നഗരംമുഖത്തെഴുതിവച്ചയാൾ .

ഒരു നഗരത്തിന്റെയശ്ലീലം മുഴുവൻ മുഖത്തെഴുതിവച്ചയൊരാൾ തിടുക്കപ്പെട്ട് ഗ്രാമത്തിലേയ്ക്ക് നടക്കുന്നു .
ഓർമ്മകൾ തുടങ്ങുംമുമ്പ് അറ്റുപോയ
ഒരു പൊക്കിൾക്കൊടിച്ചൂരിലേയ്ക്ക്
അകാലത്തിലൊരു സ്വപ്നാടനം .

ഇടുങ്ങിയ ചെമ്മൺനിരത്തുകൾ
കനത്തുമിനുത്ത ടാർറോഡുകളായി
അയാളെ അത്ഭുതപ്പെടുത്തി .
മധുരം വാരിക്കൂട്ടിയ മാന്തോപ്പുകൾ,
കണ്ണഞ്ചിപ്പോകുന്ന പ്രാസാദങ്ങൾ .

പുഴയിലേക്കിറങ്ങുന്ന വഴിയോരത്ത്
ചായപ്പീടികകൾ നിന്നയിടത്ത്
അലങ്കാരച്ചെടികളുടെ
നഴ്സറിയോട്ചേർന്ന്
ബ്രോയിലർക്കോഴികളുടെ
മരണപ്പിടച്ചിൽ ..
ഇറച്ചിക്കടയ്ക്കുമുന്നിൽ
ചാവാലിപ്പട്ടികൾ ..

അലഞ്ഞെത്തിച്ചേർന്നിടത്ത്
ദേശീയബാങ്കിന്റെ ബ്രാഞ്ച്,
ആകാശംതൊട്ട് മൊബൈൽ ടവർ .

വീട് ജപ്തി ചെയ്യപ്പെട്ടവന്റെ ശവം
സെമിത്തേരിയിലേയ്ക്കെടുത്തപ്പോൾ
അയാളുമൊപ്പം കൂടി .
ആറാംനമ്പർ കല്ലറയുടെ മുമ്പിൽ
നിർവ്വികാരനായി നിൽക്കുമ്പോഴാണ്
പൊക്കിൾച്ചുഴിയ്ക്കുള്ളിൽ
സൂചിത്തുമ്പുതറച്ചതുപോലെ വേദനയറിഞ്ഞത് .

നഗരത്തിന്റെയശ്ലീലം
മുഖത്തെഴുതിവച്ചവന്
കടംകയറിവിറ്റുതുലച്ച,
ചെറ്റപ്പുരനിന്നയിടം
കണ്ടെത്താനായില്ല .

ആറ് പെഗ്ഗ് " നിപ്പനടിച്ച് "
ചുണ്ടുതുടച്ച് കത്തിച്ച സിഗരറ്റുമായി
നിലാവ് വകഞ്ഞുമാറ്റി
വേച്ചുവേച്ചിറങ്ങിയപ്പോൾ
ഗ്രാമം അയാളുടെ കണ്ണുകളിൽ
ഒരു നഗരം പണിഞ്ഞുവെച്ചിരുന്നു .

അഴുക്കുചാല് നാറുന്ന
ലോഡ്ജ് മുറിയ്ക്കുള്ളിലിരുന്ന്
അയാൾ "പോൺ ഹബ്ബി" ലേയ്ക്ക്
മുടന്തിമുടന്തിക്കയറി .
ഗ്രാമങ്ങളും നഗരങ്ങളും
ഒന്നായിത്തീരുന്ന കാഴ്ച
അതിനുള്ളിലിരുന്നയാളറിഞ്ഞു .

പിറ്റേന്നാൾ
അഴുക്കുചാല് മണക്കുന്ന ലോഡ്ജ് മുറി
പോലീസെത്തി പൂട്ടിമുദ്രവച്ചു .
ഒരു നഗരത്തിന്റെയശ്ലീലമൊട്ടാകെ
മുഖത്തെഴുതിവച്ചൻ
ഒരിയ്ക്കലുമൊരിയ്ക്കലും
തിരിച്ചുപോയില്ല .

by- sumod parumala