അനാഥ

*********
ഒരു കളിത്തൊട്ടിലിൽ
വിരലുണ്ടുറങ്ങുന്ന ചുണ്ടുകൾ
വെറുതെ വിതുമ്പിടുന്നു ,
ഉമ്മറക്കോലായിൽ നിലവിളക്കിൻ പ്രഭ -
യേറ്റമ്മ ശയിപ്പതറിഞ്ഞിടാതെ.
കുഞ്ഞു വയറ്റിൽ വിശപ്പിന്റെ
താണ്ഡവമുണ്ടായ നേരം
മുതൽക്കുതന്നെ,
ചാരെയണഞ്ഞു പാലൂട്ടിടു-
മെന്നോർത്തിന്നേറെ കരഞ്ഞു
വിളിച്ചതല്ലേ ,
ഇനിയുമമാന്തമെന്തെ
ന്നോർത്തുകിടന്നേറെ വലയും
വിശപ്പിൻ കുറുമ്പുമായി.
തോളിലെടുത്തു താരാട്ടുവതാരിതോ
താളമെന്നമ്മക്കു തന്നെ കേമം.
ഒന്നു ചിണുങ്ങുകിലോടിയണയുവോ -
ളിന്നു മറന്നു പോയ് കണ്മണിയെ ,
ഇനിയുമിങ്ങെത്തുവാൻ നേരമില്ലെങ്കിലോ
കടിയൊന്നു കരുതി വെക്കേണമിന്ന്.
ഒരു കളിത്തൊട്ടിലിൽ
വിരലുണ്ടുറങ്ങുന്ന ചുണ്ടുകൾ
വെറുതെ വിതുമ്പിടുന്നു
ഉമ്മറക്കോലായിൽ
നിലവിളക്കിൻ പ്രഭയേറ്റമ്മ
ശയിപ്പതറിഞ്ഞിടാതെ .
**************************************

___ ധന്യ ബിപിൻ____