തീവണ്ടി

നാം രണ്ട് തീവണ്ടികളാണ്
ചുടുനിശ്വാസങ്ങളാല്‍
ഉളളിലെരിയുന്ന കനലിനെ
ഊര്‍ജ്ജമാക്കി മുന്നേറുന്നവര്‍

ഒരേ പാളത്തിലൂടെ എത്രവട്ടമാണ്
നാം കടന്നുപോയിട്ടുളളത്
ഒരേ സ്റ്റേഷനില്‍ എത്രയോതവണ
നാം കിനാവുകണ്ട് കാത്തുകിടന്നു

പൂപ്പാടങ്ങള്‍ക്കിടയിലൂടെയും
മലഞ്ചെരിവുകളിലൂടെയും
എത്രയോവട്ടം നാം പാട്ടുപാടി
കഥകള്‍ചൊല്ലി യാത്രചെയ്തിട്ടുണ്ട്

മഴയുളള രാത്രികളില്‍
ജനലരികില്‍ കെെകോര്‍ത്ത്
എത്രയോ രാത്രികള്‍ നാം അന്യോന്യം
ഉറങ്ങാതെ നോക്കിയിരുന്നിട്ടുണ്ട്

എന്നിട്ടും ഏതോ സ്റ്റേഷനില്‍വെച്ച്
ആരോ വഴിതിരിച്ചുവിട്ട തീവണ്ടിയായി നീ
ഒന്നും മിണ്ടാതെ മെല്ലെ ഓടിമറയുന്നത്
നിറകണ്ണോടെ നോക്കിയിരുന്നിട്ടുണ്ട് ഞാന്‍

അക്കരെ 'പച്ച' കണ്ടിട്ടാവാം നീ
ഓടിമറഞ്ഞതെങ്കിലും
ഇക്കരെ 'ചുവപ്പ് ' തെളിച്ച്
എത്രകാലം ഞാന്‍ കാത്തുകിടന്നു

ഒടുവില്‍ നിന്‍െറ നെറുകയില്‍
കപടദാമ്പത്യ സിഗ്നലായി ചുവപ്പ്
തെളിഞ്ഞപ്പോഴും ഒന്നുമറിയാതെ
അതേ ട്രാക്കില്‍ ഞാനോടുകയായിരുന്നു

ചതിയുടെ ട്രാക്കിലെന്നറിയാതെയാവും
പല തീവണ്ടികളും ഇന്നോടുന്നതും
അറിയുമ്പോഴോ അവ അലറിക്കരയും
പിന്നെ വീണ്ടും ചൂളംവിളിച്ച് കുതിക്കും

പുതിയ ആളുകള്‍ കയറും അവരോടൊത്ത്
വീണ്ടും യാത്രയാണ് പുതിയ ദൂരത്തേക്ക്
പഴയ തീവണ്ടി പുതിയ ദൂരങ്ങള്‍ താണ്ടും
പഴയ ഓര്‍മ്മകള്‍ ഏറെ പിന്നിലാകും

അറിയുമോ നിനക്ക് പരസ്പരം
അറിയാതെ നാം കാണാറുണ്ട്
ഒന്നും മൊഴിയാതെ മിണ്ടാറുണ്ട്
കാരണം നമ്മളൊരേ ട്രാക്കിലാണ്

ഇടക്കുവെച്ച് ഞാന്‍ ഓട്ടം നിര്‍ത്തി ചലനമറ്റ്
ഏതോ ട്രാക്കില്‍ നിന്നുപോയേക്കാം
ഒന്നുമറിയാതെ അതേ ട്രാക്കിലൂടെ
നീ അടുത്ത സ്റ്റേഷന്‍ തേടി പായുന്നുണ്ടാവാം

ഉളള് കത്തി നീറി പുകയുന്നുണ്ടാവാം
പുറമെ ചിരിച്ചുല്ലസിച്ച് ചൂളംവിളിച്ച് നീ
യാത്ര തുടരണം.. ഞാനുമങ്ങനെതന്നെ..
കാരണം നാം തീവണ്ടികളാണ്...!!

05/05/2019 .....ശ്രീരാജ് രാമചന്ദ്രന്‍....
09:54 am ©copyright protected