സ്വതന്ത്രസേവനം - (വരുംകാല കാഴ്ചകൾ)

- ഗിരി ബി വാരിയർ-

തിരഞ്ഞെടുപ്പിന്റെ ഫലം വന്നപ്പോൾ...

ഒരിക്കൽ പോലും സന്ദർശിച്ചിട്ടില്ലാത്ത
ഗ്രാമപ്രദേശത്തെ മണ്ഡലത്തിൽ
നിന്ന് ഒരു ദേശീയപാർട്ടിയുടെ
കീഴിൽ മത്സരിച്ച്
വിജയിച്ച സ്ഥാനാർത്ഥി
മന്ത്രിസ്ഥാനത്തിനുവേണ്ടി
തലസ്ഥാനത്ത് പുതിയ
തന്ത്രങ്ങൾ മെനയുമ്പോൾ...

എതിർപക്ഷസ്ഥാനാർത്ഥി
തോൽവിയുടെ ക്ഷീണം
മാറ്റാനായി നഗരത്തിലെ
ഏതോ പഞ്ചനക്ഷത്ര
ഹോട്ടലിലെ ശീതികരിച്ച
മുറിയിൽ വിശ്രമിക്കുമ്പോൾ ...

വിജയിച്ച ദേശീയപാർട്ടിയുടെ
അണികൾ ആഹ്ളാദത്തിമിർപ്പിൽ
ആട്ടവും പാട്ടും നടത്തുമ്പോൾ...

തങ്ങൾക്ക് നഷ്ടപ്പെട്ട വോട്ടുകളുടെ
കണക്കുകൾ പിച്ചിച്ചീന്തി
എതിർപക്ഷപാർട്ടിക്കാർ
പരസ്പരം വിരൽ ചൂണ്ടുമ്പോൾ ..

വർഷങ്ങളായി ...
ഊണും ഉറക്കവും കളഞ്ഞു്
നാടിനും നാട്ടുകാർക്കും വേണ്ടി
ഓടിനടന്ന് സേവനം ചെയ്ത്,
ആരുടെയോ നിർബന്ധത്തിൽ
സ്വതന്ത്രനായി മത്സരിച്ച്,
നൂറിൽ താഴെ മാത്രം വോട്ട് നേടിയ
സ്ഥലവാസിയായ സ്ഥാനാർത്ഥി
കടത്തിണ്ണയിൽ മരിച്ചുകിടന്നിരുന്ന
ഏതോ ഒരു വ്യദ്ധയുടെ
ശവസംസ്കാരത്തിന് വേണ്ട
ഒരുക്കങ്ങൾ ചെയ്യാൻ
നെട്ടോട്ടമോടുകയായിരുന്നു,
ജനസേവനമെന്ന വാക്കിന്റെ
മാറിയ മാനങ്ങളറിയാതെ...

*****
ഗിരി ബി വാരിയർ
27 മാർച്ച്‌ 2019