പ്രതികരിക്കുക

പതിവിലും നേരത്തേ എഴുന്നേറ്റ് പല്ലും തേച്ചു കുളിയും വീട്ടുജോലിയും ഒക്കെ കഴിഞ്ഞു പ്രഭാതഭക്ഷണവും കയ്യിൽ പിടിച്ച് നേരെ വന്നു ടെലിവിഷൻ വെച്ചതും ഒരു ചാനലിൽ ഒരു സ്ത്രീ ഇരുന്നു വലിയ സ്റ്റൈയിലിൽ പറയുന്നു, ഞാൻ എന്റെ മക്കളുടെ പിറന്നാൾ ആഘോഷമൊക്കെ ഏതെങ്കിലും അനാഥാലയത്തിൽ വെച്ചാണ് ആഘോഷിക്കാറുള്ളതെന്ന്.എനിക്കതു കേട്ടപ്പോൾ കട്ടക്കലിപ്പാ വന്നത്. എന്തുകൊണ്ടോ എനിക്കാ പ്രവർത്തിയോട് ഒട്ടും താൽപ്പര്യം ഇല്ല. പല പ്രമുഖ വ്യക്തികളും ( സത് പ്രവർത്തി എന്നു അവർ വിശേഷിപ്പിക്കുന്ന) ഈ പറഞ്ഞ പ്രവർത്തി ചെയ്യാറുണ്ട്. എന്തിനാണ്‌ അനാഥരായവരുടെ മുൻപിൽ കൊണ്ട് പോയി കേക്ക് മുറിക്കലും ആശംസ അർപ്പിക്കലും ഒക്കെ ചെയ്യുന്നത്. എന്റെ അഭിപ്രായത്തിൽ ആ പ്രവർത്തി അവർക്ക് വേദനയേറിയ അനുഭവം ആയിരിക്കും. ആശംസകൾ അർപ്പിച്ചു അവർ കൂടെ ചേരുമെങ്കിലും ഉള്ളിൽ അവർ അവരുടെ ആഘോഷങ്ങളുടെ നഷ്ടങ്ങളെ കുറിച്ചോർത്തു ദുഃഖിക്കുകയാവും. അതുകൊണ്ടു അത്തരം പ്രവർത്തികൾ ചെയ്യാതിരിക്കാനാണ് നമ്മൾ സനാഥർ ശ്രദ്ധിക്കേണ്ടത്. (ഇതു എന്റെ മാത്രം അഭിപ്രായമാണ്.) പിറന്നാൾ ദിവസം അങ്ങനെ ഉള്ളവർക്ക് എന്തെങ്കിലും ചെയ്യണമെന്ന് ആഗ്രഹം ഉള്ളവർ ഒരു നേരത്തെ ഭക്ഷണം കൊടുക്കുക. അവരെ കൂടി പങ്കെടുപ്പിച്ചു കൊണ്ട് എന്തെങ്കിലും കലാപരിപാടികളോ കളികളോ ഒക്കെ നടത്തി ആ ദിവസം അവർക്ക് കുറച്ചു സന്തോഷം കൊടുക്കുക. അതാവും അവർക്ക് കൊടുക്കാൻ നമ്മെ കൊണ്ടു പറ്റുന്ന സ്നേഹം.ആ സമയത്തു അവരുടെ മനസ്സിനുണ്ടാകുന്ന സന്തോഷം ആവണം നമ്മുടെ പിറന്നാൾ സമ്മാനവും. ആ സമ്മാനം നമ്മുക്ക് ഈശ്വരൻ തരുന്നതാണ്. പിറന്നാൾ ആഘോഷമാണെന്നു അവരെ അറിയിക്കാതെ തന്നെ ആ പ്രവർത്തി ചെയ്യുന്നതാവും നല്ലത്‌.

എന്നെ പോലെ ഉള്ള സാധാരണക്കാർക്ക് ഇങ്ങനൊക്കെ അല്ലേ പ്രതികരിക്കാൻ പറ്റൂ.... അങ്ങോട്ടു പ്രതികരിക്കുക തന്നെ അല്ലേ......😊

മഞ്ജുഅഭിനേഷ്, 6/5/2017,10 :15 Am