"അതാരാണപ്പാ ഈ സുരസാ??"

"അറിയില്ലേ ഭുജംഗ മാതാവ് അല്ലെങ്കിൽ നാഗ ജനനി എന്നൊക്കെ പറയുന്ന ദേവിയാണ് സുരസാ ദേവി , അത് വഴി പോകണമെങ്കിൽ അവരുടെ വായിൽ പ്രവേശിക്കാതെ പോകാൻ പറ്റില്ല .

"എന്നാൽ ശരി എന്നെ നീ ഭക്ഷിച്ചോ ?" എന്ന് പറഞ്ഞു ആഞ്ജനേയൻ ഒരു യോജന ഉയരത്തിൽ വളർന്നു .

സുരസ വിടുമോ ! , ദേവി അഞ്ചു യോജന വലുപ്പത്തിൽ വായ പിളർന്നു . ആ കാലത്തു എൻലാർജ്മെന്റ് വളരെ എളുപ്പമായിരുന്നു എന്ന് ഓർക്കണം .

ഉടനെ ഹനുമാൻ സ്വാമി പത്തു യോജന വലുതായി . ദേവി ഇരുപതു , പിന്നെ സ്വാമി മുപ്പതു , അപ്പോൾ ദേവി അമ്പതു യോജന വലുപ്പത്തിൽ വായ തുറന്നു . പെട്ടെന്ന് ഒരു വിരലിന്റെ അത്ര ചെറുതായി വായുപുത്രൻ ദേവിയുടെ വായയിൽ പ്രവേശിച്ചു വായടക്കുന്നതിനു മുന്നേ വെളിയിൽ കടന്നു .

അങ്ങിനെ സുരസയെ പറ്റിച്ചു യാത്ര തുടർന്നു .

ഇതിൽ നിന്ന് സുലൈമാന് എന്ത് മനസ്സിലായി ??

"നമ്മള് ഒരു ലക്ഷ്യത്തിലേക്കു പോകുമ്പോൾ ഇടയ്ക്കു ഇത് പോലെ ചില സരസു ...

"സരസു അല്ല സുലൈമാനെ സുരസ..."

"ഓക്കേ ഇങ്ങനെയുള്ള സുരസമാർ ഇടയ്ക്കു കയറി വെല്ലു വിളിക്കുകയും മറ്റും ചെയ്യും , അപ്പം അവരോടു അധികം അടി കൂടാതെ ഒന്ന് ചെറുതായി കൊടുത്തു ഒഴിവാകാൻ നോക്കുക , അല്ലാതെ നേരം പുലരുന്നത് വരെ വാദിക്കാനും മത്സരിക്കാനും നിന്നാൽ കടൽ പോയിട്ട് ഒരു തോട് വരെ കടക്കാൻ പറ്റൂല !!"

"എടാ ഭയങ്കരാ രാമായണവും മഹാഭാരതവും ഒക്കെ കുറെ വായിച്ചിട്ടും നിന്നെ പോലെ ഇത്ര കൃത്യമായി അർഥം പറയാൻ എനിക്ക് പറ്റിയില്ലല്ലോ ?!!

"എന്തായാലും നിങ്ങളെ ഈ കഥ കേട്ട് എന്റെ ഇന്നത്തെ പരിപാടി മുഴുവൻ വൈകി ന്നു പറഞ്ഞാൽ മതിയല്ലോ , ഇനിയെങ്കിലും നിങ്ങളെ പോലത്തെ സുരസമാരെ ഒഴിവാക്കാൻ നോക്കണം !!"

"മോനെ സുലൈ ... മാനെ ഇത്ര നല്ല ഒരു കഥയും ഗുണപാഠവും പറഞ്ഞു തന്ന എന്നോട് തന്നെ വേണം ....!!"

തിരക്കോടെ സുലൈമാൻ ഇറങ്ങിയപ്പോൾ അടുക്കളയിൽ നിന്ന് പാത്രങ്ങളുടെ ഒച്ചപ്പാട് , കൂടെ ശ്രീമതിയുടെ ചോദ്യവും .. "ജിതുവേട്ടാ ഇങ്ങളിപ്പം സരസു ന്നോ സുരസന്നോ ഒക്കെ പറഞ്ഞത് എന്നെ കൊണ്ടാണോ ??"

(കെണിഞ്ഞോ എന്റെ ആഞ്ജനേയാ , ഒരു നല്ല കഥ പറഞ്ഞത് പാരയായോ !!)

"അയ്യോ , ദേവീ തായേ , ജീവനുള്ളിടത്തോളം കാലം ഈ സംസാരസാഗരം നീന്തി കടക്കാൻ അന്യോന്യം തുണയാവുമെന്നു ഉടമ്പടി ഒപ്പു വെച്ച നിന്നെ കൊണ്ട് ഞാനങ്ങനെയെന്തെങ്കിലും പറയാൻ ധൈര്യപ്പെടുമോ എന്റെ പൊന്നെ ....!!"

"അത് ............!!!"

ജിതേഷ് പൊയിലൂർ