അവൾ

അവൾ
......................

"ഭൂമിയുടെ ഓരോ സ്പന്ദനവും
കണക്കിലാണെന്ന് ' എന്ന സ്ഫടികത്തിലെ ചാക്കോ മാഷിന്റെ ഡയലോഗിനെ ശരി വെക്കുന്ന
രീതിയിലായിരുന്നു ഒൻപതാം ക്‌ളാസ്സിലേക്കു പുതിയതായി വന്ന ബിന്ദു ടീച്ചറിന്റെ ഓരോ ക്ലാസും.

എന്റെ ഹൈസ്കൂൾ വിദ്യാഭ്യാസത്തിൽ ഞാൻ ഇത്രയേറെ ഭയന്നൊരു സബ്ജെക്ട് വേറെയില്ല. ഇപ്പൊ
നിങ്ങളെല്ലാവരും കരുതും ഞാൻ ബാക്കിയുള്ള എല്ലാ വിഷയത്തിനും ടോപ്‌ ആണെന്ന്.
എങ്കിൽ അത് നിങ്ങളുടെയെല്ലാം വെറുമൊരു തെറ്റ്ധാരണ മാത്രമായിരിക്കും എന്നു ഞാൻ ബോധിപ്പിച്ചു കൊള്ളുന്നു.
മറ്റുള്ള വിഷയങ്ങൾ ഞാൻ എങ്ങനെയെങ്കിലും പാസ്സാവുമെങ്കിലും
' കണക്കു ' എന്നും എനിക്കൊരു ബാലികേറാ മലയായിരുന്നു.
പുതിയതായി വന്ന ബിന്ദു ടീച്ചർ ആണെങ്കിൽ കണക്കിന്റെ കാര്യത്തിൽ കുട്ടികളോട് യാതൊരു വിട്ടു വീഴ്ചക്കും തയ്യാറായിരുന്നില്ല.
എന്നും ടെസ്റ്റ്‌ പേപ്പർ നടത്തുക, കുട്ടികളെ കൊണ്ടു കണക്കു ബോർഡിൽ ചെയ്യിപ്പിക്കുക ഇതൊക്കെ അവരുടെ സ്ഥിരം വിനോദങ്ങളായിരുന്നു.
എന്നെ പോലെ അഞ്ചാറു പേർ ടീച്ചറിന്റെ സ്ഥിരം വേട്ട മൃഗങ്ങൾ ആയിരുന്നു എന്നു പറയാം.
ബോർഡിലെ കണക്കു തെറ്റി കഴിഞ്ഞാൽ കയ്യിൽ നല്ല അസ്സല് ചൂരൽ കഷായം കിട്ടും. ഇങ്ങനെ ആഴ്ചയിൽ ഒരു മൂനാലഞ്ചു അടി ഞാൻ മുടങ്ങാതെ വാങ്ങാറുണ്ടായിരുന്നു.
എന്നും അടി വാങ്ങി വീട്ടിൽ വരുമ്പോഴും അടുത്ത ദിവസമെങ്കിലും വാങ്ങാതിരിക്കാൻ ഞാൻ കണക്കു ബുക്കിനെ ആർത്തിയോടെ മറച്ചു നോക്കും പക്ഷെ ലാസകുവും ലഖുകരണവും എന്നെ നോക്കി പല്ലിളിച്ചു കാണിക്കും.
ചൂരൽ സുഖം അനുഭവിക്കാത്ത കണക്കു ക്ലാസ്സ്‌ എന്നും എന്റെ സ്വപ്നത്തിൽ മാത്രമായിരുന്നു.
എന്നും കീട്ടുന്ന അടി എനിക്കും എന്റെ ആത്മ മിത്രങ്ങൾക്കും വഴിപാട് കഴിക്കാതെ കിട്ടുന്ന പ്രസാദം കണക്കെ ആയി മാറിയിരുന്നു.

ഒരു ദിവസം ലഘൂകരണം ചാപ്റ്ററിന്റെ ടെസ്റ്റ്‌ പേപ്പർ നടക്കുകയായിരുന്നു.
പുസ്തകത്തിൽ നിന്നും മറച്ചും തിരിച്ചും
ബിന്ദു ടീച്ചർ ഒരു പത്തു ചോദ്യങ്ങൾ കുട്ടികൾക്ക് കൊടുത്തു.
എത്ര തല പുകച്ചിട്ടും എനിക്ക് ഒന്നു പോലും ശരിയാക്കാൻ സാധിച്ചില്ല.
പത്തിൽ അഞ്ചണ്ണമെങ്കിലും ശരിയാക്കുന്നവർ ചൂരൽ കഷായത്തിൽ നിന്നും രക്ഷപെടും.
അര മണിക്കൂർ സമയം കഴിഞ്ഞപ്പോൾ എല്ലാവരുടെയും എഴുത് നിർത്താൻ ഓർഡർ കിട്ടി.
ആണുങ്ങളുടെ പേപ്പർ ജെൻസണും പെണ്ണുങ്ങളുടെ പേപ്പർ റിയയും കളറ്റ് ചെയ്തു. ശേഷം ജെൻസൺ ആണുങ്ങളുടെ പേപ്പർ റിയക്കും റിയ പെണ്ണുങ്ങളുടെ പേപ്പർ ജെൻസണും കൈമാറി. ആൺകുട്ടികളെ ബിന്ദു ടീച്ചറിന് തീരെ വിശ്വാസം ഇല്ലാത്തതു കൊണ്ടാണ് ആണുങ്ങളുടെ പേപ്പർ പെണ്ണുങ്ങളും പെണ്ണുങ്ങളുടെ പേപ്പർ ആണുങ്ങളും നോക്കുന്ന സമ്പ്രദായം കൊണ്ടു വന്നത്.

എല്ലാം ചോദ്യങ്ങളുടെ ഉത്തരങ്ങളും
ടീച്ചർ ബോർഡിൽ എഴുതി. ഞങ്ങൾ അത് ബുക്കിൽ പകർത്തിയെടുത്തു.
വൈകീട്ട് വീട്ടിൽ ചെന്നിട്ടാണ് ബുക്ക്‌ നോക്കി പേപ്പർ വാലുവേഷൻ നടത്തുന്നത്.
എനിക്ക് കിട്ടിയ അഞ്ജലിയുടെ പേപ്പറിൽ ഏഴെണ്ണം ശരിയായിരുന്നു.
ഇവളൊക്കെ ഇത് എങ്ങനെ സാധിക്കുന്നു എന്നു ഞാൻ മനസ്സിൽ പറഞ്ഞു.
എന്റെ പേപ്പർ കിട്ടുന്നവൾക്കു കൂടുതൽ ഒന്നും കുത്തിയിരുന്ന് നോക്കേണ്ടി വരുന്നില്ല എന്നാലോചിക്കുമ്പോൾ എനിക്ക് തന്നെ അറിയാതെ ചിരി വന്നു പോയി.

പിറ്റേന്ന് ബിന്ദു ടീച്ചർ വന്ന പാടെ തന്റെ കയ്യിലെ വലിയ ആ ചൂരൽ വായുവിൽ ഒന്നു ചുഴറ്റിയതിനു മേശ പുറത്തേക്കു വെച്ചു.
വടി കണ്ടതും എന്റെ ഉള്ളം കയ്യിലെ ഞെരമ്പൊന്നു വലിച്ചു കൂട്ടി.
ജെൻസണും റിയയും ടെസ്റ്റ്‌ പേപ്പർ വാലുവേഷൻ കഴിഞ്ഞത് എല്ലാവരുടെയും
കയ്യിൽ നിന്നും തിരിച്ചു വാങ്ങിച്ചു.
എന്റെ കയ്യിലെ അഞ്ജലിയുടെ പേപ്പർ തിരികെ കൊടുക്കാൻ നേരം ഞാൻ അഞ്ജലിയെ ഒന്നു ഒളികണ്ണിട്ടു നോക്കി.
യാതൊരു ടെൻഷനും കൂടാതെ ഇരിക്കുന്ന അവളെ കണ്ടപ്പോൾ എനിക്ക് അത്ഭുതം തോന്നാതെയിരുന്നില്ല. ജയിക്കുമെന്നുറപ്പുള്ള അവളുടെ ആ മുഖം എനിക്ക് കിട്ടാൻ പോകുന്ന അടിയേക്കാളും വലുതലായി തോന്നിയില്ല.

റിയ എന്റെ പേപ്പർ പേരു വിളിച്ചു തിരികെ തന്നെങ്കിലും അതിലെ മാർക്ക് നോക്കുവാനോ എനിക്ക് തോന്നിയില്ല.
മനസ് മുഴുവനും കിട്ടാൻ പോകുന്ന ആ രണ്ടു അടിയുടെ ചൂടിലായിരുന്നു.
അടുത്തിരിക്കുന്ന വിമലും അരുണും തോറ്റതായി എന്നോട് പറഞ്ഞു.
അഞ്ചിൽ താഴെ മാർക്ക് കിട്ടിയവർ എഴുന്നേറ്റു നിൽക്കുവാൻ ബിന്ദു ടീച്ചർ വടി തിരുമ്മിക്കൊണ്ട് പറഞ്ഞു.
ഞാനുൾപ്പടെ ഒരു എട്ടു പേർ അടി വാങ്ങാനായി എഴുന്നേറ്റു നിന്നു.

ഒന്നോ, അതോ രണ്ടൊ എഴുന്നേൽക്കുന്നതിനു ഇടയിൽ ഞാൻ എന്റെ പേപ്പർ ഒന്നു മറിച്ചു നോക്കി.

പത്തിൽ'" അഞ്ചു '" എന്നു കണ്ട ഞാനൊന്നു വിറച്ചു പോയി. ഈശ്വരാ ഇതെന്തു മറിമായം ഞാൻ കണ്ണൊന്നു ശക്തിയായി തിരുമി.
ഇല്ല അഞ്ചു തന്നെ പക്ഷെ ഇതെങ്ങനെ
സംഭവിച്ചു. എന്റെ പേപ്പറിൽ ഞാൻ എന്തൊക്കെയോ എഴുതി വച്ചതല്ലാതെ വെട്ടും തിരുത്തുമായി അഞ്ചണ്ണം ശരിയായിരിക്കുന്നു. ആരോ ശരിയാക്കിയിരിക്കുന്നു.

അന്നത്തെ അടിയിൽ നിന്നും അവൾ എന്നെ രക്ഷിച്ചിരിക്കുന്നു. ആരായിരുന്നു അവൾ.
ഞാൻ ഒളികണ്ണിട്ടു പെണ്ണുങ്ങളുടെ ഭാഗത്തേക്കു നോക്കി, ഇല്ല എല്ലാ കണ്ണുകളും അവരവരുടെ പേപ്പറിൽ തന്നെ.
ക്ലാസ്സിലെ ആ മുപ്പത്തി മൂന്നു പെൺകുട്ടികളിൽ ആരായിരക്കും" അവൾ '
അടികൊണ്ടു ഒരിക്കൽ പോലും വേദനിക്കാത്ത എന്റെ മനസ്സിൽ വല്ലാത്തൊരു പിടച്ചിൽ അന്നുണ്ടായി.
ഒരിക്കലും തിരിച്ചറിയാതെ ആ അഞ്ചു മാർക് ഇന്നും ഒരു ചോദ്യചിഹ്നമായി, എന്നിൽ.

ആരായിരുന്നു അവൾ ?

Aneesh. pt