നിങ്ങളുടെ ഇന്ന്

നിങ്ങളുടെ ഇന്ന്
=================
എന്റെ ഒരു സുഹൃത്ത് പത്രം കിട്ടിയാൽ ഉടനെ ഒന്നും വായിക്കാതെ തന്നെ ഉൾപേജുകളിലേയ്ക്ക് പെട്ടന്ന് മറിച്ച് പോകുന്നത് കാണാം.
എത്ര വലുതാക്കി എഴുതിയ തലക്കെട്ട് ആയാലും ഇതു തന്നെ നടപടി.

ആകാംക്ഷ കൊണ്ട് ചോദിച്ചു.

ഇതെന്താ തലക്കെട്ട് വാർത്തയെല്ലാം നേരെത്തെ വായിച്ചോ?

ഏയ്, ആദ്യം എന്റെ തലവര ഒന്നു വായിക്കട്ടെ. എന്ന് പറഞ്ഞ് "നിങ്ങളുടെ ഇന്ന് " എന്ന കോളത്തിലേക്ക് പെട്ടെന്ന് പോയി.
എന്നിട്ട് വായിച്ച് നോക്കി
"എന്തായാലും ഇന്ന് കുഴപ്പം ഇല്ല ''

അതെന്താ?

കാര്യവിജയം, സന്തോഷം. ഇഷ്ട ഭക്ഷണ സമൃദ്ധി .എന്നിവ കാണുന്നു. ഇങ്ങനെ കിട്ടാറില്ല.

എനിക്ക് മുഖത്ത് ചിരി വന്നു. ഈ പാവത്തിന്റെ ഭാവി ഇത്
എഴുതുന്നവന്റെ കയ്യിലാണല്ലോ? അയാൾക്ക് എന്നും നല്ലത് എഴുതാൻ തോന്നണേ.

ഇന്നലെ അപ്പോൾ എങ്ങനെയുണ്ടായി?

ഇന്നലെ എന്താ പറ്റിയത് എന്നറിയില്ല. നാൾ പ്രകാരം ധനലാഭം ഉണ്ടായിരുന്നു.അതു കാരണം ഉള്ള കാശിനു ലോട്ടറി എടുത്തു.ഉള്ളത് എല്ലാം പോയി. അത് ചില കൂറ് കണക്കിലുള്ള മാറ്റമാകും.

ഞാൻ തിരുത്താൻ പോയില്ല. കാരണം ഇന്ന് എല്ലാം നല്ലത് എഴുതിയ സന്തോഷത്തിലാണ് ആ പാവം.
കിട്ടിയ മനോബലം എന്തിനാ കളയുന്നേ.

ധൈര്യമായ് പോ, ഇന്ന് ശരിയാകും. അയാളുടെ മുഖത്ത് പെരുത്ത് സന്തോഷം.

ഞാനും കരുതി ഇന്ന് ഇങ്ങനെ പോകട്ടെ.
നാളെ വിഷമം പറയുകയാണെങ്കിൽ പറയാം
" ഇതൊന്നും നോക്കി ജീവിതം പാഴാകണ്ട " എന്ന്.

മനസ്സിൽ തോന്നി എന്തായാലും ഇത് എഴുതുന്നവർക്ക് നല്ലത് മാത്രം എഴുതിയാൽ പോരെ.
അത് വായിക്കുന്നവർക്ക് ഒരു മനോബലം കിട്ടല്ലോ. അങ്ങിനെയെങ്കിലും ഒരു സൽകർമ്മം !

By: ഷാജു തൃശ്ശോക്കാരൻ