സ്വസ്ഥം.

ഒരു നിശ്ചലാവസ്ഥയിൽ
ഉറപ്പിച്ചു നിർത്തണം മനസ്സിനെ.

മൗനം കൊണ്ടൊരു വാൽമീകം
ഏറെയായി മോഹിപ്പിക്കുന്നു.

സംസാരസാഗരത്തിൽ നിന്നുമകന്ന്
നിശബ്ദതയിൽ
അകം തിരയാനൊരു വ്യഗ്രത മുളപൊട്ടുന്നു.

ആത്മ നിർവൃതിയുടെ ഉൾക്കാമ്പുകണ്ടെത്താൻ.

ആനന്ദചിത്തനായ്
സഹജീവികളോട് സല്ലപിക്കാൻ
കഴിയുന്ന, നരജന്മത്തിന്റെ
രണ്ടാം വരവിനായ് തപം ചെയ്യണം.

മനുഷ്യരോട് അകലം പാലിക്കാത്ത വന്യമൃഗങ്ങളും പക്ഷികളും,
സംസാരിക്കുന്ന വൃക്ഷങ്ങളും,
മലിനമാവാത്ത ഭൂമിയും
സ്വപ്നം മാത്രമാവുമ്പോൾ.

ഈ കലികാലത്തിൽ നിന്ന് മോചനം കൂടിയേകഴിയൂ.

ബാബു തുയ്യം.