ആൺതുണ

......

നരേന്ദ്രൻ മരിച്ചു. ഒപ്പത്തിനൊപ്പം ഓടിക്കൊണ്ടിരുന്ന ഹൃദയം ഒറ്റയടിക്ക് ഓട്ടം നിർത്തിയതാണ് മരണകാരണം.
വലിയില്ല, കുടിയില്ല, കൊഴുപ്പില്ല, പഞ്ചാരയില്ല, രക്തസമ്മർദ്ധമില്ല...
പിന്നെങ്ങനെന്ന് ചോദിച്ചാ..... ഓടിത്തളർന്നപ്പം അതങ്ങ് നിന്നു അത്രതന്നെ. നാട്ടുഭാഷേപ്പറഞ്ഞാ തലേലെഴുത്ത് അല്ലാണ്ടെന്താ....

കമല കരയുന്നു.. മരണമെന്തെന്ന് അറിയാൻ പാകമാകാത്ത മകൻ വയറ് വിശന്നപ്പോ അവനമ്മിഞ്ഞ ചോദിച്ചു അതുകേട്ടവളാർത്തു കരഞ്ഞു.

നാട്ടുപെണ്ണുങ്ങളുടെ നാമം ചൊല്ലലിന്
നടുവിലാണ് നരേന്ദ്രൻ.
മൂന്നാലു ദിവസം പഴക്കമുള്ളതായിട്ടാകണം നാമം ചുരുക്കിചൊല്ലാൻ നാട്ടുപ്രമാണി കനകാംബരൻ നാമപ്രമാണി കനകയുടെ ചെവിയിലോതി.

നരേന്ദ്രനേ കാണാൻ വന്നവർ നാമം ചൊല്ലുന്ന ഭാഗത്തേയ്ക്കും കമലയുടെ കരച്ചിൽ കേൾക്കാൻ വന്നവർ അടുക്കളവഴി അപ്പുറത്തേക്കും പോയി.

കമലയുടെ ചുറ്റും നിന്നവരിൽ ചിലർ താടിക്ക് കൈകൊടുത്തു, ചിലർ പിറുപിറുത്തു, ചിലർ വിതുമ്പി, ചിലർ കുഞ്ഞുമോന്റെ തലയിൽ തലോടി.

നരേന്ദ്രനേ തെക്കോട്ടെടുത്തപ്പോ കമല വാവിട്ട് കരഞ്ഞു. അമ്മ കരഞ്ഞപ്പോ കാര്യമറിയാതെ ആ കുഞ്ഞു പൈതലും കരഞ്ഞു.

കുഴിക്കരയിൽ കുഞ്ഞിന്റെ കൈപിടിച്ച് കർമ്മം ചെയ്യിക്കുന്നത് കണ്ടപ്പം വിതുമ്പി നിന്നവർ വാവിട്ട് കരഞ്ഞു.കരച്ചിലിനിടയിൽ ചിലർ വാച്ചിൽ നോക്കുന്നുണ്ടായിരുന്നു.

മായംകണ്ടത്തിലെ കമലാക്ഷി തന്റെ കരച്ചിൽ ബ്രേക്കിട്ട് നിർത്തി അടുത്തുനിന്ന കൂടേത്തേ സരളയുടെ കൈപ്പൊയത്ത് മാന്തി.
കരച്ചിൽ നിർത്താതെ സരള കമലാക്ഷിയേ രൂക്ഷമായി നോക്കി
ഇച്ചായി.... എനിക്ക് പശുനേ കറക്കണം ഞാനങ്ങ് പോവാ...

സരള തലകുലുക്കി അനുവാദം നൽകി
കമലാക്ഷി പിറകിലേക്ക് വലിഞ്ഞ് സ്ഥലം കാലിയാക്കി.
നരേന്ദ്രന്റെ ചിതയിൽ തിരിതെളിഞ്ഞപ്പോൾ നെടുവീർപ്പുകൾ ചിഹ്നഭിന്നമായി.

നരേന്ദ്രന്റെ സഞ്ചയനം മുതൽ കമല കേൾക്കാൻ തുടങ്ങിയതാണ്
മോളേ... നീ ചെറുപ്പമാണേ...
മോളേ... നീ ഒറ്റയ്ക്കാണേ....
മോളേ നിന്റെ മോനൊരച്ഛനേ വേണേ..
മോളേ... നിനക്ക് ഒരു കൂട്ടു വേണം ട്ടോ.
എന്നൊക്കെ...

കാണുമ്പോഴൊക്കെ അത് ആവർത്തിച്ചു പലരും.
കമലയ്ക്ക് ഒരു മറുപിടി മാത്രം അപ്പു വളരട്ടേന്ന്....
പിന്നെയും പലരും ഉപദേശിച്ചു മോളേ നീ ബുദ്ധിമോശം കാണിക്കല്ലേന്ന്.

അപ്പു വളർന്ന് സ്വന്തം കാലിൽ നിൽക്കാറായി എന്ന് കമലയ്ക്ക് തോന്നിയ ഒരു ദിവസം അവളവനോട് ചോദിച്ചു
മോനേ.... അമ്മയ്ക്ക് ഒരു കൂട്ടു വേണമെന്ന് തോന്നിത്തുടങ്ങിയിരിക്കുന്നു.
ഒരാൾ അമ്മയ്ക്ക് കൂട്ടാവാമെന്ന് സമ്മതിച്ചിട്ടുണ്ട്.
ആ... ആളേ അമ്മ കൂട്ടാക്കുന്നതിൽ മോന് എന്തെങ്കിലും വിരോധമുണ്ടോ..?

ഇല്ലമ്മേ.... ഒരിക്കലുമില്ല അമ്മയ്ക്ക് ഒരു കൂട്ടുവേണമെന്നത് എന്റെയും ആഗ്രഹമാണ്. ഞാൻ വയറ്റിപ്പിഴപ്പിനായി എവിടേയ്ക്കെങ്കിലും പോയാൽ അമ്മ ഉറ്റയ്ക്കാകും അതിനാൽ അമ്മയിത് പണ്ടേ ചിന്തിക്കേണ്ടിയിരിന്നു....
അപ്പു പറഞ്ഞു നിർത്തി.

മോനേ...അന്നമ്മയ്ക്ക് ഒരു കൂട്ടുണ്ടായാലും... ഇന്നമ്മയ്ക്ക് ഒരു കൂട്ടുണ്ടായാലും പലരും പലതും പറയും.. നമ്മുടെ നാടല്ലേ.
അന്നമ്മയ്ക്ക് നിന്നേ വളർത്തിയെടുക്കാൻ പലതും ഉപേക്ഷിക്കേണ്ടത് അനിവാര്യമായിരുന്നു.
സമൂഹത്തിനേ അന്ന് എനിക്ക് പേടിയായിരുന്നു.
ഇന്നെനിക്ക് ആരേയും പേടിയില്ല നിന്റെ സമ്മതം മാത്രം മതി.

പാൽ സൊസൈറ്റിയിലായിരുന്നു കമലയ്ക്ക് ജോലി.പാലെടുക്കാൻ വരുന്ന വണ്ടിയിലെ ഡ്രൈവർ അനീഷാണ് കമലയെ കൂടെക്കൂട്ടാമെന്ന് പറഞ്ഞത്.
തന്റേതല്ലാത്ത കാരണത്താൽ ഭാര്യയുമായി പിണങ്ങി കഴിയുകയാണ് അനീഷ്.

അറിഞ്ഞവരറിഞ്ഞവർ മൂക്കത്ത് വിരൽ വച്ചു സഹപ്രവർത്തകർ പോലും. കമലയെ മണത്ത്നടന്ന ചില മുട്ടനാടുകൾക്കായിരുന്നു കൂടുതൽ സോക്കേട്.

ഇവൾക്കിതെന്തിന്റെ കേടാ....?
മുതുകൂത്ത് അല്ലാണ്ടെന്താ പറയുക.
വയസ്സുചെന്നപ്പഴാ അവടെ ഒരു പ്രേമം.
ഓ... ഇതവന്റെ കയ്യിലേ കാശ് കണ്ടോണ്ടാ...
ഇങ്ങനെ നീളുന്നു മാളോരുടെ ഡയലോഗുകൾ.

കമല എല്ലാം കേട്ട് ചിരിച്ചുതള്ളി.
ഒരിക്കൽ എതിരേ വന്ന നാരായണിയേടത്തി ചോദിച്ചു
എടീ.... പെങ്കൊച്ചേ ഞാനീ കേട്ടതൊക്കെ നേരാണോടീ...?

എന്താ... നാരായണിയേടത്തി കേട്ടത്...?

നിന്റെ പുതിയ സമ്മന്തക്കാരന്റെ കാര്യമാ ചോദിച്ചത്.

ആ... അത് ശരിയാ നാരായണിയേടത്തീ... ആലോചിച്ചപ്പോ ഇനിയൊരു ആൺതുണ വേണമെന്ന് തോന്നി.

ഹാ..... നീയാ കൊച്ചനേക്കുറിച്ചോർത്തില്ലല്ലോടീ അവനെന്തു വിചാരിക്കുമെടീ...?

ന്റെ... നാരായണിയേടത്തി ഞാനവനേ ഓർത്താ ഇതുവരെ ഇത് ചിന്തിക്കാതിരുന്നത് ഇപ്പം അവന്റെ സമ്മതത്തോടാ ഈ തീരുമാനമെടുത്തത്.

പിന്നെ നാരായണിയേടത്തി ഒരു 20 വർഷം മുന്നേ എന്റെ പിറകേ എത്ര വട്ടം നടന്നതാ മോളേ നിനക്കൊരു ആൺതുണ വേണ്ടേടീന്നും ചോദിച്ചോണ്ട്..
പിന്നെന്താ ഇപ്പം ഇങ്ങനെ...?

ഡീ.... അന്ന് നിന്റെ പ്രായത്തേ ഓർത്താടീ ഞാനങ്ങനെ പറഞ്ഞത് ഇതിപ്പം.....

എന്ത് ഇതിപ്പം....? എനിക്ക് 44 വയസ്സേ ആയിട്ടുള്ളു നാരായണിയേടത്തി.
പിന്നെ ഒരു ആൺതുണ എന്നത് അന്തിക്കൂട്ടിന് മാത്രമാണെന്ന ധാരണ തെറ്റാണ്.
ആ തുണയ്ക്ക് പ്രായം ഒരു തടസ്സമാകില്ല.

എന്തിന്... നാരായണീയേടത്തീടെ കാര്യം തന്നെയെടുക്കു.
ഒരു മകനുള്ളത് ഭാര്യവീട്ടിലല്ലേ താമസം...? നാരായണിയേടത്തി പശൂനേ വളർത്തീം... കൂലിപ്പണി ചെയ്തും ഒക്കെയല്ലേ ജീവിക്കുന്നത്.
ഒറ്റയ്ക്ക് താമസിക്കുന്ന60 വയസ്സുള്ള നാരായണിയേടത്തിയുടെ കതകിന് രാത്രിയായാൽ തട്ടലുണ്ടെന്ന് നാരായണിയേടത്തി എന്നോട് പറയാറുണ്ടല്ലോ...?
ഒരാൺതുണ ഉണ്ടായിരുന്നേൽ ആ തട്ടൽ ഉണ്ടാകുമായിരുന്നോ...?

ന്റെ.... നാരായണിയേടത്തി..... കൂടെക്കിടക്കാൻ മാത്രമല്ല ഒരു പെണ്ണിന് ആണിനേ വേണ്ടത്. ഏതൊരു പെണ്ണിനും ഒരാൺതുണ ഉള്ളത് ഒരു വലിയ ധൈര്യമാ. ഒരാൺതുണയുള്ള പെണ്ണിന് ഈ ലോകത്തോട് തന്നെ പോരാടാനുള്ള ചങ്കുറപ്പുണ്ടാകും.

നാരായണിയേടത്തി തലയും കുനിച്ച് നടന്നകന്നു.

നീ.... ആരോടാ കമലേ... ഈ പറയുന്നത്... നിനക്ക് വേറേ ഒരു പണിയുമില്ലേ. ഇത് നമ്മുടെ നാടല്ലേ.. ഇവിടിങ്ങനൊക്കെയല്ലേ...
അപ്പൊപ്പിന്നെ നിനക്ക് നല്ലതെന്ന് തോന്നുന്നത് നീയങ്ങ് ചെയ്യുക അത്രതന്നെ..

ഈ... പറഞ്ഞത് കാര്യമറിഞ്ഞപ്പം ഞാൻ കമലയോട് പറഞ്ഞതാണേ അല്ലാണ്ട് എനിക്കെങ്ങും വയ്യാ എല്ലാരേം പോലെ കമലയെ കുറ്റപ്പെടുത്താൻ......

നൂറനാട് ജയപ്രകാശ്.....