#വ്യാജവാർത്ത

#വ്യാജവാർത്ത

ഫോണിൽ തെളിഞ്ഞ ചിത്രവും കുറിപ്പും കണ്ടു തിങ്കൾ ഞെട്ടി... കയ്യിൽ നിന്നും ഫോൺ അവളറിയാതെ താഴേക്ക് വീണു.... തല കറങ്ങുന്നതു പോലെ തോന്നിയിട്ടാകാം മുൻപിലുണ്ടായിരുന്ന കസേരയിലേക്ക് അവൾ പതുക്കെ ചാഞ്ഞു... മനസാകെ നിശ്ചലമായ പോലെ... കൈകാലുകളിൽ പതിവില്ലാത്ത രീതിയിൽ വിയർപ്പും വല്ലാത്ത വിറയലും...

താനേറെ ബഹുമാനത്തോടെയും ആദരവോടെയും കാണുന്ന തന്റെ പ്രിയ അധ്യാപകന്റെയും തന്റെയും ഫോട്ടോ
'കാമുകനൊപ്പം അന്യമതസ്ഥയായ യുവതി ഒളിച്ചോടി '
എന്ന വ്യാജ തലക്കെട്ടിൽ , പല പേജുകളിലും ഗ്രൂപ്പുകളിലും പ്രചരിക്കുന്നു... അതിനു താഴെ വരുന്ന ഓരോ കമെന്റുകളും വായിക്കാനറപ്പുളവാക്കുന്ന തരത്തിലാണ് ... നിജസ്ഥിതി അറിയാതെ കമന്റിലൂടെ പരസ്പരം തമ്മിൽ തല്ലുന്നു ചിലർ.... ആരും സത്യമെന്താണെന്ന് മനസിലാക്കാനുള്ള മനസ് പോലും കാണിക്കുന്നില്ല എന്നതാണ് സത്യം...

എവിടെയാണ് തനിക്കു തെറ്റിയത് ? ആരാണ് ഇതു പോലൊരു നീച കൃത്യം ചെയ്തത് ?
തിങ്കളിന്റെ ചിന്തകൾ പല വഴിയിലൂടെയും നീങ്ങികൊണ്ടിരുന്നു...

കോളേജിൽ നിന്നും ടൂർപോയതിന്റെ അവസാന ദിനം റിജു സാറിനൊപ്പം എടുത്ത ചിത്രം....അതെ താൻ ഫേസ്ബുകിൽ പങ്കുവെച്ച അതേ ചിത്രം..
പക്ഷെ , ആ ചിത്രത്തിൽ ഞാൻ മാത്രമല്ലല്ലോ ഉണ്ടായിരുന്നത്.... ജിബിനയും ഉണ്ടായിരുന്നല്ലോ... സാറിന് , തൊട്ടടുത്തായി നിൽക്കുന്നത് ഞാനാണ്.. തൊട്ടപ്പുറത്തായി ജിബിനയും... ഇപ്പോൾ കണ്ട ചിത്രത്തിൽ ഞാനും റിജു സാറും മാത്രം...

ആരോ മനഃപൂർവം ചെയ്തതാണ്... ആരായാലും അദ്ദേഹത്തെയും എന്നെയും മനഃപൂർവം കരിവാരി തേക്കുകയായിരിക്കും അവരുടെ ഉദ്ദേശം... അതുമല്ലെങ്കിൽ വ്യാജ വാർത്തകൾ പ്രചരിപ്പിച്ചു ആനന്ദം കണ്ടെത്തുന്ന ഏതോ സാമൂഹ്യദ്രോഹി...

തിങ്കളിന്റെ മനസിൽ പല സംശയങ്ങളും ഉടലെടുത്തു...

ഞാനിനി എങ്ങനെ കോളേജിൽ പോകും?
തന്റെ ഭാവി, കുടുംബം എല്ലാം ഒറ്റ നിമിഷം കൊണ്ട് , ഈ തെറ്റായ വാർത്ത കൊണ്ട് തകർന്നില്ലാതായില്ലേ ?... പൊന്നു പോലെ വളർത്തി വലുതാക്കിയ അച്ഛനും അമ്മയും ഈ ചിത്രം കണ്ടിട്ടുണ്ടാകില്ലേ ?
കണ്ടിട്ടുണ്ടെങ്കിലും അവരൊരിക്കലും ഇത് വിശ്വസിക്കില്ല... പക്ഷെ നാട്ടുകാരുടെ അടക്കം പറിച്ചിലും പരിഹാസവും നേരിടാനുള്ള ശക്തി ചായക്കട നടത്തുന്ന അച്ഛന് ഉണ്ടാകില്ല...

'പുറത്തു പഠിക്കാൻ പോയപ്പോൾ കുട്ടികളെല്ലാം മാറി പോയല്ലോ'ന്ന് ആരെങ്കിലും തമാശക്ക് പറഞ്ഞാൽ പോലും അടുക്കളയിൽ പാത്രത്തോട് മല്ലിടുന്നതിനിടക്ക് ഞാനും ചേച്ചിയും കേൾക്കത്തക്ക വിധത്തിൽ കുറഞ്ഞത് പത്തു പ്രാവശ്യമെങ്കിലും അമ്മ ഉപദേശിക്കും 'ഒരിക്കലും നാട്ടുകാരെ കൊണ്ട് പറയിപ്പിക്കുന്നതോ വീട്ടുകാർക്ക് പേരുദോഷമുണ്ടാക്കുന്നതോ ആയരീതിയിൽ ഒന്നും ചെയ്യരുതെന്ന് ' ... സ്നേഹം കൊണ്ടാ... തന്റെ മക്കളെകുറിച്ചു വെറുതെ പോലും ആരും കുറ്റപ്പെടുത്തുന്നത് സഹിക്കാനുള്ള ചങ്കുറപ്പില്ലാത്തതു കൊണ്ടാ... ആ അമ്മക്ക് ഇതൊക്കെ താങ്ങാൻ കഴിയുമോ ?

തന്റെ പ്രിയപ്പെട്ട ചേച്ചിയുടെയും കുടുംബത്തിന്റെയും കൈകളിലും ഈ വാർത്തകൾ എത്തിയിട്ടുണ്ടാകില്ലേ ?
എന്റെയുള്ളിലെ എല്ലാ രഹസ്യങ്ങളും ഞാൻ പങ്കുവെക്കുന്നത് ചേച്ചിയോടാണ്.. ആ ചേച്ചിക്കറിയാം ഞാനൊരിക്കലും അങ്ങനെ ചെയ്യില്ലാന്ന്.... പക്ഷെ...

ചേച്ചിയെ കെട്ടിയ അന്നുമുതൽ , സ്വന്തമായി ഏട്ടനില്ലാത്ത എനിക്ക് ഒരു ഏട്ടന്റെ സ്നേഹവും കരുതലും നൽകിയ അനിലേട്ടനിതറിഞാൽ..... ഈശ്വരാ.... തന്റെ അനിയത്തിയുടെ ചിത്രം മോശമായ രീതിയിൽ , പ്രചരിക്കുന്ന കണ്ടാൽ ഏതൊരേട്ടനാണ് താങ്ങാൻ കഴിയുക?
കൂടെകൊണ്ട് നടന്നപ്പോൾ ആരാണെന്നു ചോദിച്ചവരോട് ' അനിയത്തികുട്ടിയാണെന്ന് ' ചേർത്തുപിടിച്ചു പറഞ്ഞ അനിലേട്ടനിനി , അവരുടെ പുച്ഛവും നേരിടേണ്ടി വരില്ലേ ?

തന്റെ അതേ അവസ്ഥയിലൂടെയായിരിക്കില്ലേ റിജു സാറും കടന്നു പൊയ്കൊണ്ടിരിക്കുന്നത്... മധുവിധു നാളുകളിൽ , ഇങ്ങനെയൊരു വാർത്ത അവരുടെ കുടുംബജീവിതം വരെ തകർക്കാൻ തക്ക
ശക്തിയുള്ളതല്ലേ?
ഞാനെന്റെ സന്തോഷം ലോകത്തോട് പങ്കുവെച്ചപ്പോൾ ആ ലോകം തന്നെ അതേ നാണയത്തിൽ തിരിച്ചടിക്കുന്നു... എല്ലാം എന്റെ തെറ്റാണ് ഫേസ്ബുകിൽ ചിത്രം പങ്കുവെക്കുന്നതിന് മുൻപ് , ഒരു വട്ടം ചിന്തിച്ചിരുന്നെങ്കിൽ ഇന്നീ അവസ്ഥ വരില്ലായിരുന്നു.... എന്റെ ഒരു അശ്രദ്ധ പല ജീവിതങ്ങളെയും നശിപ്പിക്കാൻ മാത്രം പ്രഹരശേഷിയുള്ളതാണ്... ലോകത്തോട് വിളിച്ചു പറഞ്ഞാലും ഈ ലോകം വിശ്വസിക്കുമോ ? ഈ അപമാനത്തിൽ നിന്നും രക്ഷപെടാൻ ആത്മഹത്യയില്ലാതെ മറ്റു വഴികളൊന്നുമില്ല... അതെ... ആത്മഹത്യ.... ഒരിക്കലും ചെയ്യരുതെന്ന് ആഗ്രഹിച്ച അതേ കാര്യം തന്നെ ...

സമയം പോകും തോറും തിങ്കളിന്റെ ചിന്തകൾ അവളെ അരുതാത്ത പലതും ചെയ്യാൻ പ്രേരിപ്പിച്ചു കൊണ്ടേയിരുന്നു.... മുറിക്കു പുറത്തു വാതിലിൽ പല കൂട്ടുകാരുടെയും തട്ടും മുട്ടും കേൾക്കാമായിരുന്നു...അവരുടെ ചോദ്യങ്ങളെയും സംശയങ്ങളെയും നേരിടാനുള്ള ശക്തി അവൾക്കില്ലായിരുന്നു..... തിങ്കളിന്റെ മനസും ശരീരവും ഒരു പോലെ തളർന്നിരുന്നു.

നിലത്തുവീണു കിടക്കുന്ന മൊബൈൽ റിംഗ് ചെയ്യുന്ന ശബ്ദമാണ് വീണ്ടും മൊബൈൽ എടുക്കാൻ അവളെ പ്രേരിപ്പിച്ചത് ....വിറയാർന്ന കൈകളോടെ അവൾ ഫോണെടുത്തു ചെവിയോട് ചേർത്തു....റിജു സാറാണ്...

സാറിന്റെ ശബ്ദം മറുതലക്കൽ നിന്നു കേട്ടപ്പോഴേക്കും തിങ്കൾ സകല നിയന്ത്രണവും വിട്ടു കരച്ചിൽ തുടങ്ങിയിരുന്നു... അവളെ എങ്ങനെ ആശ്വസിപ്പിക്കും എന്നറിയാതെ ആ അധ്യാപകനും കുഴങ്ങി....

"തിങ്കൾ.. താനിങ്ങനെ കരയല്ലേ.... കുട്ടിക്കൊന്നും സംഭവിചിട്ടില്ലാ....ആരോ എന്തോ വ്യാജ വാർത്ത പ്രചരിപ്പിച്ചു എന്നു കരുതി .... "

"കുട്ടീ ഇതൊരിക്കലും കുട്ടിയെയോ റിജു സാറിനെയോ ഉന്നം വെച്ചല്ല... ഞാനായിരുന്നു ലക്ഷ്യം... നമ്മുടെ കോളേജിലെ ഒരു വിദ്യാർത്ഥി എനിക്കു കരുതി വെച്ച ഗുരുദക്ഷിണ... തന്നെ ഇരയാക്കി എന്നു മാത്രം... ഒരു അദ്ധ്യാപികയെ വെറും ഉപഭോഗവസ്തുവായി കണ്ടു സംസാരിച്ച
വിദ്യാർത്ഥിക്ക് , സസ്പെൻഷൻ വാങ്ങിച്ചു നൽകിയിതിനുള്ള സമ്മാനം.... പതിയിരുന്നു , അവസരം കിട്ടിയപ്പോൾ അവനത് ശരിക്കും ഉപയോഗിച്ചു.... എന്നെ മാനസികമായി തകർത്ത് , എന്റെ ജീവിതം ഇല്ലാതാക്കുകയായിരുന്നു അവന്റെ ലക്ഷ്യം....പക്ഷെ അവന് തെറ്റിപോയി...ഒരു ഭർത്താവെന്ന നിലക്കും ഒരു അധ്യാപകനെന്ന നിലക്കും എനിക്കു അദ്ദേഹത്തെ പൂർണ വിശ്വാസമുണ്ട്... അതെ വിശ്വാസം തന്നെ എനിക്ക് തന്നോടുമുണ്ട്.... "

ആദ്യം കേട്ട പുരുഷശബ്ദത്തിനു പകരം ഇപ്പോൾ കേൾക്കുന്നത് ഒരു സ്ത്രീ ശബ്ദമാണ്....ആ ശബ്ദത്തിന്റെ ഉടമയെ അവൾ വേഗം തന്നെ തിരിച്ചറിഞ്ഞു.... രേണുക മിസ്സ്‌.... റിജു സാറിന്റെ ഭാര്യ... രേണുക മിസ്സിന്റെ ശബ്ദത്തിലൂടെയുള്ള സാന്നിധ്യം തന്നെ തിങ്കളിന് വലിയ ആശ്വാസമായിരുന്നു.....

"മിസ്സ്‌ ഞാൻ കാരണമല്ലേ ഇതൊക്കെ സംഭവിച്ചത്... എന്റെ ഒരു അശ്രദ്ധകൊണ്ട് ഇപ്പോൾ പല ജീവനും നഷ്ടപ്പെടില്ലായിരുന്നോ ? കോളേജിന് മുഴുവൻ അപമാനമായില്ലേ ? ഇത് സത്യമാണെന്ന് ഇനി ആരെങ്കിലും വിശ്വസിക്കുമോ ?"

തിങ്കൾ തന്റെ ഉള്ളിൽ നിറഞ്ഞു നിന്ന ആവലാതികൾ എണ്ണിയെണ്ണി പറഞ്ഞു കൊണ്ടേയിരുന്നു...

"കുട്ടി പേടിക്കണ്ട...കുറ്റവാളിയെ നമ്മുടെ കോളേജിലെ വിദ്യാർത്ഥികൾ തന്നെ കണ്ടുപിടിച്ചു... അവൻ ഫേസ്ബുക് ലൈവിൽ വന്നു കാര്യത്തിന്റെ നിജസ്ഥിതി അറിയിച്ചിട്ടുണ്ട്.... വ്യാജ വാർത്ത അതാതു പേജുകൾ നീക്കം ചെയ്തു , പകരം ശരിയായ വാർത്ത ഇപ്പോൾ ഷെയർ ചെയുന്നുണ്ട്....തിങ്കൾ താനൊന്നു കൊണ്ടും പേടിക്കണ്ട....അവന് അർഹമായ ശിക്ഷ തന്നെ പോലീസിൽ നിന്നും അവന് കിട്ടിക്കോളും.... തന്റെ കൂടെ നമ്മുടെ കോളേജ് മുഴുവനുണ്ട്...വീട്ടുകാരും നാട്ടുകാരുമുണ്ട് ..... താൻ നാളെ മുതൽ പതിവുപോലെ ക്ലാസ്സിൽ വരണം... പിന്നെയൊരു കാര്യം ഇനിയെങ്കിലും നമ്മുടെ സന്തോഷവും ദുഃഖവുമെല്ലാം ഫേസ്ബുകിലൂടെ പങ്കുവെക്കുമ്പോൾ ഒന്നോർക്കുക.... പല സ്വഭാവക്കാരായ, പല ചിന്താഗതികളുള്ള ആൾക്കാർ അടക്കി വാഴുന്ന ഒന്നാണ് ഫേസ്ബുക്.... നമ്മൾ സൂക്ഷിക്കേണ്ടത് നമ്മൾ തന്നെ സൂക്ഷിക്കണം... "

രേണുക മിസ്സ്‌ പകർന്നു നൽകിയ ഊർജം തിങ്കളിനു പുതിയ ഉണർവ് നൽകി... പക്ഷെ അപ്പോഴും പലരും ആ വാർത്ത പലർക്കായി ഷെയർ ചെയ്തു കൊണ്ടേയിരുന്നു....

NB: നമ്മുടെ ജീവിതത്തിലെ ഓരോ കാര്യവും സമൂഹമാധ്യമങ്ങളിൽ പങ്കു വെക്കുമ്പോൾ അതിലെ ചതികുഴികളെ കുറിച്ചും നമ്മൾ ബോധവാൻമാരായിരിക്കുക..

Anjana Mariya Thomas