സൌഹൃദം പ്രണയത്തിലേക്കു നടക്കുമ്പോൾ

അകക്കാമ്പിലെ പ്രിയമുയർത്തുന്ന നേരൊ
വിരൽത്തുമ്പിലിറ്റുന്ന രക്തച്ചുവപ്പാം 
കരൾപ്പൂ വിടർത്തുന്ന മദ്യത്തരിപ്പിൽ
ചെഞ്ചോരനേത്രത്തിലൂടൊഴുകിടുമ്പോൾ.

തീ പിടിച്ചീടും പ്രണയഖഡ്ഗത്താൽ
മനസ്സെന്ന മാന്ത്രികക്കുതിരപ്പുറത്തായ്
ഇരുട്ടിലൊരു വെട്ടം തെളിയുന്ന ദിക്കിൽ
നുണക്കാടുവെട്ടി കുതിച്ചങ്ങുപായും.

കനൽപ്പാടമൊക്കെ താണ്ടിക്കടന്ന്
മടുപ്പാർന്ന ദേഹരേണുക്കളെല്ലാം
ഉയിർപ്പേൽക്കും പ്രേമാർദ്രചിന്തകളാലേ
കൈചൂണ്ടി ചൊല്ലുമെന്നുള്ളിലെ സത്യം.

പാതയോരത്തുള്ള മാഞ്ചോട്ടിലന്ന്
തൂമഴയേറ്റു നാം നിന്ന നേരം
സൗഹൃദം പ്രണയമായങ്കുരിച്ചെന്ന്
ധീരമായ് നിന്നോടോതിടുമ്പോഴോ

വിറച്ചല്പനേരം പകച്ചു നീ നില്ക്കും
മിഴിക്കുള്ളിലപ്പോൾ ചിരിപ്പൂ തിളങ്ങും
നിഴലൊട്ടിനില്ക്കുന്ന മണ്ണിലാ നേരം
ഹൃത്ബാഷ്പമഴയാൽ പുൽനാമ്പുയിർക്കും.

വിറയ്ക്കുന്ന ചുണ്ടാൽ നീ മന്ദ മോതും
മിടിക്കുന്നുയെന്നിലും നാമെന്ന മോഹം
"ഉറങ്ങാതുറങ്ങുന്ന രാവുകളിലെല്ലാം
ഉണർന്നീടുമെന്നിൽ നീയെന്ന സ്വപ്നം".

ഇതെന്നിലേ സത്യം ഇതെന്നിലേ മോഹം
ഇതെന്നുടെ മാത്രം പുലർകാല സ്വപ്നം
വരുംകാലമേതോ രാത്രിപുലരുമ്പോൾ
നിശ്ചയം, നീയെന്റെ മാറിൽ മയങ്ങും.
____________________________________
രമേഷ് കേശവത്ത് ..