ആത്മസഖി

ആത്മസഖി

ആയിരം ദീപങ്ങൾ മിഴി ചിമ്മി നിൽക്കുന്ന,
അമ്പല നടയിൽ വച്ചൊരു സന്ധ്യാ നേരത്ത്,
ആദ്യമായ് കണ്ടു എൻ സഖിയെ.
ആദ്യമായ് കണ്ടു എൻ സഖിയെ.

ആ മുഖം ആദ്യമായ് കണ്ടു നിന്നപ്പോൾ,
ആത്മാവിൽ കുളിർ മഴ പെയ്ത പോലെ.
ആ നിമിഷം ഞാൻ കുറിച്ചിട്ടു മനസ്സിൽ,
അവളാന്റെ ആത്മസഖി.
അവൾ മാത്രമാണെന്റെ ആത്മസഖി .

അന്തിവെയിലിന്റെ പൊൻപ്രഭയേറ്റ്,
അരുണാഭമായ മുഖശ്രീയോടെ,
അരളിയും,ചെത്തിയും,ചെന്താമരയും'
അരുമയോടെ വച്ച പൂത്താലവുമായ്,
അവൾ വരുന്നതും കാത്തു ഞാൻ നിന്നു,
അമ്പല മുറ്റത്തെ ആൽമരചോട്ടിൽ.

അഷ്ടപദിയുടെ രാഗലയങ്ങൾ,
അലയടിക്കുന്ന ഈ ധന്യ വേളയിൽ,
ആട്ടവിളക്കിന്റെ അരണ്ട വെളിച്ചത്തിൽ,
അവളുടെ കണ്ണുകൾ കഥ പറയുന്നത്,
ആരോരും കാണാതെ കണ്ടു ഞാൻ നിന്നു,
ആത്മ ഹർഷത്തോടെ കണ്ടു നിന്നു.

അഷ്ടമി രോഹിണി നാളിൽ,
അമ്പാടി കണ്ണൻറെ തിരുനടയിൽ ,
അഞ്ജനമെഴുതിയ കണ്ണുകൾ പൂട്ടി,
അഞ്ജലിബദ്ധയായ് അവൾ നിന്നു ,
ആരാധനയോടെ ഞാൻ അരികെ,
 അവളുടെ കാർവർണനായ്.

രാധാ ജയചന്ദ്രൻ, വൈക്കം.
05.03.2017.