=സ്മാൾ =

സ്മാൾ അടി ഇടക്കൊക്കെ ഉണ്ടെങ്കിലും ഞാൻ സിഗരറ്റ് വലിക്കാറില്ല. കാരണം മദ്യം ,അത് കഴിക്കുന്ന ആളിനെ മാത്രമേ ബാധിക്കു. സിഗരറ്റ് അങ്ങനെ അല്ല. വലിച്ചു കേറ്റുന്ന നമ്മുടെ ശ്വാസകോശം സ്പോഞ്ച് പോലെ ആക്കുന്നത് മാത്രമല്ല അടുത്ത് നിൽക്കുന്ന ശരാശരി മലയാളിയുടെ ലംഗ്‌സ് എടുത്തു പിഴിഞ്ഞാൽ ഒരു ഗ്ലാസ് നിറയെ കറ കിട്ടുന്ന അവസ്ഥയിലാക്കുകയും ചെയ്യും. അത് കൊണ്ടാണ് ഞാൻ അത് വേണ്ടെന്നു വെച്ചത്.

പാലക്കാട് ജോലി ചെയ്തിരുന്ന കാലത്ത് കാന്റീനിൽ പോയി ചായ കുടിച്ചതിനു ശേഷം കുറെ വലിയന്മാർ എനിക്ക് ചുറ്റും നിരന്നു നിന്ന് മത്സര ബുദ്ധിയോടെ വലിയോട് വലിയായിരുന്നു, കട്ടപ്പുകയുടെ മദ്ധ്യത്തിൽ നിന്നും കൊണ്ട് സഹികെട്ട ഞാൻ ഒരിക്കൽ ഉറക്കെ ചോദിച്ചു,

ഈ നരകത്തിനിതെന്തു പറ്റി, ചിലടത്തു ചാരം,ചിലടത്തു പുക,എന്താ ആരും ഒന്നും മിണ്ടാത്തത് ,

അപ്പോൾ പുക വലിയന്മാർ എന്നോട് മിണ്ടി, നിനക്ക് സിഗരറ്റ് വേണ്ടെങ്കിൽ ഓഫീസിൽ പോടെ, ഇനി ഇവിടെ നിന്നു വാചകമടിച്ചാൽ നീ വലിയ വില കൊടുക്കേണ്ടി വരും, വലിയ വില

നന്നായി സംസാരിക്കുന്നതിനിടെ റൺ ഔട്ട് ആവേണ്ടി വരുന്നത് എന്തൊരു കഷ്ടമാണ് എന്ന് പറഞ്ഞു കൊണ്ട് ഞാൻ ഓഫീസിലേക്ക് പോയി

സത്യത്തിൽ ഞാനും കുറച്ചു കാലം സിഗരറ്റ് വലിച്ചിരുന്നു.പണ്ട്. പ്രീ ഡിഗ്രി സമയത്ത് . അധിക കാലമില്ല, ഏകദേശം രണ്ടു മാസത്തോളം. അതിനു കാരണമുണ്ട്, ചെട്ടികുളങ്ങരയിലെ ഒരു സുഹൃത്ത് , മണി എന്ന മഹേഷ്,കോയമ്പത്തൂർ പഠിക്കാൻ പോയ അവനെ പത്താം ക്ലാസ് കഴിഞ്ഞ് ഇങ്ങോട്ടു കെട്ടിയെടുത്തത് ഒന്നാന്തരം ഒരു സിഗരറ്റ് വലിക്കാരൻ ആയിട്ടായിരുന്നു ,ഒടുക്കത്തെ ഇംഗ്ളീഷും.രവി എന്നുള്ള എന്റെ നിക്ക് നെയിം പോലും അവൻ വികൃതമാക്കി

ചാലയിൽ പോയി വിൽസ് പാക്കറ്റ് വാങ്ങിച്ചു കൊടുക്കുന്നതല്ലാതെ, അച്ഛൻ വലിക്കുന്നത് കണ്ടു നില്ക്കാൻ പോലും അനുവാദം ഇല്ലാത്ത ഞാൻ അവന്റെ ഡയലോഗ് കേട്ട് കണ്ണ് തള്ളി

ഴവീ, താൻ ഇത് വരെ ടുബാക്കോ ടേസ്റ്റ് ചെയ്തിട്ടേ ഇള്ളാ ?

ഇള്ള ,ശേ, ഇല്ല

അയ്യേ ....പിറ്റീ ഓൺ യൂ മാൻ. ഗ്രോ അപ്പ് ....ടേസ്റ്റ് ടുബാക്കോ,,,,എൻജോയ് ലൈഫ്

ഓ തന്നെ,,,,

മാൾബറോ ഈസ് മൈ ഫേവറിറ്റ് , നല്ല രുചി ആണ് ,ഇവിടെ ചാർമിനാർ....പനാമ ആൾസോ ഓക്കേ, കടുപ്പമുള്ള, സൂപ്പർ ടേസ്റ്റ് ഉള്ള ടുബാക്കോ .....വിൽസ് ഈസ് ടൂ ലൈറ്റ്

തന്നേ?

എന്ത് തന്നേ ? ഞാൻ മാൾബറോ തരാം, എൻജോയ് ടുബാക്കോ,ഇറ്റ്സ് ടേസ്റ്റ് ,

തന്നേ?

ഡോ, അതൊന്നു രുചിച്ചു നോക്കാൻ.....പിന്നെ താൻ അഡിക്റ്റ് ആവും ഴവീ

മണി അകത്തു പോയി ഒരു സിഗരറ്റ് കൊണ്ട് തന്നു, പിന്നെ അകത്തേക്ക് പോയി, അഞ്ചു മിനിറ്റ് കഴിഞ്ഞു പുറത്തു വന്നപ്പോൾ ഞാൻ ഇഞ്ചി കടിച്ച കുരങ്ങനെപ്പോലെ ഇരിക്കുന്നു,

ഇതാ ലൈറ്റർ....ഹേ സിഗരറ്റ് എവിടെ?

റബ്ബർ ബോൾ തിന്നുന്ന പശു സംസാരിക്കുന്ന പോലെ ഞാൻ പറഞ്ഞു,

അത് ഞാൻ തിന്നു..

വാട്ട് ? തിന്നോ?

നല്ല രുചിയാണ് , ടേസ്റ്റ് ആണ് എന്നൊക്കെ പറഞ്ഞപ്പോ കൊതിയോടെ തിന്നതാ, പക്ഷെ എരിഞ്ഞു ചത്ത്,,കൊള്ളുവേ ഇല്ല

വാട്ട് ദ....യൂ ഇഡിയറ്റ് ,ഞാൻ തിന്നാൽ ഉള്ള രുചി അല്ല പറഞ്ഞത്, വലിച്ചാൽ പുകയുടെ രുചി...താനൊക്കെ എവിടന്നു വരുന്നെടോ ,ആ ഫിൽറ്റർ എവിടെ

ങേ?

മൂട്ടിലെ പഞ്ഞി

അത് തുപ്പിക്കളഞ്ഞു, ദോണ്ടേ

ഭാഗ്യം....അതെങ്കിലും താൻ ബാക്കി വെച്ചല്ലോ....ഏതായാലും താൻ വാ

മാൾബറോ തീർന്നത് കാരണം എന്നെ സിഗരറ്റ് വലിപ്പിക്കാൻ ഒരു കടയിലേക്കാണ് മണി കൊണ്ട് പോയത്. പത്തു എന്ന പേരിൽ അറിയപ്പെട്ടിരുന്ന ഒരാളുടെ ചായക്കട വിത്ത് മുറുക്കാൻ കട, ഞാൻ കുറേക്കാലമായി ആ കടയിൽ പോവാറില്ലായിരുന്നു, ആരെയോ ചിരിപ്പിക്കാൻ വേണ്ടി ഒരാവശ്യവുമില്ലാതെ ഒരിക്കൽ പത്തുവിനോട് ഞാൻ ചോദിച്ചു,

പത്തു അണ്ണാ .അണ്ണന് അനിയൻ ഉണ്ടോ ?

ഉണ്ടല്ലോ ,എന്താ

അയാളുടെ പേര് ഒൻപതു എന്നാണോ?

അല്ല, നാരായണൻ എന്നാണ് ,എന്തോന്ന് ഒൻപതു ,അങ്ങനെ ഒരു പേരുണ്ടോ

ചേട്ടൻ പത്തു ആയാൽ അനിയൻ ഒൻപതു അല്ലെ?

അന്ന് എന്നെ അയാൾ വിളിച്ച തെറി രണ്ടു ദിവസം കഴിഞ്ഞു ഡെറ്റോൾ ഇട്ടു കഴുകിയപ്പോൾ ആണ് ചെവിയിൽ നിന്നും പോയത് ,കടയിൽ എത്തിയപ്പോൾ പത്തു കാണാതെ ഞാൻ മണിയുടെ പുറകിൽ ഒളിച്ചു നിന്നു. മണി രണ്ടു സിഗരറ്റ് വാങ്ങി. ചാൻസലർ എന്ന പേരുള്ള ഒരു കറുത്ത സിഗരറ്റ്.സാധാരണ സിഗരറ്റ് വെളുപ്പാണല്ലോ

ആർക്കാണ് രണ്ടെണ്ണം,എണീറ്റ് നിക്കാൻ ജീവനില്ലാത്ത ഇവനോ?

പത്തു എന്നെ ചൂണ്ടി ചോദിച്ചു.

യാ....ഇയാൾ ഇന്ന് വലി തുടങ്ങാൻ പോണു, നാൻ ആണ് ഗുരു

പത്തു പുച്ഛ ഭാവത്തോടെ തിരിഞ്ഞിരുന്നപ്പോൾ മണി,അവിടെ ഇതിനു വേണ്ടി ചെറിയ ഒരു ചിമ്മിനി വിളക്കിൽ കത്തിക്കൊണ്ടിരുന്ന തീയിൽ ഒരു പേപ്പർ തുണ്ടു കത്തിച്ചു എന്റെ ചുണ്ടിൽ ഇരുന്ന സിഗരറ്റ് കൊളുത്തി. നേരെ ഇരുമ്പു പാലത്തിനടിയിൽ പോയി നിന്ന് മണി പറഞ്ഞു

താൻ പുക ആഞ്ഞു വലിച്ചു അകത്തേക്ക് കൊണ്ട് പോണം,ഒരു മിനിറ്റ് പുകഅകത്തു നിർത്തി ആസ്വദിച്ച ശേഷം വായിൽകൂടിയോ മൂക്കിൽ കൂടിയോ പുറത്തേക്കു വിടണം, വൗ....വാട്ട് എ പ്ലെഷർ..ആൾ ദ ബെസ്ററ് .

ആഞ്ഞു വലിച്ച ഉടനെ നെഞ്ചിൽ കത്തി വെച്ച് കുത്തിയ പോലെ....തല കറങ്ങി, ഞാൻ മുട്ടിൽ കൈ കുത്തി നിന്ന് അലറി ചുമച്ചു, തീവണ്ടി എൻജിൻ പോലെ പുക പുറത്തേക്കു വന്നു

താൻ എന്റെ അനുഗ്രഹം വാങ്ങിച്ചില്ല, അതാണ് ചുമ

ഹഹഹനുഗ്രഹമോ ഹൊഹൊഹെന്തിന് ?

ഈ കാര്യത്തിൽ തന്റെ ഗുരു ഞാനല്ലേ

ഹുഹു ഹുരു അല്ല.... .....പോടാ...#$^&$@#&(*)*

വാട്ട് ?

ഹൊ ഹൊ ഹീ മൂക്കിലും വാ.. ഹൊ ഹൊ... വായിലുമല്ലാതെ ചെവിയിൽ കൂടി പുക വന്നാൽ പ്രശ്നമുണ്ടോ മണീ

അയ്യോ ശെരിയാണല്ലോ, ഗോഡ്, ആദ്യമായിട്ടാണ് ഒരാൾ ചെവിയിൽ കൂടി പുക വിടുന്നത് ഞാൻ കാണുന്നെ....ഗ്രേറ്റ് ടാലെന്റ്റ്

അങ്ങനെ തുടങ്ങിയ വലി ഏകദേശം രണ്ടു മാസം നീണ്ടു നിന്നു, എന്നും ഒരു സമയത്തു ഞാനും മണിയും പോയി സിഗരറ്റും വാങ്ങി പാലത്തിനടിയിൽ പോയി നിന്നു വലിക്കും.പക്ഷെ അന്നത്തേതിന് ശേഷം വലിച്ചപ്പോൾ ഒരു തവണ പോലും ഞാൻ പുക അകത്തേക്കെടുത്തില്ല എന്നുള്ളതാണ് സത്യം,ചുമ്മാ വായിൽ വെച്ച് പുറത്തേക്കൂതും

ഒടുവിൽ അത് കണ്ടു കൊണ്ട് വന്ന ആരോ അച്ഛനോട് പറഞ്ഞു കൊടുക്കും എന്ന് ഭീക്ഷണിപ്പെടുത്തിയപ്പോൾ ആണ് ഞാൻ മണിയുടെ എതിർപ്പ് വക വെക്കാതെ സിഗരറ്റും എറിഞ്ഞു കളഞ്ഞിട്ടു വീട്ടിലേക്കോടിയത്

കാലങ്ങൾക്കു ശേഷം ശ്യാമയുടെ മില്ല്യണയർ കസിൻ കുവൈറ്റിൽ നിന്നും വന്നപ്പോൾ ആണ് എന്നോട് ചോദിച്ചത്,പുള്ളിക്ക് അവിടത്തെ അമേരിക്കൻ ആർമ്മിക്കു സാധനം സപ്ലൈ ചെയ്യുന്ന കോൺട്രാക്ട് ആയിരുന്നു

എച്ചോയ് ,വാണ്ണ സിഗാർ?

അതാര് ചേട്ടാ? വാണ്ണ സിഗാർ

സിഗാർ , ചുരുട്ട് വേണോ എന്ന് ,പുള്ളി ഒരു തടിയൻ സാധനം എടുത്തു കാണിച്ചു കൊണ്ട് ചോദിച്ചു

അയ്യേ ,അജോയ് അതൊന്നും വലിക്കില്ല,അജോയ് അത്തരക്കാരനല്ല ചേട്ടാ എന്ന് പറഞ്ഞ ശ്യാമയെ ഞെട്ടിച്ചു കൊണ്ട് ഞാൻ ഇടയിൽ കയറി പറഞ്ഞു

ഹായ് ,ചേട്ടാ, ഞാൻ ഇന്ന് വരെ ചുരുട്ട് വലിച്ചിട്ടില്ല, പണ്ട് മാർക്സിൻ കാർപാത്യൻ മല നിരകളിൽ നിന്നടിക്കുന്ന തണുത്ത കാറ്റിനെ നേരിടാൻ വേണ്ടി ഹാഫ് എ കൊറോണ വലിക്കുന്നത് കേട്ടിട്ടുണ്ട്, അന്നേ കൊതിയാണ് വലിക്കാൻ

മിസ്റ്റർ മാർക്സിൻ ? നമ്മുടെ പന്നിയറത്തലയിലെ ഡോക്ടർ വർഗീസിന്റെ സൺ അല്ലെ ,കാനഡയിൽ ഉള്ള?

അയ്യേ അല്ല, നമ്മുടെ കോട്ടയം പുഷ്പ നാഥിന്റെ ,ഡിറ്റക്റ്റീവ് മാർക്സിൻ

വെൽ ,എനിക്കറിയില്ല,കോട്ടയം പുഷ്പ്പ, ഷീ എസ് യുവർ ഫ്രണ്ട് റൈറ്റ് ? വെൽ ഇത് പക്ഷെ ഹാഫ് എ കൊറോണ അല്ല,ദിസ് എസ് കൊഹിബ,എക്സ്പെൻസീവ് ക്യൂബൻ സിഗാർ, ഇങ്ങനെ കവർ മാറ്റി എഡ്ജ്ജ് കട്ട് ചെയ്തു വലിക്കണം,ചിലർ അതിന്റെ അറ്റത്തു കടിച്ചു ച്യൂ ചെയ്യും,ഇറ്റ് ടെയ്സ്റ്റ് എക്സോട്ടിക്ക് ,കണ്ടിട്ടില്ലേ,ക്ലിന്റ് ഈസ്റ്റ് വുഡ്, ലീ വാൻ ക്ലീഫ് ഒക്കെ വലിക്കുന്നത് ? വല്ലാത്ത സുഖമാണ് ,പ്രത്യേകിച്ചും ഒരു കലാകാരന്

അതെല്ലാം കേട്ട ആവേശത്തിൽ ചേട്ടൻ പോയ ശേഷം ക്യൂബൻ കൊഹിബയും താങ്ങിപ്പിടിച്ചു പടി കയറവെ ഞാൻ പറഞ്ഞു,

ആരും എന്നെ ശല്യപ്പെടുത്തരുത്,മുകളിലെ എന്റെ മുറിയിൽ പോയി ഞാൻ അമൂല്യ വസ്തു ആയ കൊഹിബ വലിക്കാൻ പോണു.....വല്ലാത്ത സുഖമായിരിക്കും ,പ്രത്യേകിച്ചും എന്നെപ്പോലെ ഒരു കലാകാരന്

വെള്ളമടിച്ചാൽ പോലും ഞാൻ ക്ഷമിക്കും അജോയ് പക്ഷെ ഇത് ഞാൻ സഹിക്കില്ല, നോക്കിക്കോ ഞാൻ മിണ്ടൂല.ഇതൊക്കെ വലിച്ചാൽ നിങ്ങൾ ഉടനെ മോളിലോട്ടു പോകും,മക്കളും ഞാനും പാസീവ് സ്മോക്കേഴ്സ് ആവും,ദുഷ്ടൻ ചേട്ടൻ ,അങ്ങേരുടെ തലേൽ കുവെയിറ്റിലെ ഇടിത്തീ വീഴട്ടെ

അതെല്ലാം അവഗണിച്ചു കൊണ്ട് ഞാൻ കത്തിക്കാത്ത സിഗാർ വായിൽ ഒരു കോണിലേക്കാക്കി ചവച്ചു കൊണ്ട് ഒരു കൗ ബോയ് പോകുന്നത് പോലെ മുകളിലേക്ക് പോയി

പത്തു മിനിറ്റ് കഴിഞ്ഞപ്പോൾ ശ്യാമ ബെഡ് റൂമിലേക്ക് വന്നു,മൊത്തം പുക ,കട്ടിലിൽ ഞാൻ.അടുത്തുള്ള മേശയിൽ എരിയുന്ന സിഗാർ

ദൈവമേ, ഞാൻ ഒരിക്കലും കാണല്ലേ എന്നാഗ്രഹിച്ച കാര്യം,എന്റെ ഭർത്താവ് ഒരു സിഗരറ്റ് വലിക്കാരൻ ആവല്ലേ എന്നായിരുന്നു ഏക പ്രാർത്ഥന അതും പോയി, എന്തൊരു വിധി....എനിക്ക് മാത്രം എന്താണിങ്ങനെ, ഭഗവാനെ....ആ കുവൈറ്റ് ചേട്ടൻ....അങ്ങേരുടെ തലേൽ

നിറുത്തെടി......ഞാൻ അലറി

ങേ ?

മനുഷ്യൻ പുക മൊത്തം അകത്തു പോയി ശ്വാസം കിട്ടാതെ പത്തു മിനിറ്റായി ഇവിടെ കിടന്നു ചാമേ ചാമേ എന്ന് അലറുന്നു...പണ്ടാരമടങ്ങിയ ഈ കുന്തം വലിച്ചു എനിക്ക് എന്തൊക്കെയോ തോന്നുന്നു, അയ്യോ ഇപ്പൊ ബാത്‌റൂമിൽ പോണം, വെള്ളം കുടിക്കാൻ വേണം,വീശി താ...അയ്യോ ...അമ്മേ കാണണം ...അല്ലെങ്കിൽ അച്ഛനെ കണ്ടാലും മതി

ദൈവമേ...ആ കുവൈറ്റ് ചേട്ടന്റെ തലേൽ

എച്ചുസ് മീ ,ആ ഇടിത്തീ അടുത്ത ആഴ്ച വീണാലും പോരേ ശ്യാമേ , ഇപ്പൊ എന്നെ ഒന്ന് ബാത്‌റൂമിൽ കൊണ്ട് പോ ...എല്ലാം കഴിഞ്ഞിട്ട് വേണമെങ്കിൽ ഞാനും പ്രാർത്ഥിക്കാം ആ ദുഷ്ടന്റെ തലേലും ദേഹത്തും മൊത്തം ഇടിത്തീ വീഴാൻ....മഹാപാപി

അജോയ് കുമാർ