അവന്റെ പേരോ മനുഷ്യൻ

വെറുതെ വീടിന്റെ ചവിട്ടുപടിയിൽ ചാരിയിരിക്കാൻ ചില നേരങ്ങളിൽ വല്യ രസമാണ്.
അങ്ങിനെ ഇരിക്കുന്ന നേരത്ത് മാത്രമാണ് വഴിയിലൂടെ ആരു പോയാലും ഒന്നു ചോദിക്കും,

വേറെ പണിയൊന്നുമില്ലേ?

അങ്ങിനെ എനിയ്ക്കു മനസ്സിലായി വേറൊരു പണിയുമില്ലെങ്കിൽ ഇരിക്കുന്ന സ്ഥലമാണ് ചവിട്ടുപടി. അതായത് അത്രയും മനസ്സ് ഫ്രീ
യായി ഞാനിരിക്കുന്ന സ്ഥലം.

ഈ ചവിട്ടുപടിയിൽ ഇരുന്ന് വെറുതെ ശൂന്യതയിലേയ്ക്കെന്നോണം മുകളിലേയ്ക്ക് നോക്കിയപ്പോൾ രണ്ട് കിളികൾ വൈദ്യുത് കമ്പിയിൽ കൊത്തി കളിച്ചിരിക്കുന്നു.
ഒന്ന് മറ്റൊന്നിനെ കൊത്തി കുറച്ച് നീങ്ങിയിരിക്കും.
ഉടനെ കൊത്ത് കൊണ്ട കിളി ഒന്നുമറിയാത്ത പോലെ കൊത്തിയവന്റെ അരികലേയ്ക്ക് നീങ്ങിയിരിക്കും.
പിന്നെ മറ്റവനെ ഒരു കൊത്ത്. പിന്നെ പഴയ സ്ഥലത്തേയ്ക്ക്.
ഈ പ്രക്രിയ കുറെ നേരം തുടർന്നു.
അത് കഴിഞ്ഞ് സന്തോഷത്തോടെ രണ്ടു പേരും പറന്നു നീങ്ങി.
ഏറെ കുറെ മിക്ക ദിവസവും ഇതേ കിളികളെ ഞാൻ അതേ സ്ഥലത്ത് കാണാറുണ്ട്.
അതുകൊണ്ട് ഒന്നു മനസ്സിലായി അവ തല്ലുകൂടി പോകുന്നതല്ല.
അതവരുടെ കളി, അതവരുടെ തമാശ.പരിഭവമില്ലാത്ത കളികൾ.

പക്ഷെ സൃഷ്ടികളിൽ ശ്രേഷ്ഠനായ മനുഷ്യൻ മാത്രം ഇന്ന് മറക്കാനും പൊറുക്കാനും തയ്യാറല്ല.
അവൻ ഒരുകൊത്ത് കൊത്തിയാൽ പത്ത് കൊത്ത് തിരിച്ച് കൊത്തും.
അതാണ് അവന്റെ ശാസ്ത്രം.
തോൽക്കാൻ മനസ്സില്ല എന്നതാണെങ്കിൽ നന്മയുടെ കാര്യത്തിൽ തോൽക്കാൻ മന:സ്സുണ്ട്. തിന്മയുടെ കാര്യത്തിലാണെങ്കിൽ മനസ്സില്ല.

അതാണ് മനുഷ്യൻ. പരിഭവങ്ങളെയും ശത്രുതയേയും താലോലിക്കുന്നവൻ.
അവന്റെ പേരോ മനുഷ്യൻ.

Shaju