മദ്യപാനം ആരോഗ്യത്തിന് ഹാനികരം.

"ഈ പെണ്ണുങ്ങള് മദ്യപിക്കാൻ പാടില്ല... മരത്തേൽ കേറാൻ പാടില്ല ന്ന് ഒക്കെ ഏത് ഊളകള് ഒണ്ടാക്കി വെച്ച നിയമമാണോ എന്തോ..... "
അത്ര വ്യക്തതയില്ലാത്തത ശബ്ദത്തിൽ പറഞ്ഞു കൊണ്ട് അവൾ ഗ്ലാസ്‌ എടുത്ത് ഒറ്റ വലിക്ക് തീർത്തു....
കണ്ടോണ്ടിരുന്ന എന്റെ കണ്ണ് തള്ളിപ്പോയി....

അവൾ എന്നെ നോക്കി ഒരുമാതിരി ഒരു ചിരിച്ചിരിച്ചിട്ട് ചുണ്ടൊന്ന് അമർത്തി തുടച്ചു. പിന്നെ മുന്നിൽ ഇരുന്ന അച്ചാർ വിരലിൽ തോണ്ടി നാക്കിൽ തേച്ചിട്ട് നീട്ടി ഒരു വലി വലിച്ചു."ശ്....... "

"എന്നാടാ നിന്റെ കണ്ണ് തള്ളിപ്പോയോ.... "
ചോദ്യം കേട്ട് ഞാൻ വീണ്ടും ഞെട്ടി....
"ഇന്നലെ വരെ വേണ്ട ഇച്ചായാ...." "എന്നെക്കൊണ്ട് പറ്റത്തില്ല ഇച്ചായാ.... "
"ഈ ഇച്ചായനെന്നാ വട്ടാന്നോ? "എന്നൊക്ക പറഞ്ഞോണ്ടിരുന്ന എന്റെ പ്രിയതമയാണിന്ന് രണ്ട് പെഗ്ഗ് അടിച്ചു തീർത്തതിന്റെ ഹാങ്ങോവറിൽ ഇവിടെ.....
കാണിയായി ഞാനൊറ്റയ്ക്കും.
ഇനിയിവൾ എന്തൊക്ക പേക്കൂത്തുകൾ കാണിച്ചു കൂട്ടുമെന്റെ കർത്താവേ ന്ന് ഉള്ളിൽ വിലപിച്ചുകൊണ്ട് ഞാൻ മൂകനായിരുന്നു.

"എടോ.... ഇവിടെ നോക്ക്..... "ഞാൻ വിശ്വസിക്കാനാവാതെ അവളുടെ മുഖത്തേക്ക് നോക്കി.
"രണ്ടെണ്ണം വിട്ടേന്റെ പൊറത്ത് പറയാണെന്ന് കരുതല്ലേ.... എടോ മനുഷ്യാ.... നിങ്ങള് ഇത് പോലെ നാല് കാലേൽ കേറി വരുമ്പോ ഞാൻ എന്തോരം ഓർത്തിട്ടുണ്ടെന്നോ എന്താണാവോ ഇതിൽ ന്ന് ഇങ്ങേർക്ക് കിട്ടുന്നേ ന്ന്. "
"ഇപ്പം മനസിലായി.... എന്നാ ഒരു ഇതാടാ ഉവ്വേ.."

"ഏത്....? "ഞാൻ നേർത്തൊരു വിക്കലോടെ ചോദിച്ചു.
"അതോ..... നിങ്ങടെ കൂട്ടുകാരൻ ഗോപിച്ചേട്ടൻ എന്നെ കാണുമ്പോ കൂടെ കൂടെ പറയാറുള്ള ഒരിതുണ്ടല്ലോ.... ലത്... "

"ഏത്....? "ഇത്തവണത്തെ എന്റെ ചോദ്യം അങ്ങേയറ്റം ദയനീയമായിരുന്നു.

"അതേയ്.... പുള്ളിക്കാരൻ എന്നെ എപ്പോ കാണുമ്പോഴും പറയാറുണ്ട് ഒരു വല്ലാത്ത കിക്ക് നെ കുറിച്ച്..... "
'ഇക്കണ്ട കാലം കൂടെ കിടന്നിട്ട് നിങ്ങൾക്ക് ഒരു തവണ പറയാൻ തോന്നിയിട്ടുണ്ടോ മനുഷ്യാ....? "
"അന്നേരം ഞാൻ തീരുമാനിച്ചതാ.... "

"എന്തോന്ന്.... ? "എന്റെ ചോദ്യം ഏതാണ്ട് ഒരു കരച്ചിൽ പോലെ ആയി തീർന്നിരുന്നു.

"നിങ്ങളെ എങ്ങനേലും ഒന്ന് ഒഴിവാക്കീട്ട്..... അങ്ങേരുടെ കൂടെ.... "

എന്റെ കിളി പോയി. പണ്ട് ഒരു പെണ്ണിനെ ഒപ്പിച്ചോണ്ട് ഹോട്ടലിൽ മുറിയെടുത്തപ്പോ അമ്മേടെ അനുഗ്രഹം മേടിക്കാതെ ഞാൻ മുറിയിൽ കേറില്ല ന്ന് വാശിപിടിച്ച എന്റെ ആദര്ശവാനായ കൂട്ടുകാരൻ....

"രാത്രി മുഴോനും ഇങ്ങനെ മടിയിൽ കിടക്കാൻ ആണെങ്കിൽ ഇങ്ങേർക്ക് വീട്ടിൽ അമ്മേടെ മടിയിൽ കെടന്നാൽ പോരായിരുന്നോ സാറേ.... എന്നെ വെറുതെ മെനക്കെടുത്തണമായിരുന്നോ?? " ന്നും പറഞ്ഞ് ചെവി കൂക്കിപ്പോവുന്ന രണ്ട് ചീത്തയും വിളിച്ചു പെണ്ണ് ഇറങ്ങിപ്പോയതിന് പിന്നാലെ അവളുടെ മൂക്കുത്തി കണ്ടപ്പോ അമ്മയെ ഓർമ വന്നൂന്നും പറഞ്ഞു ഞങ്ങൾക്ക് മുന്നിൽ നിന്ന് പട്ടി മോങ്ങുന്ന പോലെ മോങ്ങിയ നിഷ്കളങ്കനായ ഗോപി....

പെണ്ണുങ്ങളുടെ മുഖത്ത് പോലും നോക്കാത്ത എന്റെ പ്രിയ കൂട്ടുകാരൻ ഗോപിയെ കുറിച്ചാണ് ഈ ഞെട്ടിക്കുന്ന വെളിപ്പെടുത്തൽ....
ഞാൻ അക്ഷരാർത്ഥത്തിൽ ഞെട്ടിത്തരിച്ചു നിൽക്കുകയാണ്.

"സൈനേഡ് ഒന്നും കിട്ടാത്തൊണ്ട് കൊറച്ച് എലിവിഷം വെച്ച് അഡ്ജസ്റ്റ് ചെയ്തിട്ടുണ്ട്."

"മടമടാ ന്ന് നാലഞ്ചണ്ണം ഒറ്റയടിക്കല്ലേ കീറിയത്..
ഏറി വന്നാ ഒരു പത്ത് മിനിറ്റ്.... "അവൾ വികൃതമായി ഒന്ന് ചിരിച്ചു.

"ചതിച്ചല്ലോടീ സാമദ്രോഹീ.... "ഓക്കാനിച്ചു കൊണ്ട് ഞാൻ ബാത്റൂമിലേക്കോടി. കുടിച്ചതും വയറ്റിലുണ്ടായിരുന്നതുമടക്കം സകലതും ക്ലോസറ്റിലേക്ക് തട്ടിയപ്പോഴേക്കും തലകറങ്ങുന്നതും കണ്ണുകളിൽ ഇരുട്ട് മൂടി കാഴ്ചമറയുന്നതും ഞാൻ ഞെട്ടലോടെ തിരിച്ചറിഞ്ഞു....

. . . . . . . . . . .

ഹാളിന്റെ ഒത്ത നടുക്ക് ഞാൻ നീണ്ടു നിവർന്നു കിടന്നു. മൂക്കിൽ പഞ്ഞിയുള്ളത് ആദ്യം സ്വല്പം ബുദ്ധിമുട്ടായി തോന്നിയെങ്കിലും പതിയെ ഞാനതുമായി പൊരുത്തപ്പെട്ടു തുടങ്ങിയിരുന്നു. പക്ഷെ ഇനി മേലിൽ ഞാൻ വാ തുറക്കരുതെന്ന ഉദ്ദേശത്തോടെ എന്റെ വായടച്ചു കൊണ്ട് തലയിൽ കെട്ടിയ കെട്ടാണ് എനിക്ക് യാതൊരു വിധത്തിലും പൊരുത്തപ്പെടാനാവാത്തത്.

ആ നേരത്താണ് എലിക്ക് പ്രാണ വേദന പൂച്ചയ്ക്ക് വീണ വായന എന്ന് പറഞ്ഞത് പോലെ തീരെ പരിസരബോധമില്ലാത്തൊരീച്ച മൂളിക്കൊണ്ട് വന്നെന്റെ മൂക്കിൻ തുമ്പിൽ ഉപവിഷ്ടനായത്. എനിക്കൊന്നാഞ്ഞു തുമ്മണമെന്ന് തോന്നി. തുമ്മാനാവാത്തതിന്റെ വിമ്മിഷ്ടം പാടുപെട്ടടക്കി ഞാൻ ശാന്താനായി കണ്ണടച്ച് കിടന്നു. അല്ലാതെന്തു ചെയ്യാൻ??

"കഷ്ടം നല്ലൊരു മനുഷ്യനായിരുന്നു...." അതാരപ്പാ എന്നെ കുറിച്ച് അങ്ങനൊരു പ്രസ്താവനയിറക്കിയതെന്ന ആകാംഷയോടെ ഒന്ന് കണ്ണ് മിഴിച്ചു നോക്കി. അയൽക്കാരൻ തോമാച്ചനാണ്. അതിർത്തി തർക്കത്തിന്റെ പേരിൽ വേലിയ്ക്കരികിൽ നിന്ന് ഇന്നലേം കൂടി എന്റെ തള്ളയ്ക്ക് വിളിച്ചവൻ.... അല്ലെങ്കിലും ജീവിച്ചിരിക്കുന്ന കാലത്ത് പരമ ചെറ്റകളെന്ന് മുദ്രകുത്തപ്പെടുന്ന പലരും മരിച്ചു കഴിഞ്ഞയുടനെ മഹത്തുക്കളായി വാഴ്ത്തപ്പെടുന്നതാണല്ലോ കാലങ്ങളായി നാം കണ്ടു ശീലിക്കുന്ന ഒരു കാര്യം. അത് കൊണ്ട് വല്യ അത്ഭുതം ഒന്നും തോന്നിയില്ല....

പെട്ടെന്നാണ് നല്ല പരിചയമുള്ള ഒരു നിലവിളി എന്റെ കർണപടങ്ങളുടെ ഫിലമെന്റടിച്ച് പോവും വിധം കാതിൽ വന്നലച്ചത്.

"എന്നെ ഒറ്റയ്ക്കാക്കിയേച്ചും പോവല്ലേ ഇച്ചായാ...
എന്നേക്കൂടി കൊണ്ട് പോവാമ്മേലായിരുന്നോ..."
തറയിൽ എന്റെ കാൽ ചുവട്ടിലേക്ക് വീണ് മാറത്താഞ്ഞാഞ്ഞു തല്ലിക്കൊണ്ട് പ്രിയതമ തൊള്ളകീറിക്കരഞ്ഞു.... അവളുടെ കരച്ചിലും അഭിനയത്തികവും കണ്ട് ഞാൻ വീണ്ടും ഞെട്ടി.

"എടീ സാമദ്രോഹീ.... കുടിവെള്ളത്തിൽ പാഷാണം കലക്കിത്തന്നേച്ച് ഇപ്പൊ വല്യ പതിവ്രത ചമയുന്നോടീ മൂദേവീ.... "ഞാൻ പല്ല് കടിച്ചു.

"നിന്നെക്കൂടി കൊണ്ട് പോവാൻ വല്ല വകുപ്പും എനിക്ക് നീ തന്നിരുന്നേൽ ഞാൻ നിന്നേം കൊണ്ടല്ലേ പോവുമായിരുന്നൊള്ളെടി ശവമേ ...
" അതിന് മുന്നേ നീ പിന്നീന്ന് കുത്തിയല്ലോടീ പിശാച് മോറീ.... "

"നിന്നേം അവനേം അങ്ങനെ സുഖിക്കാൻ വിട്ടേച്ച് പോവാൻ ഞാനത്ര പുണ്യാളനൊന്നും അല്ലെടി എരണംകെട്ടവളേ..... "

"എന്നിട്ടിപ്പ... നാട്ടാരെ കാണിക്കാൻ അവടെയൊരു കൊണവതികാരം.... " എണീറ്റിരുന്ന് മോങ്ങിക്കൊണ്ടിരുന്ന അവളുടെ ചെകിട്ടത്ത് നാല് പൊട്ടിക്കാൻ ഞാൻ വല്ലാണ്ട് കൊതിച്ചു.

അപ്പോഴാണ് എന്റെ പ്രിയപ്പെട്ട കൂട്ടുകാരൻ ഗോപി എന്റെ കാൽക്കീഴിൽ വന്നു കൈകൾ കെട്ടി മുഖം കുനിച്ച് നിന്നത്. "തോളിലിരുന്ന് ചെവി തിന്നുവായിരുന്നല്ലോടാ പരമ ചെറ്റേ...." ഞാൻ ആരോടെന്നില്ലാതെ വിലപിച്ചു. ആര് കേൾക്കാൻ???

മൂക്കിൽ കുത്തിത്തിരുകിയ പഞ്ഞിയെ മാനിച്ചു കൊണ്ട് ഞാൻ ശ്വാസം പുറത്തേക്ക് വരാതെ ദീര്ഘമായൊന്ന് നിശ്വസിച്ച് നീണ്ട് നിവർന്നുള്ള കിടപ്പ് നിർബാധം തുടർന്ന് കൊണ്ടിരിക്കെ നെഞ്ചത്തലച്ചു നിലവിളിച്ചു കൊണ്ട് ബാങ്കിൽ കൂടെ ജോലി ചെയ്തിരുന്ന ലില്ലിക്കുട്ടി ഓടി വന്നു. ഒപ്പം മറ്റു സഹപ്രവർത്തകരും.
വന്ന പാടെ പത്തെൺപത്ത് കിലോ ഭാരമുള്ള ഒരുപ്പുചാക്ക് വന്നു വീഴുന്ന ലാഘവത്തോടെ ലില്ലിക്കുട്ടി എന്റെ നെഞ്ചത്തെക്കലച്ചു വീണ് കാറിക്കരഞ്ഞു.

"എന്നെ വിട്ടേച്ചു പോയല്ലോ ന്റെ മാതാവേ... ഞാനിതെങ്ങനെ സഹിക്കും....? "

നിലവിളികേട്ടെന്റെ പ്രിയതമ മൂക്കിൽ പഞ്ഞിവെച്ച് കിടന്ന എന്നെയും കാറിക്കൊണ്ടിരിക്കുന്ന ലില്ലിക്കുട്ടിയേയും ഒന്ന് ചുഴിഞ്ഞു നോക്കി. രംഗം അത്ര പന്തിയല്ലെന്ന് കണ്ട് ഞാൻ ചേറിൽ മുഖം പൂഴ്ത്തുന്ന കൊറ്റിയെ പോലെ മുഖമൊളിപ്പിക്കാൻ പാട് പെട്ടു.

"എന്നാലും എന്റെ ലില്ലിക്കുട്ടീ... ഇവൾക്കിതെന്നോടിത്രയും സ്നേഹം ഉണ്ടായിരുന്നോ??? "അറിഞ്ഞില്ല. ആരും പറഞ്ഞില്ല.....

സമയം കടന്ന് പോവുന്ന മുറയ്ക്ക് പലരും വന്നും പോയും ഇരുന്നു. പലരും സെൽഫി എടുക്കാൻ തിക്കിത്തിരക്കി. ഇനി കൂടെ സെൽഫി എടുക്കാൻ പറ്റില്ലല്ലോ ന്ന്....

എങ്ങു നിന്നോ ഇളം കാറ്റിൽ മദ്യത്തിന്റെ മദിപ്പിക്കുന്ന മണം അലയടിച്ചു. ഞാൻ മൂക്ക് പരമാവധി വിടർത്തി ബ്രാൻഡ് ഏതെന്ന് കണ്ട് പിടിക്കാൻ കിണഞ്ഞു ശ്രമിച്ചു. പഞ്ഞി കാരണം സാധിക്കുന്നില്ല. അവന്മാര് കുപ്പി പൊട്ടിച്ചു ന്ന് എനിക്ക് പിടി കിട്ടി.

അവസാനമായി ഒരിറ്റ് മദ്യം കുടിക്കാൻ കിട്ടത്തില്ലേയെൻറെ കർത്താവേയെന്ന് വിലപിക്കേണ്ട ഗതികേട് മാത്രം എനിക്കുണ്ടായില്ലല്ലോയെന്ന് ഞാനാശ്വസിച്ചു.

മദ്യത്തിന്റ മണം നാസികയിലേക്ക് വല്ലാതെ അടിച്ചു കയറിയപ്പോൾ ഞാൻ അറിയാതെ ഒന്ന് തുമ്മിപ്പോയി.

"ഹാ....ഛീ.... "

ദാണ്ടെ.... ദേ കിടക്കുന്നു ഞാൻ റൂമിലെ കട്ടിലിൽ.... പ്രിയതമ എളിക്ക് കയ്യും കുത്തി കയ്യിൽ ഒരു ഗ്ലാസിൽ കട്ടൻ കാപ്പിയുമായി അരികിൽ....

"എന്നാ.... ഒറക്കമാ ഇച്ചായാ ഇത് എഴുനേറ്റെ..."

"ഏഹ്.... അപ്പൊ ഞാൻ ചത്തില്ലേ.... എവിടെ ലില്ലിക്കുട്ടി??? "

"ഹത്... ശരി.... മൂക്ക് മുട്ടെ അടിച്ചു കേറ്റി വാളും വെച്ചേച്ച് ഒള്ള ബോധോം പോയി കണ്ണിൽ കണ്ട പെണ്ണുങ്ങളേം സ്വപ്നം കണ്ടു കിടക്കാതെ എണീറ്റെ മനുഷ്യാ.. എന്നിട്ട് ഐശ്വര്യ മായി ഇതങ്ങോട്ട് കുടിച്ചാട്ടെ... "

"എന്നാലും നിങ്ങള് ഇത്രക്ക് കപ്പാസിറ്റി ഇല്ലാത്ത മനുഷ്യനാ ന്ന് ഞാൻ കരുതിയില്ല. " അവൾ താടിക്ക് കൈ കൊടുത്തു കഷ്ടം ഭാവിച്ചു. എനിക്കൊരു കുറച്ചിൽ തോന്നി.

"ഇതെന്നാ പതിവില്ലാതെ ബെഡ് കോഫി? " വിഷയം മാറ്റാനായി ഞാൻ ചോദിച്ചു.

"ബെഡ് കോഫിയൊന്നും അല്ലിച്ചായാ..... അതൊക്കെ ഞാൻ നിർത്തി... "
"ഇതേയ്‌... ഇച്ചായന്റെ ഏറ്റവും പ്രിയപ്പെട്ട ബ്രാൻഡാ.... "
"നമ്മക്ക് ഇതങ്ങോട്ട് പതിവാക്കാം. ഇനിയിപ്പോ കമ്പനിക്ക് നിങ്ങള് പൊറത്തോട്ടൊന്നും പോണ്ട. ഇവിടെ ഞാനൊണ്ടല്ലോ.... "

കർത്താവെ ഇവളിതെന്നാ ഭാവിച്ചാ... ഞാൻ വീണ്ടും വീണ്ടും ഞെട്ടി....
അവൾ കയ്യിലിരിക്കുന്ന ഗ്ലാസ് പുഞ്ചിരിയോടെ എന്റെ നേർക്ക് നീട്ടി. എന്റെ മനസ്സിൽ തലേ രാത്രിയിലെ സംഭവങ്ങൾ ഓരോന്നായി തെളിഞ്ഞു നിന്നു. കർത്താവായിട്ട് തന്ന സെക്കന്റ്‌ ചാൻസാ.. ഇനി ഒരു റിസ്‌ക്കിന് ഞാനില്ല.

"അതേയ്.... ഞാൻ കുടി നിർത്തി കേട്ടോ... " ഞാൻ അവളെ നോക്കി ഒരു വളിഞ്ഞ ചിരി പാസാക്കി.

"അതെന്നാ വാർത്താനാ ഇച്ചായാ...? ഇച്ചായൻ കുടി നിർത്തേ?? അങ്ങനെ ഒരു സുപ്രഭാതത്തിൽ നിർത്താൻ പറ്റുന്നതാണോ ഇച്ചായന് ഈ കുപ്പിയുമായുള്ള ബന്ധം??? ഇച്ചായൻ ഇത്ര സ്മരണ ഇല്ലാത്തവനാണോ? "

"അതും പോരാഞ്ഞു ഞാനൊന്ന് തുടങ്ങിയിട്ടല്ലേ യുള്ളൂ ഇച്ചായാ.... എനിക്കും ഒന്ന് പച്ചപിടിക്കണ്ടേ....?"

എന്റെ മാതാവേ ഇവള് രണ്ടും കല്പിച്ചാ...

"എടീ... മദ്യപാനം ആരോഗ്യത്തിനു ഹാനീകരം എന്നാ.... നിനക്കതറിയാവോ??? "

"അതൊക്കെ വിവരമില്ലാത്തവർ ചുമ്മാ പറയുന്നതല്ലേ....
ഇച്ചായൻ അതൊന്നും കാര്യമാക്കണ്ട.
ഇതൊന്ന് അടിച്ചു നോക്കിയേ... ഇത് കരളിന് ബെസ്റ്റാണത്രെ.... "

"എന്റെ കരള് നീയല്ലേ എന്റെ പൊന്നെ.... " ഞാൻ ഒരു കള്ളനോട്ടത്തോടെ പ്രലോഭനത്തിൽ നിന്ന് വിദഗ്ദമായി ഒഴിഞ്ഞു മാറി.

"ആഹാ... അങ്ങനെയായോ....? "
എന്നാ എന്റെ മോൻ ഇതങ്ങോട്ട് കുടിച്ചാട്ടെ.....
കട്ടൻ കാപ്പിയാ..... " അതും പറഞ്ഞു ഗ്ലാസും കയ്യിൽ തന്ന് ഒരു കള്ള ചിരിയും ചിരിച്ചു അവൾ അടുക്കള ലക്ഷ്യമാക്കി നടന്നു നീങ്ങുന്നത് കാര്യങ്ങളേതാണ്ട് പിടികിട്ടിത്തുടങ്ങിയൊരു പുഞ്ചിരിയോടെ ഞാൻ നോക്കി നിന്നു....

By Sheena Aami