ഫോൺ ബെല്ലടിക്കുന്നത് കേട്ടാണ് അനൂജ രാവിലെ എണീക്കുന്നത്....
ഏത് തെണ്ടിയാണാവോ ഈ നേരത്ത്...
ഏഴു മണിക്ക് അലാറം വെച്ചതാ, അതിനു മുമ്പോ വിളിച്ചുണർത്തിയതിന്റെ അരിശത്തിലാണ് ഫോണെടുത്തത്....
ജിനി.. അവളെന്താ ഈ നേരത്ത്...
കുറെ നാളായി വാട്സാപ്പ് സന്ദേശങ്ങളും വിളിയുമൊക്കെ കുറവായിരുന്നു... സ്റ്റാറ്റസ് ഫോട്ടോക്ക് അങ്ങോട്ടുമിങ്ങോട്ടും ഉള്ള റിപ്ലെ മാത്രമാണ് ഇപ്പോഴുള്ളത്....
എന്താ ടീ ഈ നേരത്ത്...
മനുഷ്യനെ ഉറങ്ങാനും സമ്മതിക്കൂല്ലേ...
അനൂ എനിക്ക് നിന്നെയൊന്ന് കാണണം.... നീ ഇങ്ങോട്ടൊന്ന് വര്യോ....
ഉച്ചക്ക് മുമ്പ് വരാടീ... ഇന്ന് ഹാഫ് ഡേ ലീവാ... പെണ്ണ് കാണാൻ ചെറിയമ്മേടെ ബന്ധത്തിൽപ്പെട്ട ആരോ വരണണ്ട്... അവര് പോയാലുടൻ വരാം...
ടൗണിൽ നിന്നും കുറച്ച് മാറി അഭിയുടെ വാടക വീട്ടിലേക്ക് പോകുമ്പോൾ അനു ചിന്തിച്ചു... എന്തായിരിക്കും ജിനിക്ക് തന്നെ കണ്ടിട്ട് അത്യാവശ്യം....
അഞ്ചു വർഷം മുമ്പ് അഭി ജിനിയെ കെട്ടുമ്പോൾ താനടക്കം നലഞ്ച് കൂട്ടുകാരുടെ സപ്പോർട്ട് മാത്രമേ ഉണ്ടായിരുന്നുള്ളൂ.....
സ്വകാര്യ സ്ഥാപനത്തിലെ ചെറിയ വരുമാനം കൊണ്ട് ജീവിതം മുന്നോട്ട് കൊണ്ടുപോവാൻ ബുദ്ധിമുട്ടിയപ്പോഴാണ് രണ്ടു വർഷം മുമ്പവൻ ഗൾഫിലേക്ക് ചേക്കേറിയത്....
പോകുമ്പോഴും ജിനിയെയും കുഞ്ഞിനെയും തങ്ങളെ ഏൽപ്പിച്ചാണ് അവൻ പോയത്....
ആദ്യമൊക്കെ ഇടക്കിടെ ചെന്ന് അന്വേഷിച്ചിരുന്നെങ്കിലും പിന്നീട് അവൾ തന്നെ ഒര കൽച്ച കാണിച്ചു തുടങ്ങി...
പതിയെ അങ്ങോട്ടുള്ള പോക്കും വിളിയും സംസാരവുമൊക്കെ കുറഞ്ഞു....
ചെന്ന് കേറിയപ്പോൾ തന്നെ കരഞ്ഞ് കലങ്ങിയ അവളുടെ മുഖമാണ് കണ്ടത്...
എന്തു പറ്റി ജിനി .....
കരഞ്ഞുകൊണ്ടാണ് അവൾ അവളുടെ പുതിയ മെസ്സൻജർ സൗഹൃദത്തെ കുറിച്ച് പറഞ്ഞത്....
ദീപക്, അവനോടുള്ള സൗഹൃദം എല്ലാ അതിരുകളും ലംഘിച്ചു കഴിഞ്ഞു....
പലപ്പോഴും പല രാത്രികളിലും അവൻ അവളോടൊപ്പം വന്ന് താമസിച്ചിട്ടുണ്ട്.... ഇപ്പോൾ അവനോടൊപ്പം ഇറങ്ങി ചെല്ലണമെന്നതാണ് അവന്റെ ആവശ്യം...
നാലു വയസ്സുകാരി മകളെ ഏറ്റെടുക്കാൻ അവനു വയ്യ...
ചെന്നില്ലെങ്കിൽ പല രാത്രികളിലായി താനയച്ചുകൊടുത്ത ഫോട്ടോകളും പലപ്പോഴും അവൻ തന്നെ എടുത്ത ചിത്രങ്ങളും അവന്റെ കയ്യിലുണ്ട്... അത് അഭി ക്ക് അയച്ചുകൊടുക്കുമെന്നും നെറ്റിലൂടെ എല്ലാവരും അത് കാണുമെന്നും അവൻ ഭീഷണി മുഴക്കുന്നു.
ഞാനിനി എന്ത് ചെയ്യും???
അവളുടെ ചോദ്യം കേട്ടപ്പോൾ മുഖമടക്കി ഒന്ന് കൊടുക്കാനാണ് തോന്നിയത്.
പാവം അഭി എന്ത് മാത്രം അവനവളെ സ്നേഹിക്കുന്നു.
ജിനീ നീ ചെയ്തതെല്ലാം തെറ്റാണെന്നു ഞാൻ പറയാതെ തന്നെ നിനക്കറിയാം.
അറിഞ്ഞു കൊണ്ട് അഭിയെ മറന്ന് നീ ചെയ്ത തെറ്റിനെ എനിക്ക് സപ്പോർട്ട് ചെയ്യാൻ പറ്റില്ല...
നീ അവന്റെ കൂടെ പോവുകയോ ജീവിക്കുകയോ എന്തേലും ചെയ്യ്....
എനിക്കൊന്നേ പറയാനുള്ളൂ,പോവുന്നതിന് മുമ്പ് അഭിയെ വിളിച്ച് എല്ലാം പറയണം.....
നീ ചെയ്ത തെറ്റ് പൊറുക്കാൻ അഭി ക്ക് പറ്റിയില്ലെങ്കിൽ നീ നിന്റെ ദീപക്കിന്റെ കൂടെ പോണം....
പക്ഷേ അത് അവനോടൊപ്പമുള്ള സുഖജീവിതം പ്രതീക്ഷിച്ചാവരുത്, ഇതുപോലുള്ള ഒരുപാട് ദീപക്കുമാരുടെ കൂടെയുള്ള ജീവിതത്തിലേക്കോ അതല്ലെങ്കിൽ മരണത്തിലേക്കോ ആയിരിക്കണം...
ഇത്രേ എനിക്ക് നിന്നോട് പറയാനുള്ളൂ...
നീ തീരുമാനിച്ചിട്ട് വിളിക്ക്... കുഞ്ഞിനെ കൊണ്ടുപോവാൻ നീ എപ്പോ വിളിച്ചാലും ഞാൻ വരും...
അഭി വരുന്നത് വരെ അവളെ എന്റമ്മ നോക്കും.....
അല്ലാതെ ഈ കാര്യത്തിൽ എനിക്കൊന്നും ചെയ്യാനില്ല... ഞാൻ പോവുന്നു...
തിരിച്ച് വന്ന് വണ്ടിയിൽ കേറുമ്പോൾ ചിരിയോടെ റ്റാറ്റ കാണിക്കുന്ന മാളൂട്ടിയോട് ആന്റി മോളെ കൊണ്ടുപോവാൻ വാരാട്ടോ എന്ന് പറഞ്ഞു...
കാരണം എനിക്കറിയാമായിരുന്നു ജിനിയുടെ തീരുമാനം ദീപക്കിനൊപ്പം പോവാൻ തന്നെയാണെന്ന്...... അവളുടെ മുന്നിൽ വേറെ വഴിയില്ലെന്ന്....
No comments:
Post a Comment
ഈ രചന വായിച്ചതിനു നന്ദി - താങ്കളുടെ വിലയേറിയ അഭിപ്രായം രചയിതാവിനെ അറിയിക്കുക