ഉത്തരംതേടി..(കവിത)

ഉത്തരംമുട്ടിയ ചോദ്യങ്ങളവനെ
ഉത്തരത്തിൽ കെട്ടിയോരൊറ്റക്കുരുക്കിലൂടൂയലാട്ടി.

ഉമ്മകൊടുത്തു വളർത്തിയോരോർമ്മകളൊക്കെയും
ഉമ്മറത്തായ് ഒറ്റത്തിരിയിട്ടാരോ കൊളുത്തിവച്ചു.

ഉയിരുകൊടുത്തു വളർത്തിയൊരോമനമകനോ
ഉമ്മകൾകൊണ്ട്മൂടിത്തളർന്ന് പൊട്ടിക്കരഞ്ഞു.

ഉത്തരത്തിനായ് കാത്തവളൊരുമൂലയിൽ
ഉത്തരം ചോദിച്ചയായൊറ്റനിമിഷത്തെ ശപിച്ചു-
ഉണ്മകണ്ടു വെണ്മയാം തുണിമൂടി ഒറ്റയ്ക്കിരുന്നു.

ഉത്തരംനോക്കിയവനപ്പോഴും കിടന്നു
ഉത്തരമറിയാതെ വെള്ളപുതച്ചങ്ങിനെ..

Shajith..