ഗാനശാല

ഗാനശാല : -മംഗലയ്ക്കൽ -

നഗരത്തിലെ ഗാനശാലയിൽ പിന്നെയും 
വിരഹമായ്‌ പെയ്തിറങ്ങുന്നു ഗായകൻ .
ഗസൽ പടർത്തുന്നൊരുന്മാദഭംഗിയിൽ
ഗഗന സീമയിൽ നാദചന്ദ്രോദയ്ം .

മദ്യശാലയിൽ നിന്നും മഴയുമായ്‌
എപ്പൊഴെത്തി ഞാനീ ഗാനശാലയിൽ ...!
വിസ്ക്കി തുള്ളുമെൻ മസ്തിഷ്ക്കശാലയിൽ
ധിനി ധിനിക്കുന്നു തബല,സാരംഗികൾ .

മഴയു,മുള്ളിലെ ലഹരിയും-ഒപ്പമെ -
ന്നുയിരുലയ്ക്കുന്ന സംഗീത ധാരയും
ശിരസ്സിനുള്ളിൽ കൊളുത്തുന്നു,വൈദ്യുത -
പ്രഭയിൽ മങ്ങുന്നു രാവിൻ തണുപ്പുകൾ .