സമാധാനം

************

ഒരിടത്ത് ഒരു മനുഷ്യൻ ഉണ്ടായിരുന്നു. തന്റെ ജീവിതത്തിൽ എപ്പോഴും ഉത്കണ്ഠകളും, ആശങ്കകളും നിറച്ചിരുന്ന ജീവിതമായിരുന്നു അയാൾ നയിച്ചിരുന്നത്.

സ്വന്തം കുടുംബാഗങ്ങളും, സുഹൃത്തുക്കളും ,എപ്പോഴും ഉത്കണ്ഠ നിറഞ്ഞ മുഖഭാവത്തോടെ മാത്രമേ അയാളെ കണ്ടിരുന്നുള്ളൂ.

പല പ്രകാരത്തിലും അയാളെ ആ സ്വഭാവത്തിൽ നിന്നും മാറ്റിയെടുക്കാൻ അവർ ശ്രമിച്ചു. എങ്കിലും അയാളെ മാറ്റിയെടുക്കാൻ കഴിഞ്ഞില്ല ... എന്നു മാത്രമല്ല കാര്യങ്ങൾ കൂടുതൽ വഷളവാകുകയും ചെയ്തു.

അയാളുടെ ഈ അവസ്ഥ കണ്ട് അയാളുടെ സുഹൃത്ത് , അയാളോട് പ്രശസ്തമായ ഒരു ധ്യാനകേന്ദ്രത്തെ ക്കുറിച്ചും, അത് നടത്തുന്ന ഫാദറിനെക്കുറിച്ചും പറഞ്ഞു. ഒരു പക്ഷേ ആ ഫാദറിന് നിന്നെ ഈ അവസ്ഥയിൽ നിന്ന് രക്ഷപ്പെടുത്താനാവും. നീ ഒന്നു പോയി നോക്ക് ... എന്നു പറഞ്ഞ് അയാളെ ഉപദേശിച്ചു.

ആ സുഹൃത്തിന്റെ നിർദ്ദേശ പ്രകാരം അവിടെ പോകാൻ തീരുമാനിച്ചു.

അതിനായി ഒരു ദിവസം അയാൾ അവിടെ പോയി. ധ്യാനകേന്ദ്രത്തി ലെത്തിയ അയാൾ ആ സുഹൃത്ത് പറഞ്ഞ പ്രകാരത്തിലുള്ള ഫാദറിനെ കാണാനിടയായി.

ആ ഫാദർ അയാളെ തന്റെ ഓഫീസ് മുറിയിലേയ്ക്ക് കൂട്ടിക്കൊണ്ടുപോയി.

അവിടെ ഒരു കസേര ചൂണ്ടിക്കാണിച്ചു കൊണ്ട് ഇരിക്കാൻ ആംഗ്യം കാണിച്ചു.
എന്നിട്ട് ഫാദർ തന്റെ സീറ്റിൽ ഇരുന്നതിനു ശേഷം , അയാളോട് എന്താണ് നിന്റെ പ്രശ്നം..? എന്നു ചോദിച്ചു.

അയാൾ ഫാദറിനോട് പറഞ്ഞു,

'' ഫാദർ എന്താണ് എന്നറിയില്ല, എന്നെ, ഇനി എന്ത്? എന്ന ചോദ്യം എപ്പോഴും അലട്ടുന്നു. എപ്പോഴും അതിനെക്കുറിച്ച് ഉത്കണ്ഠകളും, ആശങ്കകളും എന്നിൽ നിറയുന്നു. എനിക്ക് ഇതിൽ നിന്ന് മോചനം വേണം. ഫാദർ എന്നെ സഹായിക്കണം.''. അയാൾ മുന്നോട്ടാഞ്ഞ് ഫാദറിന്റെ കൈകളിൽ പിടിച്ച് കൊണ്ട് പറഞ്ഞു.

അപ്പോൾ ആ ഫാദർ പുഞ്ചിരിച്ചു കൊണ്ട് അയാളോട് പറഞ്ഞു..,

'' നീ തന്നെയാണ് നിന്റെ പേടിയെ മുറുകി പിടിച്ചു വച്ചിരിക്കുന്നത്. പിന്നെ നിനക്ക് എങ്ങനെ മോചനം കിട്ടും?"

''ഫാദർ അങ്ങെന്താണ് പറയുന്നത്. ഞാൻ തന്നെയാണ് അത് പിടിച്ചു വച്ചിരിക്കുന്നത് എന്നോ? ഞാൻ അത് വിശ്വസിക്കില്ല''. അയാൾ വളരെ ക്ഷീണിതനായി പറഞ്ഞു.

''കുഞ്ഞേ.. നീ ആലോചിച്ചു നോക്കൂ... നിന്റെ ഭയം എന്തിൽ നിന്നാണ് നിന്നെ സംരക്ഷിക്കുന്നത് എന്ന്. അപ്പോൾ നിനക്ക് ഉത്തരം കിട്ടും. നീ സ്വയം സമ്മതിക്കുകയും ചെയ്യും . നിന്റെ വിഡ്ഢിത്തം നിനക്ക് മനസ്സിലാവും. എന്ന് ഇത് തിരിച്ചറിയുന്നുവോ അന്ന് നിന്റെ ജീവിതത്തിൽ സന്തോഷവും, സമാധാനവും നിറയും.''

സുമി ആൽഫസ്