**തപാൽപെട്ടിക്ക്‌ പറയാനുള്ളത്**

(ഗിരി ബി. വാരിയർ)

എല്ലാമറിഞ്ഞിരുന്നു ഞാൻ...

അമ്മയുടെ സ്നേഹവും
അച്ഛന്റെ ലാളനയും
മക്കളുടെ ഹൃദയവും
പ്രണയിനി തന്‍ ഇഷ്ടവും
ഭാര്യതൻ പരിഭവവും
സൈനികന്റെ വിരഹവും

പിറവി തന്ന ആഹ്ളാദവും
മരണമേൽപ്പിച്ച വേദനയും
പിറന്നാളിൻ മാധുര്യവും
വിവാഹത്തിൻ ആനന്ദവും
പുതുവത്സരത്തിൻ വരവും
ഉത്സവത്തിൻ ലഹരിയും..

എല്ലാം കണ്ടിരുന്നു ഞാൻ

നഗരത്തിന്റെ തിരക്കും
ഗ്രാമത്തിന്റെ ശാലീനതയും
അതിർത്തിയിലെ ഭീതിയും
മരുഭൂമിയിലെ മരുപ്പച്ചയും
മലമുകളിലെ ഏകാന്തതയും
പ്രളയകാലത്തെ പരിഭ്രാന്തിയും

എല്ലാം മാറിയിരിക്കുന്നു..

വികസനത്തിൻ കാറ്റേറ്റ്
ചുറ്റുപാടുകൾ മാറി
വീടുകൾ, മതിലുകൾ,
റോഡുകൾ, വാഹനങ്ങൾ,
വഴിയോരക്കച്ചവടക്കാർ,
വഴിപ്പോക്കർ.. എല്ലാം മാറി

ഞാൻ മാത്രം മാറിയില്ല
പൊരിയുന്ന വെയിലിലും
കുളിരുന്ന മഴയിലും
കോച്ചുന്ന തണുപ്പിലും
കുനിയാതെ നിന്നു ഞാൻ,
ഏകനായി, ആരും ശ്രദ്ധിക്കാതെ‌..

സ്നേഹ സ്പർശനമേറ്റ്,
കണ്ണുനീരിൽ കുതിർന്ന
പ്രണയ ചുംബനങ്ങളടങ്ങിയ
ജീവന്റെ കൈയ്യൊപ്പ് പതിഞ്ഞ
കത്തുകളും ആശംസാപത്രങ്ങളും
അചിന്ത്യം ഇനിയെത്ര കാലം

ഈ-മെയിലിന്റെ
ഇന്റർനെറ്റിന്റെ
ഈയുഗത്തിൽ...
അഞ്ചലോട്ടക്കാരനും
അഞ്ചലാപ്പീസും
കമ്പിത്തപാലും
അന്യമായതുപോലെ...
ഒരു നാൾ ഞാനുമന്യനാവും
വെറുമൊരു ഓർമ്മച്ചിത്രമാകും.

ഇനിയും വൈകിയിട്ടില്ല..

നിന്റെ തലമുറക്കെന്നെ
പരിചയപ്പെടുത്തുക.
പണ്ട്‌ നിന്റെ ഹ്യദയം
സൂക്ഷിച്ചിരുന്ന ഈ
പാവം തപാൽപെട്ടിയെ..

(അവസാനിച്ചു)

ഗിരി ബി. വാരിയർ
25 ഫെബ്രുവരി, 2019
©️copyright protected