ഒരു ചെറിയ കയ്യബദ്ധം

ഇന്ന് വല്ലാതെ വേദനിപ്പിച്ച ഒരു ദുരന്ത വാർത്ത അറിഞ്ഞാണ് നേരം
വെളുത്തത് .
ഒരു ചെറിയ കയ്യബദ്ധം കൊണ്ടുണ്ടായ വലിയ ദുരന്തം .
കൊക്കിൽ ജീവനുള്ള കാലത്തോളം അതിനു കാരണക്കാരിയായ ആൾക്ക് മറക്കാനാവാത്ത പിന്നെയും പിന്നെയും കുത്തി നോവിക്കുന്ന സംഭവം .

വിധി എന്ന് പറഞ്ഞു ആശ്വസിക്കാൻ പോലും ആവാത്ത ദുരനുഭവം
ഒരു അമ്മയ്ക്കും സഹിക്കാവുന്നതിലും അപ്പുറമുള്ള ഒരു ദുര്യോഗം .

ഇത് നിങ്ങളുമായി പങ്കു വെക്കുന്നത് ഒരു പോസ്റ്റിനുള്ള വിഷയം എന്ന നിലക്കല്ല .
ഇത് വായിക്കുന്ന മറ്റൊരു അമ്മയ്ക്കും കുഞ്ഞിനും ഇങ്ങനെ ഒരു അനുഭവം വരരുതേ അതിനു അവസരം ഉണ്ടാവരുതേ എന്ന നല്ല ഉദ്ദേശ്യത്തോടെ മാത്രം .

ദുരന്തം നടന്നത് ഇങ്ങനെ . കുഞ്ഞിനു മുലകൊടുത്തു അമ്മ ഉറങ്ങിപ്പോയി .
കുടിച്ചു കുടിച്ചു ഓവർ ഫ്ലോ ആയി പാൽ ശ്വാസ കോശത്തിൽ എത്തി .
കുട്ടി നീല നിറം ആയി .
വളരെ വൈകി മാത്രം ഉണർന്ന അമ്മ കണ്ടത് നീല കളറുള്ള
കുഞ്ഞിനെയാണ് .
ഹോസ്പിറ്റലിൽ എത്തിച്ചു . പക്ഷേ കുഞ്ഞു എപ്പോഴോ മരിച്ചിരുന്നു .
എന്റെ ഒരു സുഹൃത്തിന്റെ അളിയന്റെ കുട്ടിയാണ് അതി ദാരുണമായി മരിച്ചത് .

വിവാഹം കഴിഞ്ഞിട്ട് ഒരു വർഷം കഴിഞ്ഞതേയുള്ളൂ . ആദ്യത്തെ കണ്മണിയാണ് ഇങ്ങനെ ഒരു കണ്ണീർ മണിയായി ഈ ലോകത്ത് നിന്നും യാത്രയായത് .
കുട്ടിക്ക് പേര് പോലും ഇട്ടിട്ടില്ലായിരുന്നു .

ഇത്തരം ദുരന്തങ്ങൾ വരാതിരിക്കാൻ അമ്മമാർ ശ്രദ്ധിക്കേണ്ട കുറച്ചു കാര്യങ്ങൾ ഉണ്ട് .
കുട്ടിക്ക് കിടന്നു കൊണ്ട് ഒരിക്കലും മുല കൊടുക്കരുത്
കാരണം പ്രസവ സംബന്ധമായ വിഷമങ്ങളും ശാരീരിക ക്ഷീണവും കാരണം അറിയാതെ ഉറങ്ങി പോകാനുള്ള സാധ്യത ഏറെയാണ്‌ . കുട്ടിക്ക് മുലകുടിക്കാനല്ലാതെ മറ്റൊന്നിനും കഴിവില്ലാത്ത പ്രായമാണ് . ശ്വാസ കോശത്തി ലേക്ക് നേരിയ വല്ലതും പ്രവേശിക്കുമ്പോഴേക്കും കാര്യമായി ചുമക്കാനോ തുമ്മാനോ കുട്ടിക്ക് കഴിയില്ല . അത് കൊണ്ട് ഒരിക്കലും കിടന്നു കൊണ്ട്
മുലയൂട്ടരുത് .

അമ്മ ഇരുന്നു വേണം കുട്ടിക്ക് മുല കൊടുക്കാൻ
തല അല്പം പൊക്കി വെച്ച് ആവണം.
പണ്ട്
കാലത്ത് ഇതൊക്കെ പറഞ്ഞു കൊടുക്കാൻ ഉമ്മമാരും അമ്മൂമ്മമാരും
ഉണ്ടായിരുന്നു. ഇന്ന് മിക്ക വീടും അണുകുടുംബം ആണല്ലോ.

സത്യത്തിൽ മുലയൂട്ടുന്നത് അമ്മ കൂടി ആസ്വദിച്ച് വേണം . ശ്രദ്ധിച്ചും .
ഒരു പാട് നേരം കൊടുക്കാതെ ഇടയ്ക്കിടെ കൊടുക്കണം
മുല യൂട്ടി കഴിഞ്ഞാൽ തോളിൽ ഇട്ടു പുറത്തു രണ്ടു കൊട്ട് കൊടുക്കണം .
പാൽ വയറ്റിലേക്ക് സുഗമമായി ഇറങ്ങിപ്പോകാൻ ഇത് ആവശ്യമാണ് .

ഇരുന്നു കൊടുക്കുമ്പോൾ ഇത്തരം അപകടങ്ങൾക്ക് ഉള്ള സാധ്യത ഇല്ലാതാവുന്നു .

വേറെ ഒരു കാര്യം കൂടി ശ്രദ്ധിക്കണം . മുല കൊടുക്കുമ്പോൾ മുലക്കണ്ണ് മാത്രം കുട്ടിയുടെ വായിൽ വരത്തക്ക വണ്ണം രണ്ടു വിരൽ കൊണ്ട് മുലക്കണ്ണി നു ചുറ്റും പിടിച്ചു വേണം കൊടുക്കാൻ .
അല്ലെങ്കിൽ മുല അമർന്ന് ശ്വാസം കിട്ടാതെ കുട്ടി മരിക്കാനും സാധ്യതയുണ്ട് . ഇതും കിടന്നു കൊണ്ട് കൊടുക്കുമ്പോൾ സംഭവിക്കാവുന്ന അപകടം ആണ് .

അത് കൊണ്ട് സൂക്ഷിക്കുക .
ദൈവം നമുക്ക് നൽകുന്ന അമൂല്യമായ സമ്മാനം നമ്മുടെ അശ്രദ്ധ കൊണ്ടോ
അറിവില്ലായ്മ കൊണ്ട് നഷ്ടപ്പെടാതിരിക്കട്ടെ ..

തന്റെ അശ്രദ്ധ കാരണം തന്റെ കുഞ്ഞു മരിക്കുക എന്നതിൽ കവിഞ്ഞ ഒരു ദുഃഖം ഈ ലോകത്ത് മറ്റെന്തെങ്കിലും ഉണ്ടോ ഒരു അമ്മയ്ക്ക് .
അതും ജനിച്ചു വീണിട്ടു ഏതാനും ദിവസം മാത്രം ആയ പിഞ്ചു കുഞ്ഞ് .

- ഉസ്മാൻ ഇരിങ്ങാട്ടിരി