സഹയാത്രികൻ - പുതുവർഷ രചനാ മത്സരം 2017 വിഭാഗം-കവിത

ഇനിയേറെയില്ലെനിക്കക്കരെയെത്താൻ,
ഇനിയാരുമില്ലെന്നെ നീരിൽ മുക്കാൻ...
നൻപുകളേറെയൊടിഞ്ഞതിൽ
ചിലതെന്റെ ഹൃത്തിലെ
യരുണമാം തരുണാസ്ഥി തന്നെയോ...
ചിലതെന്റെ കാഴ്ചയെ
തടയുന്നൊരസ്ഥിയോ,
ചിലതെന്റെ നാവിലെ വചനാസ്ഥിയോ..
പകരം തരാമെന്നോതിയെൻ പങ്കായം
പലരും പലപ്പോഴും സ്വന്തമാക്കാനെത്തി...
ആഴിയിൽ മുങ്ങിത്തകരാതിരിക്കുവാൻ
ഞാനെന്റെ നൗകയിൽ പായ് പറത്തി... അലയാഴിയിൽ വീണു -ലയാതിരിക്കുവാൻ
നിന്നെ ഞാൻ വഞ്ചിയിൽ ചേർത്തു കെട്ടി...
മിന്നൽപ്പിണർ തന്റെ ചാട്ടുളികൊണ്ടിതിൻ
നെഞ്ചകം വെട്ടിമുറിച്ചുകീറി..
ഞാനെന്റെ യാത്രയിൽ
നിന്നിലെത്താമെന്ന ചിന്തയെയൂതി തീപ്പിടിപ്പിച്ചു..
ഇനിയേറെയില്ലിതാ കാൺമതായ്
വിജനമാം
കരയിലാ രാഗാർദ്രൻ കാത്തിരിപ്പൂ..
ഇനിയുള്ള യാത്രയിൽ നീയെന്റെ പങ്കായം..
അറിയാതെ ദൂരം, തുഴയാം നമുക്കിനി...

Meeraben PM