പഞ്ചാര

Ajin R Krishna

സ്കൂളിലെത്തി ആദ്യ ദിവസം തന്നെ ക്ലാസ്സിലെ സുന്ദരി കുട്ടിയെ പഞ്ചാരയടിച്ചു ഒരു വിധം വളച്ചു എന്ന തരത്തിലെത്തിച്ചു, വൈകുന്നേരം പോകാൻ സമയത്തു അവൾ എന്റെ ഫോൺ നമ്പർ ചോദിച്ചതു എന്നിൽ കൗമാര കാമുകനെ ഉണർത്തി... ക്ലാസിലെ മറ്റ് വായ്‌നോക്കികളെ അസൂയ പെടുത്തി അവളെ വളച്ചു...

സ്ഥിരമായി രാത്രികളിൽ ഫോൺ വിളിയായി മണിക്കൂറുകൾ...

"മം"
'പിന്നെ"
"പറ"

ഈ മൂന്നു വാക്കുകൾ ഗുരുവരന്മാർ മുൻപേ കണ്ടെത്തി വച്ചതു കൊണ്ടു എത്ര സംസാരിച്ചാലും മതി വരില്ലെന്നായി....

പെട്ടെന്ന് ഒരു ദിവസമാണ് ചങ്കിൽ കുത്തിയ പോലെ വില്ലന്റെ വരവ്... അവളുമായി അവൻ ഒരുമിച്ചു കൈ പിടിച്ചു പോകുന്നത് കണ്ടെന്നൊക്കെ ഓരോരുത്തർ എന്നൊടു പറയുമ്പോഴൊക്കെ
"അയ്യട നിനക്കു അവളെ കിട്ടാത്ത അസൂയ അല്ലേടെ തെണ്ടി" എന്നു പറഞ്ഞു കൊഞ്ഞനം കുത്തി...
അനിയത്തി പ്രാവിലെ സുധിയെ മനസ്സിൽ ധ്യാനിച്ചു പാവപവിത്രമായാ പ്രണയം കൊടുമ്പിരികൊണ്ടു നടക്കുന്ന കാലം...

സ്കൂൾ യുവജനോത്സവത്തിന്റെ ദിവസം നമ്മുടെ വില്ലൻ എന്നെ കാണാൻ വരുന്നു... കളരി പരമ്പര ദൈവങ്ങളെ മനസിൽ ഓർത്തു ഓടാൻ റെഡി ആയി ഞാനും

" അളിയാ, നീ അവളുടെ പുറകെ നടക്കുന്നെ നിർത്തിയെക്കു ഞങ്ങൾ തമ്മിൽ ഇഷ്ടമാണ്" വില്ലൻ മയത്തിൽ കാര്യം അവതരിപ്പിച്ചു

"ആഹാ അതെങ്ങനെ ശരിയാകും ഞങ്ങൾ തമ്മിൽ താജ്മഹൽ വരെ കെട്ടാൻ കാരാർ ഒപ്പിട്ടിരിക്കാ അപ്പോഴാ അവന്റെ ഒരു പ്രേമം, ഒന്നു പോടാ ചെക്കാ" എന്നും പറഞ്ഞു നെഞ്ചു വിരിച്ചു നിന്നപ്പോൾ വില്ലൻ നെഞ്ചിൽ കത്തി കുത്തിയിറക്കിയ പോലെ ഒരു മെസ്സേജ് എടുത്തു കാണിച്ചു....

"Ummmmmaa"

ഇന്നലെ രാത്രി അവൾ എനിക്ക് അയച്ച അതേ മെസ്സേജ് ...
പ്രണയനൈരാശ്യത്തിന്റെ കൊടുമുടിയിൽ നിന്നും താഴെ ഇറങ്ങാൻ നേരെ ക്ലാസ്സിലേക്ക് പോയി എന്റെ "തേപ്പിന്റെ ഗഥ" ഇറക്കി വച്ചു....

" ഡാ, എന്നാലും അവൾക്ക് എന്നോട് എങ്ങനെ ഇതു ചെയാൻ തോന്നി"

'അളിയാ എന്തൊക്കെ പറഞ്ഞാലും അവൾക്ക് നിന്നോട് ആണ് കൂടുതൽ ഇഷ്ടം" ബൈജു പറഞ്ഞു

"എന്നിട്ടണോടാ അവൾ ഇങ്ങനെ"

നീ ഈ മെസ്സേജിലേക്ക് സൂക്ഷിച്ചു നോക്ക് എന്തോ കണ്ടെത്തിയ പോലെ അവൻ പറഞ്ഞു...
" എന്തു"

"അവൾ നിനക്കു അയച്ച ഉമ്മയിൽ ഒരു 'M' കൂടുതലുണ്ട്, അപ്പോൾ അവൾക്ക് നിന്നെയാണ് കൂടുതൽ ഇഷ്ടം"

നെഞ്ചു തകർന്നിരുന്ന ഞാൻ അവനെ മലയാളത്തിലെ സംസ്‌കൃത കാവ്യങ്ങൾ കൊണ്ട് ആറാട്ട് നടത്തി