തൊഴുകയ്യോടെ

,,,,,,,,,,,,,,,,,,,,,,,,,,,,,,,,,,,,,
ലാലു കെ ആർ

ഓർത്തുപോവുകയാണ്

ഒരു ദിവസം
ഇടുക്കിക്കാരും കോട്ടയംകാരും കൂടി
ആലപ്പുഴയിലേക്ക്
ഒഴുകിയൊഴുകി
വിരുന്നുവരുന്നത് ,
ഞങ്ങളെല്ലാരും കൂടി
അറബിക്കടലിലേക്ക്
ഒഴുകിയൊഴുകിപ്പോണത് .....

മൂന്നാംപക്കം
കടപ്പുറമാകെ
ശവങ്ങളുടെ ചാകരയടിയുന്നത് ....

വടക്കൻ കേരളവും
തെക്കൻ കേരളവും
മദ്ധ്യകേരളമെന്ന മരുഭൂമിയുടെ
രണ്ട് കടവുകളിൽ വന്ന്
പരസ്പരം
നോക്കി നിൽക്കുന്നത്...

അവരെല്ലാം കൂടി
പശുവിനെ കറക്കാൻ വന്ന
കുറേ അണ്ണാച്ചിമാരെ
ഓടിച്ചിട്ട് തല്ലണത് ......

ഒറ്റൊരുത്തനുമിനി
പച്ചക്കറി കൂട്ടരുതെന്ന്
അവരെല്ലാം ചേർന്ന്
ആഹ്വാനം കൊടുക്കുന്നത്...

ഗൾഫീന്ന് വന്നൊരു
കുടുംബനാഥൻ
കരിപ്പൂര് വന്നിറങ്ങി
തെക്കോട്ടു നോക്കി നിന്ന്
നെഞ്ചുപൊട്ടി നിലവിളിക്കണത് .....

ബാക്കി വന്ന നേതാക്കളെല്ലാം
ഞെട്ടൽ ഞെട്ടലെന്ന്
ഞെട്ടി ഞെട്ടി പറയുന്നത്....

ഇന്ത്യാ നെറ്റ് ചാനലിലൊരു
മൊട്ടത്തലയൻ ന്യൂസ് റീഡർ
ടി വി പൊട്ടുമാറുച്ചത്തിൽ
നേതാക്കന്മാർക്കെതിരെ
ആഞ്ഞടിക്കുന്നത് ....

കേരളം കണ്ടിട്ടുള്ളതിൽ വെ-
ച്ചേറ്റവും കിടുക്കനൊരു
നിയമസഭാ സമ്മേളനത്തിൽ
പ്രതിപക്ഷമൊരു
കൊടുങ്കാറ്റായ്
മരിച്ചവർക്ക് വേണ്ടി
ആർത്തിരമ്പുന്നത് .......

പാലക്കാട് ചെത്താൻ പോയ
ചേർത്തലക്കാരൻ കുട്ടപ്പൻചേട്ടനത് കണ്ട്
പൊട്ടിക്കരയണത് ....

ബാക്കി വന്ന
നേതാക്കളെല്ലാം കൂടി
തിക്കിക്കയറിയൊരു
ഹെലികോപ്'റ്ററിൽ
കറങ്ങി നടന്ന്
ശവക്കൂമ്പാരങ്ങൾ
കാണുന്നത് .
പുതുക്കിപ്പണി
വേണ്ടാത്തൊരു
നാടുകാണുന്നത്...

ഒന്നുമറിയാതെ
ഞങ്ങളെല്ലാരും
ചീഞ്ഞു പൊന്തിയിങ്ങനെ
ഒഴുകി നടക്കണത് ......

അരുത്

നൂറു വയസുകഴിഞ്ഞൊരു മനുഷ്യൻ
ഇതുവരെ മരിക്കാത്തതു കൊണ്ട്
ഇനി മരിക്കുകയേയില്ലന്ന്
നിങ്ങൾ പറയരുത് .

മരിക്കുമോ
മരിക്കില്ലയോയെന്ന്
ചർച്ചചെയ്യുക പോലുമരുത്.

ലാലു കെ ആർ