മനസ്സിലെ മഴ

മഴയത്ത് നനഞ്ഞതും,
കളിവഞ്ചിയുണ്ടാക്കി
മഴവെളളത്തിലിട്ടതും,
സ്കൂളിൽ പോകാതിരിക്കാൻ
ചാറ്റൽ മഴ കൊണ്ടതും ,
മഴയത്ത് ഉണങ്ങാത്ത
ഉടുപ്പുകളുടെ ഗന്ധവും,
മഴ പോലെ സുഖമുള്ള
ഓർമയായിരുന്നു..

ഒരു മഴക്കാലത്ത്
പെട്ടെന്നു പെയ്ത മഴയിൽ
ഞാൻ നനഞ്ഞപ്പോൾ,
എന്നിലലിഞ്ഞ എന്റെ വസ്ത്രങ്ങൾ
എന്നെ ലജ്ജിപ്പിച്ചതും,
മഴയത്ത് ഒരു കുടക്കീഴിൽ തളിരിട്ട
എന്റെ പ്രണയവും,
പിന്നെ അവന്റെതായി
അവന്റെ നെഞ്ചിന്റെ
ചൂടുപറ്റി കിടന്നപ്പോൾ,
പുറത്തു താളത്തിൽ പെയ്ത മഴയും
എന്റെ മനസ്സിനെ കുളിരണിയിച്ചിരുന്നു.

പിന്നെ ഒരു നാൾ കാലം തെറ്റി
പെയ്ത മഴയിൽ,
എന്റെ ജീവന്റെ ജീവൻ
എന്നെ വിട്ടു പിരിഞ്ഞപ്പോൾ,
മഴ തോർന്നിട്ടും തോരാത്ത
എന്റെ കണ്ണീർ മഴയിൽ,
ആദ്യമായി അറിയാതെ ഞാൻ
മഴയെ ശപിച്ചു പോയി...........

രേവതി രൂപേഷ് (രേരു )