ജന്മം.

°°°°°°
മൂത്തു എന്ന കാരണം കൊണ്ടത്രേ
തെങ്ങിൽ നിന്നും ആ തേങ്ങയെ കുത്തി താഴെയിട്ടത്. അതുകണ്ട് പേടിച്ചിട്ടാണ് മൂക്കുന്നതിന് മുമ്പേ രണ്ടു മച്ചിങ്ങകൾ താഴേക്ക് ചാടി ആത്മഹത്യ ചെയ്തതും. കുത്തിന്റെ വേദന മാറും മുമ്പേ വെട്ടു കിട്ടിയ തേങ്ങ ചിന്തിച്ചത് എന്തിനു വേണ്ടിയാണ് വലുതായത് എന്നത് മാത്രമായിരുന്നു. തോലുരിച്ചു തല നടുവെ വെട്ടിപ്പൊളിച്ചു ഉള്ളിലൊളിപ്പിച്ച കണ്ണുനീർ വരെ ഊറ്റിയെടുത്തത് കൊണ്ട് കരയുവാൻ പോലും ആ തേങ്ങയ്ക്ക് അവസരം കിട്ടിയില്ല. എങ്കിലും ചിരവയുടെ മൂർച്ചയുള്ള നാക്ക് തലച്ചോറിനെ ആക്രമിച്ചപ്പോൾ ആദ്യമായി ആ തേങ്ങ കരഞ്ഞു. ഉടലില്ലാത്തത് കൊണ്ട് ആ കരച്ചിൽ കിർ കിർ എന്ന് വികൃതമായിരുന്നു. പൊട്ടിപ്പിളർന്ന തലയോട് തീയിലേക്കിട്ടപ്പോൾ അസഹ്യമായ ചൂട് സഹിക്കുവാൻ പറ്റാതെയോ എന്തോ അതൊന്നൂടെ കരഞ്ഞു. പക്ഷേ അത് അവസാനശ്വാസമായിരുന്നു. അതൊരു ചീറ്റൽ പോലെയാണ് പുറത്തു വന്നത്... അവസാന ചീറ്റൽ... കഴിഞ്ഞു... അങ്ങിനെ ഒരു ജന്മം അവസാനിച്ചു.

ജയ്സൻ ജോർജ്ജ്