ഫ്രണ്ട് റിക്വസ്റ്റ്

"നീയെന്താടീ എന്റ്റെ ഫ്രണ്ട് റിക്വസ്റ്റ് ആക്സെപ്റ്റ് ചെയ്യാത്തെ"??
അതിന് ഈ 'എടാ' യെ എനിക്കറിയില്ലല്ലോ"??പിന്നെ കണ്ണുരുട്ടിയതും പുരികം ചുളിച്ചതുമായ കുറെ സ്മൈലികളും.
ഞാൻ പ്ലിംങ്!!

എനിക്കിത് തന്നെ വേണം..ശ്ശോ..ഇൻബോക്സിൽ പോകണ്ടായിരുന്നു.തിരിഞ്ഞു നോക്കിയത് നേരെ കണ്ണാടിയിലേക്ക്..ഇതിപ്പോ ആരാ ഇവിടെ കൊണ്ടു വന്നു വെച്ചേ..?ജഗതി ശ്രീനിവാസനെ പോലും പഠിപ്പിച്ചിട്ടില്ലാത്ത പുതിയൊരു രസം മുഖത്ത്!.

ഒന്നര മാസം മുമ്പ് അയച്ച റിക്വസ്റ്റാ..ബൈ ചാൻസ് ഇന്നലെ കണ്ടപ്പോ ആഡിയിട്ടില്ല..ന്നാ പിന്നെ അതൊന്ന് ചോയ്ച്ചിട്ടു തന്നെ കാര്യം..അരയും തലയും മുറുക്കിയാ ഇൻബോക്സിൽ ചെന്നെ..അവൾക്ക് ഓർമയുണ്ടാകും ന്നല്ലേ ഞാൻ കരുതിയെ..അതിപ്പോ ഇങ്ങനൊരു പണി കിട്ടും ന്ന് കരുതാമോ??

ഡിഗ്രിക്ക് പഠിക്ക്ണ കാലം.ഈവനിങ് പ്രീഡിഗ്രി ക്ലാസുകൾ തുടങ്ങുന്നതിനു മുമ്പ് കുട്ടികൾടെ സുഖവിവരമന്വേഷിക്കാൻ ചെന്നിരുന്ന(അസൂയക്കാർ വായ്നോട്ടം ന്ന് പറയും) ഒരു ദിവസം യാദൃശ്ചികമായാണ് അവളുടെ ബുക്‌സെല്ലാം കവർ ചെയ്തിരിക്കണത് മമ്മൂട്ടിയുടെ ചിത്രങ്ങൾ കൊണ്ടാണെന്ന് ഞാൻ കണ്ടെത്തിയത്..

ഇഷ്ട താരം മമ്മൂക്കയാണെന്നും വീട്ടിൽ പോയാൽ വീട്ടുകാരൊന്നിച്ചു ആദ്യദിനം തന്നെ തിയേറ്ററിൽ പോയി ഇഷ്ടതാര ഫിലിം കാണുമെന്നും സംസാര മദ്ധ്യേ അവൾ പറഞ്ഞു.അതിൽ പിന്നീട് അവളോട് മമ്മൂട്ടി വിശേഷങ്ങൾ കൈമാറാനായി മാത്രം കുറേ വെള്ളിനക്ഷത്രം,നാന,ചിത്രഭൂമി മാഗസിനുകൾ ഞാൻ വാങ്ങിക്കൂട്ടിയിരുന്നുവെന്ന് ഗോസിപ്പുകാർ പറയുന്നത് നിങ്ങൾ കാര്യമാക്കേണ്ട.

പെരിന്തൽമണ്ണയിലെ റിലീസിംഗ് സെന്ററിൽ നിന്ന് ആദ്യ ദിനം ഞാൻ കാണുന്ന മമ്മൂട്ടി ഫിലിം കഥ കേൾക്കാൻ ആകാംക്ഷയോടെ അവൾക്കൊരു ഇരിപ്പുണ്ട്.കഥാസാരം മൊത്തം കേൾക്കണം..സൂക്ഷ്മ കാര്യങ്ങൾ വരെ ചോയ്ക്കും..ആ പെണ്ണാണിപ്പോൾ എന്നെ അറിയില്ലെന്ന് പറഞ്ഞേക്ക് ണെ..മമ്മൂക്ക പോലും പൊറുക്കില്ല!!

ചിന്തകൾ ഇത്രത്തോളം എത്തിയപ്പോൾ "ടിങ്" ന്നൊരു ശബ്ദം..മൊബൈലീന്ന്.നോക്കിയപ്പോൾ ലവൾ തന്നെ..ഒരു ഹായ് എറിഞ്ഞിരിക്കുവാ..പിന്നെയും കുറെ ഹലോകളും "സ്മൈൽ"കളും.ഞാനും ഒരു ഹായ് റിപ്ലി.

"മണ്ണാർക്കാട് കോളേജിൽ പഠിച്ചിരുന്ന ആ ആളാണല്ലേ..?
"അങ്ങനെ വേണ്ടി വന്നിട്ടുണ്ട്"
"സോറി ട്ടോ..കഷ്ടായിപ്പോയി..ഇങ്ങടെ റിക്വസ്റ്റ് ഞാൻ കണ്ടിരുന്നു.പക്ഷേ എങ്ങനെ അറിയാനാ.?എവിടാ പഠിച്ചതെന്ന് പോലും അന്നില്ലായിരുന്നു.പിന്നെ കുറെ സുന്ദരനായ ഒരാളുടെ ഫോട്ടോകൾ.!!മെലിഞ്ഞു നീണ്ടൊരു കോലമായിരുന്ന നിങ്ങളാണിതെന്നു സ്വപ്നേപി കരുതിയില്ല.മമ്മൂക്കയുടെ കഥ പറഞ്ഞു തന്നിരുന്ന നിങ്ങളിങ്ങനെ മമ്മൂക്കയെപ്പോലെ സുന്ദരനാണെന്നു ഞാനെങ്ങനെ അറിയാനാ"..

ഞാനങ്ങു പൊങ്ങിപ്പോയി..തല സീലിങ്ങിലിടിച്ചു വീണ്ടും കട്ടിലിൽ തന്നെ വന്നു വീണു."അപ്പോൾ നീയൊന്നും മറന്നിട്ടില്ല അല്ലേ?..ആട്ടെ..കുട്ടിസ്രാങ്കിലെ മമ്മൂക്കയെപ്പോലെ എന്നാണോ ഉദ്ദേശിച്ചേ.."??

"അല്ല..കുട്ടേട്ടനിലെ മമ്മൂക്കയെപ്പോലെ".
മനസ്സിൽ വീണ്ടും ലഡ്ഡു പൊട്ടി..ആദ്യം.ഒന്ന്..പിന്നെ തുരുതുരെ ഒരഞ്ചാറെണ്ണം..

"അതേയ്..ഇനിയെങ്കിലും ആർക്കെങ്കിലും റിക്വസ്റ്റ് അയക്കുമ്പോ ഒരു ചെറു വിവരണം ഇൻബോക്സിൽ കൊടുക്കുന്നത് നന്നായിരിക്കും..ന്നാ ഞാൻ പോയി പിന്നെ വരാം"

യാത്ര പറഞ്ഞു അവൾ പോയപ്പോഴും മനസ്സിന്റെ കോണിൽ പൊട്ടാതെ കിടന്നിരുന്ന ചില ലഡ്ഡുകൾ പൊട്ടിക്കൊണ്ടിരുന്നു!!.

KVA നാസർ അമ്മിനിക്കാട്.
°°°°°°°°°°°°°°°°°°°°°°°°°°°°°°°°°