മായാത്ത നർമ്മനിമിഷങ്ങൾ..........

എറണാകുളം കലൂർ ജവഹർലാൽ നെഹ്രുസ്റ്റേഡിയത്തിൽ പണ്ട് ഇന്ത്യയും വേറെ ഏതൊ വിദേശരാജ്യവുമായി (മറ്റേ ചേച്ചി പറഞ്ഞതുപോലെ മുംമ്പൈ, ചെന്നൈ അതൊന്നുമല്ല കേട്ടോ) മത്സരം നടക്കുന്നത് കാണാൻ എന്റെ സുഹൃത്തിലൊരാൾ ചൂട്ടുകറ്റയും കത്തിച്ചുപിടിച്ചു പോയിരുന്നു...

നൂറുരൂപയാണ് ഗ്യാലറിക്ക്. വെളുപ്പിനെ തന്നെ ഗ്യാലറിയിൽ കുത്തിപ്പിടിച്ചിരുന്ന് കളി തുടങ്ങിയപ്പോൾ പതിനൊന്നു മണിയോളമായി. അങ്ങനെ ആവേശകരമായ കളി നേരിൽകണ്ട് രോമാഞ്ചകഞ്ചുകനായി നമ്മുടെ ഗഡ്ഡി ഇരിക്കവേ അതാ, ഇന്ത്യയുടെ ഓരോ കളിക്കാരും കിട്ടിയ താറാവിന്റെ(ഡക്കായി) കഴുത്തിൽ പിടിച്ച് ബാറ്റും കശത്തിൽ വച്ചു ഏതാണ്ട് പോയ അണ്ണാനെപ്പോലെ പോകുന്ന കാഴ്ച ക്ലിപ്പിംഗ് ഇടാത്ത ഷക്കീലപടം കണ്ട ഞരമ്പനെപോലെ ഇരിപ്പായി...

ഇനി നൂറടിച്ച് സ്റ്റെപ്പ് തെറ്റാതെ എന്നും സ്വന്തം വീട്ടിൽ തന്നെ കേറിചെന്ന് ഭാര്യയിൽ നിന്നും കുമ്മനിടി മേടിച്ച് ഞാനൊന്നുമറിഞ്ഞില്ല രാമനാരായണ എന്നും പറഞ്ഞു മലർന്നുകിടന്നു കൂർക്കം വലിച്ചുറങ്ങുന്ന കടയാടി ബേബിച്ചായൻ വന്നാൽ പോലും ഇന്ത്യയെ ജയിപ്പിക്കാനാകില്ല എന്ന തുണിയില്ലാത്ത സത്യം(നഗ്ന സത്യം) മനസ്സിലാക്കിയ ടിയാൻ നാട്ടിലേയ്ക്കുള്ള ബസ്സ് പിടിക്കാനായി കലൂർ സ്റ്റാൻഡിലേയ്ക്ക് മെതിയടിയില്ലാത്ത കാലുകളുമായി വച്ചുപിടിപ്പിച്ചു...

ബൈദ ബൈ ഞാൻ പറഞ്ഞു വന്നത് ഈ സംഭവം നടന്നത് കുറെ വർഷങ്ങൾക്ക് മുന്നേ ആയിരുന്നു. അന്ന് ഇന്ത്യ യാതൊരു ജാഡയും വാടയുമില്ലാതെ നൈസായിട്ട് തോറ്റിരുന്നു. കളി നേരിൽ കണ്ടതിന്റെ തെല്ലഹംങ്കാരം ഈ തെണ്ടിക്കിപ്പളുമില്ലാതില്ല...

സായാഹ്നങ്ങളിലെ വെടിപ്പറച്ചിലുകളിൽ ഞങ്ങൾ സുഹൃത്തുക്കൾക്കിടയിൽ ഈ കളിയുടെ വിശേഷം വർഷങ്ങൾക്കുശേഷം ഇവൻ തന്നെ എടുത്തിട്ടു. അവൻ നിന്നു കീറുകയാണ് അന്നത്തെ കളിയുടെ വിശേഷങ്ങൾ. ഞങ്ങൾ പറഞ്ഞു

"എടാ നീ നേരിൽ കാണാൻ പോയതുകൊണ്ടാണ് ഇന്ത്യ തോറ്റുതുന്നം പാടിയതെന്ന്"

ഇവനുണ്ടോ അതു സമ്മതിച്ചുതരുന്നു. അതൊന്നുമല്ല ഇന്ത്യ നന്നായി കളിച്ചു പക്ഷെ പിച്ച് ശരിയല്ലാത്തതുകൊണ്ടു മാത്രമാണ് ഇന്ത്യ തോറ്റു പോയതെന്ന അവന്റെ വാതം പിടിച്ചതു പോലുള്ള വായക്കൊണ്ടു വാദിച്ചപ്പോൾ പിടിച്ചൊരു 'പിച്ചു' വച്ചു കൊടുക്കാൻ തോന്നി എന്നു ഞാൻ പറഞ്ഞാൽ അത് നിങ്ങൾപോലും നിഷേധിക്കില്ല...

കാരണം, അവൻ പറഞ്ഞതു കേട്ടപ്പോൾ അവനുള്ള കറക്ട് മറുപടി കൊടുത്ത് അവന്റെ വായടപ്പിച്ച ശക്തരിൽ ശക്തൻ, വില്ലാളിവീരൻ, ചേരാദിമൂർഖൻ, കില്ലാടിയോംക കില്ലാടി(സ്വന്തം എക്സ്റേ എടുക്കണമെങ്കിൽ ഷർട്ടൂരി ഭിത്തിസൈഡിലേയ്ക്ക് നീക്കി നിർത്തി ടോർച്ചടിച്ചാൽമാത്രം മതി എന്നു സ്വയം കണ്ടെത്തിയ ആകാരസമ്പുഷ്ടനായ മെലിഞ്ഞുണങ്ങിയ, ഇന്ന് ഞങ്ങളിൽ നിന്നും വേർപിരിഞ്ഞുപോയ എന്നെ പെയിന്റിംഗ് ബ്രഷ് പിടിക്കാൻ പഠിപ്പിച്ച എന്റെ ആശാനായ സുഹൃത്ത്) ആയ ജോബി അവനോടു ചോദിച്ചതിങ്ങനെയാണ്.

"നീ പറഞ്ഞത് ഇന്ത്യ തോൽക്കാൻ കാരണം പിച്ച് ശരിയല്ലാത്തതാണെന്നല്ലേ അങ്ങനാണെങ്കിൽ എതിർ ടീം എങ്ങനെ ജയിച്ചു"

നിങ്ങൾക്ക് ട്യൂബ് കത്തിയില്ല ല്ലേ.

അതായത് രമണാ പിച്ച് ശരിയല്ലായിരുന്നെങ്കിൽ രണ്ടു ടീമും തോൽക്കില്ലേ രണ്ടു ടീമിനും അത് ബാധകമല്ലേ. കാരണം രണ്ടു ടീമിനുമില്ലേ ബാറ്റിംഗും ബൗളിംഗും. ഇതിവൻ പറഞ്ഞതും ബാക്കിയുള്ള ഞങ്ങളെല്ലാവരും ജോബിയെ സപ്പോർട്ടു ചെയ്തപ്പോൾ മറ്റവനും സംശയമായി അതും ശരിയാണല്ലോ എന്നാൽ പിന്നെ അവരും തോൾക്കണ്ടേ. മറുപടി പറയാൻ കഴിയാതെ ബബ്ബ ബബ്ബ വച്ച അവനൊക്കെയിപ്പോൾ എവിടാണോ എന്തോ.....
<<<<<<<<<<<<<<<<<<<<<<<<<<<<<<<<<<<<<<<<<

ദന്തൽ ക്ലിനിക്കിൽ നഴ്സായി ജോലി കിട്ടിയ എന്റെ നാട്ടുകാരിയെ കണ്ട ഒരു സുഹൃത്ത് അവളോട് ഇങ്ങനെ ചോദിച്ചു

" എന്നാ ഉണ്ട് വിശേഷം ഇപ്പോൾ ഇവിടാണോ ജോലി "

അവൾ മറുപടി കൊടുത്തു

"അതെ ഇവിടെ ജോലിക്ക് കേറിയിട്ട് കുറച്ചായതേയുള്ളു"

"എങ്ങനുണ്ട് ജോലിയൊക്കെ, ആളുകളൊക്കെ വരാറുണ്ടോ"

" കുഴപ്പമില്ല നന്നായി പോകുന്നു അത്യാവശ്യം തിരക്കൊക്കെയുണ്ട് "

"ആട്ടെ ഇവിടെങ്ങനെയാണ് ടെംപററിയാണോ അതോ പ്രഗ്നന്റ് ആണോ(ലവൻ ഉദ്ദേശിച്ചത് പെർമനന്റാണോ എന്നാണ്, പക്ഷെ അത് കറക്ടായിട്ട് പറയാൻ നാക്കു വഴങ്ങാത്തതു കൊണ്ടു പറഞ്ഞപ്പോൾ ഇങ്ങനായിപോയി) "

ഇതു കേട്ടതും കല്യാണംപോലും കഴിക്കാത്ത ലവള് ചാടി അകത്ത് കേറി ഡോറടച്ചു. എട്ടാം ക്ലാസ്സും ഗുസ്തിയുമായ ലവൻ അതു കണ്ടു ഉള്ളിൽ ചിരിച്ചു. ഈ വിവരം ഞങ്ങളോടു വന്നു പറഞ്ഞത് ഇങ്ങനെ

" ഞാൻ ലവളോട് ടെംപററിയാണോ പ്രഗ്നന്റാണോ എന്ന് ചോദിച്ചപ്പോൾ എന്റെ അളിയാ അപ്പോൾ തന്നെ ലവള് ചാടി മുറിക്കകത്ത് കയറി കതകടച്ചു കുറ്റിയിട്ടു"

എന്നിട്ടൊരു ചിരി ചിരിച്ചിട്ട് ലവൻ പറയുവാണ്

"ലവളൊക്കെ വല്യ നഴ്സിങ്ങ് പടിച്ചതാണ് എന്നിട്ട് ഞാൻ ചോദിച്ച സിമ്പിൾ ഇംഗ്ലീഷുപോലും മനസ്സിലായില്ല പുവർ ഗേൾ"

ഇതുകേട്ട് ഞങ്ങളെല്ലാം തലകുത്തി മറിഞ്ഞ് ചിരിച്ചപ്പോൾ ലവനും ചിരിയിൽ പങ്കു ചേർന്നു. ലവന്റെ ഊളത്തരം മനസ്സിലാക്കിയിട്ടാണ് ഞങ്ങൾ ചിരിച്ചതെന്നു മനസ്സിലാകാത്ത ലവൻ വിചാരിച്ചത് ലവൻ പറഞ്ഞ തമാശ കേട്ടിട്ടാണ് ഞങ്ങൾ ചിരിച്ചതെന്നാണ്. ഞാൻ ചോദിച്ചു അളിയാ

" ടെംപററിയാണോ എന്നു ചോദിച്ചാൽ അതിന്റെ അർത്ഥമെന്താണ്"

"താൽക്കാലികമാണോ"

എന്നവൻ പറഞ്ഞതു കേട്ടപ്പോൾ ഞാൻ അവനോടു ചോദിച്ചു

" അപ്പോൾ പ്രഗ്നന്റാണോ എന്നു പറഞ്ഞാലോ"

ലവൻ പറഞ്ഞു

" സ്ഥിരമാണോയെന്ന് "

"എടാ മണൻകൊണാച്ചാ അതിനു പറയുന്നത് പെർമനന്റ് ആണോ എന്നാണ് "

"പ്രഗ്നന്റ് എന്ന വാക്കിന്റെ അർത്ഥം ഗർഭിണിയാണോ എന്നാണെടാ വധൂരി"

അപ്പോളാണ് കാര്യങ്ങളുടെ കിടപ്പുവശം അവന് ശരിക്കും മനസ്സിലായത്. അന്നേരമവൻ ഫ്രണ്ട്സ് സിനിമയിൽ ശ്രീനിവാസൻ ചിരിച്ചതുപോലെ ചിരിക്കാൻ തുടങ്ങി. ഞങ്ങളവനെ ഇതും പറഞ്ഞെന്നും കളിയാക്കുമായിരുന്നു. അവനിപ്പോൾ ഊളത്തരമായിട്ടെവിടാണോ എന്തോ...
>>>>>>>>>>>>>>>>>>>>>>>>>>>>>>>>>>>>>>>>

യൂറോപ്യൻ ക്ലോസറ്റ് ഇൻഡ്യൻ ക്ലോസറ്റ് ഫിറ്റു ചെയ്യുന്നതു പോലെ തറയിൽ ഇറക്കി വച്ചിട്ട് പരിക്കനിട്ടുറപ്പിച്ചിട്ട്

"ചേച്ചി ഫുട്ട്റെസ്റ്റ് ചേട്ടൻ മേടിച്ചില്ലേ "

എന്നു ചോദിച്ച കുശില്മേസ്തിരിക്കിപ്പോൾ പണിയൊക്കെയുണ്ടോ ആവോ...
<<<<<<<<<<<<<<<<<<<<<<<<<<<<<<<<<<<<<<<<<<

മതിലിന്റെ സൈഡിൽ ചാരി വച്ചിരുന്ന മേച്ചിൽ ഓടിൽ വെള്ളമൊഴിക്കാൻ പറഞ്ഞപ്പോൾ മതിലിന്റെ സൈഡിലുള്ള ഓടയിൽ രണ്ടു ബക്കറ്റ് വെള്ളമൊഴിച്ചിട്ട് മിഴിക്കച്ചാന്ന് മുകളിലേയ്ക്ക് നോക്കി മച്ചിന്റെ മുകളിൽ ഓട് മേയാനിരുന്ന മേസ്തിരിയുടെ വായിൽ നിന്നും തലേന്നടിച്ച പുളിച്ച കള്ളിന്റെ അതേ രുചിയോടെ പുളിച്ചതെറി കേട്ട ദൊപ്പയ്യാ ഒക്കെ ഇപ്പോൾ എവിടാണോ എന്തോ...
>>>>>>>>>>>>>>>>>>>>>>>>>>>>>>>>>>>>>>>>

കട്ടിളയുടെ അകവണ്ണമെടുക്കാൻ പറഞ്ഞപ്പോൾ ടേപ്പു കിട്ടാതെ വന്നപ്പോൾ നിലത്ത് കിടന്ന റബ്ബർബാൻഡെടുത്ത് വലിച്ചു നീട്ടി അളവെടുത്തിട്ട് അതേപോലെ തന്നെ റബ്ബർ ബാൻഡ് അകത്തി പിടിച്ച് സൂപ്പർവൈസറുടെ അടുത്തേയ്ക്ക് പോയവഴിക്ക് സിമൻറ് ചുമന്നു വന്ന കല്യാണിചേച്ചിയുടെ ദേഹത്ത് മുട്ടാതിരിക്കാൻ വേണ്ടി വലത്തെകൈ ഇച്ചിരി അടുപ്പിച്ചപ്പോൾ അളവ് തെറ്റിപോയ അന്തോണി ചേട്ടന്റെയൊക്കെ മൂക്കിൽ പല്ലു കിളിത്തോ എന്തോ...
<<<<<<<<<<<<<<<<<<<<<<<<<<<<<<<<<<<<<<<<<

ബീഡിക്കറ പോകാൻ ആസിഡ് വാഷ് ചെയ്താൽ മതിയെന്നു പറഞ്ഞത് കേട്ട് പല്ല് ക്ലീൻ ചെയ്ത് മുൻനിരയിലെ പല്ലുകൾ മൊത്തംപോയി മോണകൾ കാട്ടി കുട്ടികൾ ചിരിക്കുന്നതുപോലെ ചിരിക്കുന്ന പൊട്ടൻകുട്ടനൊക്കെ രാവിലെ പല്ലു തേക്കാൻ ഉമിക്കിരി കിട്ടുന്നുണ്ടോ ആവോ...

>>>>>>>>>>>>>>>>>>>>>>>>>>>>>>>>>>>>>>>>

എന്തായാലും ഈ പ്രാവശ്യത്തെ ക്രിസ്മസ്സ് ഇരുപത്തഞ്ചാം തീയതി തന്നെയാണെന്നു പറഞ്ഞ ടിൻറുമോനോക്കെ ഇപ്പോളും സ്റ്റാറായി തന്നെയിരിക്കുന്നോ എന്നറിയില്ല. (ആ വർഷത്തെ ക്രിസ്തുമസ്സ് ഞായറാഴ്ചയായിരുന്നു അത് മനസ്സിലോർത്ത് പറഞ്ഞതാണ് കക്ഷി, പക്ഷെ പറഞ്ഞപ്പോൾ ഒരു പൊടിക്കങ്ങ് മാറി പോയെന്നു മാത്രം)...
<<<<<<<<<<<<<<<<<<<<<<<<<<<<<<<<<<<<<<<<<<

കുരിശുപള്ളിയുടെ നടയിൽ വാചകമടിച്ചിരുന്ന സുഹൃത്തുക്കൾക്കിടയിൽ നിന്നും നേരെ മുന്നിലുള്ള പലചരക്ക് കടയിലേയ്ക്കുപോയ ഒരു സുഹൃത്തിനോട് മറ്റൊരുവൻ പ്ലസ്സ് വൺ എന്ന് നീട്ടിവിളിച്ചു പറഞ്ഞതിനു ശേഷം അയാള് തിരികെ വന്നു ബെറ്റിക്കോട്ട് കൂട് കൊടുത്തപ്പോൾ അത് കണ്ട് അന്തംവിട്ടവൻ ചോദിച്ചു

"ഇതെനിക്കെന്തിനാണ് "

"നീയല്ലേ ഞാൻ കടയിൽ പോയപ്പോൾ പ്ലസ് വൺ എന്നു പറഞ്ഞത് "

"അല്ല ! അപ്പോൾ നീ സിഗററ്റ് മേടിക്കാൻ പോയതല്ലായിരുന്നോ "

"അല്ല ! കപ്പ മേടിക്കാൻ വേണ്ടി ഒരു കൂടു മേടിക്കാൻ പോയതാണ് ഞാൻ "

അവൻ പ്ലിംങ്ങോടു പ്ലിങ്ങ്

ആരെങ്കിലും സിഗററ്റ് മേടിക്കാൻ കടയിൽ പോകുമ്പോൾ പ്ലസ് വൺ എന്ന് ഈ ചങ്ങാതി എപ്പോളും പറയുമായിരുന്നു. അതിന്റെ അർത്ഥം ഒരെണ്ണം കൂടി കൂട്ടി മേടിച്ചോളാനാണ്. കാശ് ഇവിടെ വരുമ്പോൾ തരാമെന്നു പറഞ്ഞാലും സിഗററ്റ് മേടിച്ചു വലിച്ചിട്ടു കാശ് കൊടുക്കാതിരുന്ന ലവനൊക്കെ കക്കൂസിൽ പോകുമ്പോൾ വലിക്കാൻ ആവശ്യത്തിനുള്ള സിഗററ്റ് കിട്ടുന്നുണ്ടോ ആവോ...
>>>>>>>>>>>>>>>>>>>>>>>>>>>>>>>>>>>>>>>

ബസ്സിൽ മുകളിലത്തെ കമ്പിയിൽ പിടിച്ചു നിന്നു യാത്ര ചെയ്യുന്ന കല്ലുവാതുക്കൽ കത്രീന ചേച്ചിയോട് ഒഴിഞ്ഞ സീറ്റ് കാണിച്ചു കൊടുത്തപ്പോൾ ഇരിക്കാനൊന്നും സമയമില്ല ചെന്നിട്ട് നൂറു കൂട്ടം പണിയുള്ളതാണെന്നു പറഞ്ഞത് കേട്ട അന്ത്രോമാനൊക്കെ ബസ്സിൽ ഇരിക്കാൻ സീറ്റ് കിട്ടാറുണ്ടോ എന്റെ റബ്ബേ...

..............................✍മനു .