അന്നൊരുനാളിൽ

.......................................

അന്നൊരുനാളിൽ
നിന്നോട് പറയാനാഞ്ഞതെല്ലാം
ഒരു വാക്കിലൊതുങ്ങാതെ
നീർമണിമുത്തുകളായെന്റെ
കൺകോണിലൊളിച്ചിരുന്നു
നിന്നെ കേൾക്കുമ്പൊഴൊക്കെ
പ്രിയമാർന്നൊരു ഗസലിലെ
നേർത്ത സംഗീതമായ്
നീയെന്നിലലിഞ്ഞിരുന്നു.
പ്രണയമെഴും കവിതാശീലുകളായ്
നീയെന്നുമെന്റെ ചുണ്ടിലുണ്ടായിരുന്നു
നിന്നെ ഓർക്കുമ്പോഴൊക്കെയും
മയിൽപ്പീലിയുടെ ചാരുതയായ്,
ചെറുകാറ്റിൽ നിറയുന്ന
ചന്ദന സുഗന്ധമായ്
നീയെന്നെ തഴുകിയിരുന്നു
ചെമ്പകം പൂത്ത നടവഴിയിലന്ന്
പറയാൻ മറന്ന പ്രണയമായ്
നീയണഞ്ഞപ്പോൾ
നിഴലായ് നിന്നെ പിൻതുടർന്നതും
നിഴലുകൾ തമ്മിൽ
പ്രണയം പറഞ്ഞതും
ഇന്നുമൊരോർമ്മച്ചിത്രമായ് തെളിയവേ
അറിയാതെ പിന്നെയുമെൻ
മിഴിക്കോണുകളീറനായീടുന്നു...

Maya Dinesh