പ്രണയം (കവിത)

വിടരാതെ കൂമ്പിയ സ്വപ്നങ്ങൾക്കുള്ളിലും
വിളറാത്ത നിൻ മുഖം കണ്ടു പകച്ചു ഞാൻ
വെറും ശൂന്യമായീ തീർന്ന മനസിന്റെ -
വാതിക്കലാരെയാണ് നീ കാത്തിരിക്കുന്നത്

പണ്ടൊരുനാൾ!

എൻ ഹൃദയത്തിൽ പൂത്ത സ്വപ്നങ്ങളൊക്കെയും.
കവർന്നെടുത്ത് പടിയിറങ്ങിപ്പോയ
പ്രണയമേ?
ഇന്നു നീ വരും കാരണങ്ങളെ- കുറിച്ചോർത്ത് ഞാൻ ഭയക്കുന്നു.
പ്രണയമേ നീ ശരശയ്യയുമായി - കിടന്നയിടങ്ങളിലെവിടെയും.
ഞാൻ ഭിക്ഷപാത്രവുമായി - അലഞ്ഞിരുന്നില്ല.
എങ്കിലുമെൻ ഹൃദയ ഭിത്തിയിൽ
വിള്ളലുണ്ടാക്കിയാരെയോ നീ
കാത്തിരിക്കുന്നു .
നിൻ ചെറു നിശ്വാസം കേട്ടു ഞാൻ
ദൂരെയൊഴിയവേ പിന്നിലൂടെയെൻ -
ഹൃദയത്തിൽ പ്രവേശിച്ച പ്രണയമേ.
നിനക്ക് തളിർക്കുവാനെൻ ഹൃദയത്തിൽ
പ്രാണവായുവില്ല നീരുറവകളില്ല.
ആകെ തളിർക്കുന്നതും പൂക്കൂന്നതുമായ
ഒരു തുള്ളി കവിതതൻ ലഹരി മാത്രം.

പ്രണയമേ !

വിടരാതെ കൂമ്പിയതാണെൻ മോഹങ്ങൾ
ഇന്നും വിളറാത്ത നിൻ മുഖം
കണ്ടു പകച്ചു ഞാൻ .........

*************************

മനു എണ്ണപ്പാടം